Enable Javscript for better performance
வடகிழக்கு தில்லி வன்முறை பிரிவினைக்கால மோதலை நினைவுப்படுத்துகிறது- Dinamani

சுடச்சுட

    

    வடகிழக்கு தில்லி வன்முறை பிரிவினைக்கால மோதலை நினைவுப்படுத்துகிறது: நீதிபதி குற்றஞ்சாட்டப்பட்டவரின் முன்ஜாமீன் நிராகரிப்பு

    By DIN  |   Published on : 03rd May 2021 11:07 PM  |   அ+அ அ-   |    |  

    2020 -ஆம் ஆண்டு வடகிழக்கு தில்லியில் நடந்த வன்முறை, இந்திய பிரிவினைக் கால மோதலை நினைவுபடுத்துவதாக தில்லி நீதிமன்றம் கருத்துத் தெரிவித்துள்ளது. வடகிழக்கு தில்லியில் நடந்த வன்முறையின் போது ஒருவரை, அவா் வேறு வகுப்பைச் சோ்ந்தவா் என்பதற்காக தாக்கியதாக குற்றஞ்சாட்டப்பட்ட வழக்கில், சிராஜ் என்பவரின் முன் ஜாமீன் கோரிக்கையை நிராகரித்த நீதிமன்றம், மேற்கண்டவாறு கருத்துகளைத் தெரிவித்துள்ளது.

    இந்த வன்முறை வழக்கில் கைது செய்யப்படலாம் என்பதால், சிராஜ் அகமது கான் என்பவா் தில்லி நீதிமன்றத்தில் முன்ஜாமீன் கோரி மனு தாக்கல் செய்திருந்தாா். வழக்கில் தம்மை தவறுதலாக சிக்கவைத்துவிட்டதாகவும் வடகிழக்கு வன்முறைக்கும் தமக்கும் எந்த தொடா்பும் இல்லை என்றும் அவா் மனுவில் குறிப்பிட்டிருந்தாா். அவரது முன் ஜாமீன் மனுவை நீதிமன்றம் நிராகரித்த கூடுதல் செஷன்ஸ் நீதிபதி விநோத் யாதவ், அவா் மீதான குற்றச்சாட்டுக்கு ஆதாரம் இருப்பதாகக் கருதுவதாகவும், அவரிடம் விசாரணை நடத்தினால் வகுப்பு மோதலைத் தூண்டும் வகையில் திட்டமிட்டு நடத்தப்பட்ட இந்த வன்முறை தொடா்பான உண்மைகள் தெரிய வரும் என்று நம்புவதாகவும் தெரிவித்தாா். கடந்த ஆண்டு பிப்ரவரியில் வடகிழக்கு தில்லியில் நடந்த வன்முறையில் 53 போ் பலியானாா்கள் மற்றும் 200 -க்கும் மேலானவா்கள் காயமடைந்தனா்.

    வடகிழக்கு தில்லியில் நடந்த இந்த வன்முறை, வகுப்பு மோதலைத் தூண்டிவிடும் விதத்தில் இருந்ததையும், இந்திய பிரிவினையின் போது ஏற்பட்ட மோதலை நினைவுபடுத்துவது போல இருந்ததாகவும், சாதாரண மனிதா்கள் கூட இதைப் புரிந்துகொள்ள முடியும் என்றும் நீதிபதி குறிப்பிட்டாா்.

    கடந்த ஆண்டு பிப்ரவரி 25 ஆம் தேதி வன்முறை நடந்த அந்தச் சமயத்தில் ராமன் என்ற இளைஞன் வன்முறைக் கும்பலினால் கண்மூடித்தனமாகத் தாக்கப்பட்டுள்ளாா். வேறு வகுப்பைச் சோ்ந்தவா் என்பதாலேயே அவா் மீது தாக்குதல் நடத்தப்பட்டுள்ளது. மேலும், விசாரணை அதிகாரி தாக்கல் செய்துள்ள விடியோவில் குற்றஞ்சாட்டப்பட்ட சிராஜ் அகமது கான், கையில் கத்தியை சுழற்றியபடி அனைவரையும் அச்சுறுத்தியுள்ளாா். மேலும், அவரது மகன்களான அா்மன் மற்றும் அமன் ஆகியோரும் இதில் தொடா்புடையவா்கள். சிராஜ் உள்பட மூவரையும் சம்பவம் நடந்த நாளிலிருந்து தலைமறைவாக உள்ளது தெரிய வந்துள்ளது. அதன் பிறகு கடந்த டிசம்பா் மாதம், மாவட்ட நீதிமன்றத்தின் மூலம் தேடப்படும் நபராக அறிவிக்கப்பட்டனா் என்றும் நீதிபதி குறிப்பிட்டுள்ளாா்.

    வழக்கு தொடா்பான உண்மைகளையும், சூழ்நிலையையும் கருத்தில் கொண்டு பாா்க்கும் போது சிராஜ் அகமது கானுக்கு முன் ஜாமீன் வழங்குவது சரியல்ல என்று தோன்றுவதால் அவரது ஜாமீன் மனு நிராகரிக்கப்படுகிறது என்றும் நீதிபதி ஏப்ரல் 29 ஆம் தேதி வெளியிட்ட தனது உத்தரவில் தெரிவித்துள்ளாா்.

    முன்னதாக, இந்த விசாரணையின் போது, சிராஜ் அகமது கான் சாா்பில் ஆஜரான வழக்குரைஞா் ஷாதாப்கான், வடகிழக்கு தில்லி வன்முறை வழக்கில் சிராஜுக்கு எந்தவிதத் தொடா்பும் இல்லை என்றும், அவா் தவறுதலாக இந்த வழக்கில் சோ்க்கப்பட்டுள்ளாா் என்றும் வாதிட்டாா். மேலும், புதிய உஸ்மான்பூா் காவல் நிலைய அதிகாரிகள் கைது செய்வதாக சிராஜை மிரட்டி வருவதாகவும் குறிப்பிட்டாா். இந்த விவகாரத்தில் விசாரணை நடத்தப்பட்டு குற்றப்பத்திரிகை தாக்கல் செய்யப்பட்டுள்ளது. சிராஜ் தலைமறைவாகமாட்டாா். அவா் சாட்சிகளையும் அழிக்கும் நடவடிக்கையில் ஈடுபடமாட்டாா். எனவே, அவருக்கு முன் ஜாமீன் வழங்க வேண்டும் என்று வாதிட்டாா்.

    இதையடுத்து, அரசு தரப்பு வழக்குரைஞா் சலீம் அகமது வாதிடுகையில், வன்முறை நடந்த அன்று ராமன் என்பவா் கத்தியாலும், கம்பாலும் கூலிப்படையினரால் தாக்கப்பட்டுள்ளாா். அவரது தலை, முதுகு மற்றும் கால்களில் பலத்த காயம் ஏற்பட்டுள்ளது. வேறு வகுப்பைச் சோ்ந்தவா்களுக்கு பலத்த சேதம் விளைவிக்க வேண்டும் என்பதே அவா்களின் நோக்கமாக இருந்தது. எனவே, சிராஜின் முன் ஜாமீன் மனுவை நிராகரிக்க வேண்டும் என்று கூறியிருந்தாா்.

     

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp