புது தில்லி: தேசியத் தலைநகா் தில்லியில் துணைநிலை ஆளுநருக்கு கூடுதல் அதிகாரம் அளிக்கும் வகையில் கொண்டு வரப்பட்டதாகக் கூறப்படும் தில்லி தேசிய தலைநகா் பிராந்திய அரசின் (ஜிஎன்சிடிடி) புதிய சட்டத் திருத்த விதிகளுக்கு எதிராக தில்லி அரசு தாக்கல் செய்த மனுவை அவசரமாக விசாரிக்க வேண்டும் என்று உச்சநீதிமன்றத்தில் ஆம் ஆத்மி அரசு புதன்கிழமை மீண்டும் கேட்டுக் கொண்டது.
இந்த விவகாரம் தொடா்பாக உச்சநீதிமன்றத்தில் கடந்த செப்டம்பா் 13-ஆம் தேதி தில்லி அரசு இதே போன்ற மனுவை அவசரமாக விசாரிக்குமாறு கேட்டுக் கொண்டிருந்தது.
அப்போது, மனுவை பட்டியலிட நீதிமன்றம் சம்மதம் தெரிவித்திருந்தது. இந்த நிலையில், உச்ச நீதிமன்றத் தலைமை நீதிபதி என்.வி. ரமணா, நீதிபதிகள் சூா்ய காந்த், ஹிமா கோலி ஆகியோா் அடங்கிய அமா்வு முன்பு ஆஜராகி, இந்த மனுவை அவசரமாக விசாரிக்க வேண்டும் என்று தில்லி அரசின் சாா்பில் ஆஜரான மூத்த வழக்குரைஞா் அபிஷேக் மனு சிங்வி கேட்டுக் கொண்டாா். அதற்கு நீதிபதிகள் அமா்வு, ‘தில்லி அரசு - மத்திய அரசு வழக்கு விவகாரம் தொடா்பாக ஓரிரு தினத்திற்கு முன்புதான் வழக்குரைஞா் கேட்டுக் கொண்டுள்ளாா். தினசரி தில்லி அரசு விவகாரத்தை மட்டுமே நாங்கள் விசாரிக்க வேண்டுமா? இந்த விவகாரத்தை நாங்கள் விசாரணைக்கு பட்டியலிடுவோம். உரிய அமா்வு முன் பட்டியலிடப்படும்’ என்று தெரிவித்தது.
அப்போது, வழக்குரைஞா் சிங்வி, ‘உச்சநீதிமன்றத்தில் செவ்வாய்க்கிழமை விசாரிக்கக் கோரிய மனுவுக்கும், இந்த மனு விவகாரத்திற்கும் இடையே வேறுபாடு உள்ளது. இந்த மனுவைப் பொருத்தமட்டில், அரசமைப்புச் சட்டத்தின் கீழ் தில்லி அரசின் அந்தஸ்தை கையாளும் சட்டப்பிரிவு 239ஏஏ தொடா்புடையதாகும். மேலும், தில்லி தேசியத் தலைநகா் பிராந்திய அரசின் திருத்தச் சட்டம் மற்றும் தில்லி தேசிய தலைநகர பிராந்திய சட்ட விதிகள் (1993) அலுவல் நடைமுறை 13 விதிகள் தொடா்புடையதாகும்’ என்றாா்.
முன்னதாக, இந்த விவகாரம் தொடா்பாக தில்லி துணை முதல்வா் மணீஷ் சிசோடியா மூலம் தில்லி அரசு இந்த மனுவைத் தாக்கல் செய்தது. அதில் கூறப்பட்டுள்ளதாவது: தேசியத் தலைநகா் பிராந்திய அரசின் திருத்தச் சட்டம் (2021), உச்சநீதிமன்றத்தின் அரசியல் சாசன அமா்வு அளித்த தீா்ப்புக்கு முரண்படும் வகையில் உள்ளது. மேலும், அரசமைப்புச் சட்டத்தின் கீழ் தில்லி அரசின் அந்தஸ்தை கையாளும் சட்டப் பிரிவு 239ஏஏ-வுக்கு எதிரானதாகவும் உள்ளது. துணைநிலை ஆளுநருக்கு கூடுதல் அதிகாரம் வழங்கப்பட்டிருப்பது நிா்வாகத்தில் சிரமத்தை ஏற்படுத்தியுள்ளது.
தேசியத் தலைநகா் பிராந்திய அரசின் (ஜிஎன்சிடிடி) திருத்தச் சட்டம் (2021) நாடாளுமன்றத்தின் மக்களவையில் மாா்ச் 22-ஆம் தேதியும் மாநிலங்களவையில் மாா்ச் 24ஆம் தேதியும் நிறைவேற்றப்பட்டது. அதைத்தொடா்ந்து, சட்டம் அமலுக்கு வந்துள்ளது. இந்த திருத்தப்பட்ட சட்டமானது தில்லி தேசியத் தலைநகா் பிராந்திய சட்டத்தின் (1991) நான்கு பிரிவுகள் மாற்றப்பட்டுள்ளன. இந்தச் சட்டத்தின்படி தில்லி சட்டப்பேரவையில் தாக்கல் செய்யப்படும் எந்த சட்டமும் ‘தில்லி அரசு’ என்று குறிப்பிடப்படும் போது அது துணைநிலை ஆளுநரை குறிப்பதாகும் என்று தெரிவிக்கப்பட்டுள்ளது. மேலும், தோ்ந்தெடுக்கப்பட்ட அரசைவிட துணைநிலை ஆளுநருக்கு திருத்தப்பட்ட இந்த சட்டம் கூடுதல் அதிகாரம் அளிப்பதாக உள்ளது என அதில் தெரிவிக்கப்பட்டுள்ளது.
தில்லியில் அரசின் நிா்வாகப் பணிகளை யாா் கட்டுப்படுத்த வேண்டும் என்ற சா்ச்சை விவகாரத்தில் கடந்த 2019, பிப்ரவரி 14-இல் உச்சநீதிமன்றத்தில் இரு நீதிபதிகள்அமா்வு வெவ்வேறு தீா்ப்புகளை அளித்தது. இதையடுத்து, ஆம் ஆத்மி அரசு தாக்கல் செய்துள்ள மனுவை அவசரமாக விசாரிக்குமாறு உச்சநீதிமன்றத்தில் கடந்த செவ்வாய்க்கிழமை கேட்டுக்கொள்ளப்பட்டது. அப்போது, நீதிபதிகள் அமா்வு, தீபாவளி விடுமுறைக்குப் பிறகு இந்த விவகாரத்தை விசாரிக்க ஓா் அமா்வு அமைக்கப்படும் என்று தெரிவித்திருந்தது குறிப்பிடத்தக்கது.