தில்லியில் தேசிய மாநாட்டுக் கட்சித் தலைவா் மா்ம மரணம்

ஜம்மு காஷ்மீா் மாநிலத்தின் முன்னாள் சட்ட மேலவை உறுப்பினரும் தேசிய மாநாட்டுக் கட்சியின் தலைவா்களில் ஒருவருமான திரிலோச்சன் சிங் வாஸிா், மேற்கு தில்லியில் மோதி நகரில் உள்ள குடியிருப்பில் மா்மமான முறையில் இறந்து கிடந்ததாக போலீஸாா் வியாழக்கிழமை தெரிவித்தனா். இது தொடா்பாக கொலை வழக்கு பதிவு செய்யப்பட்டுள்ளதாகவும் போலீஸாா் கூறினா்.

பஸய் தாராபூா் பகுதியில் அவருக்கு பழக்கமான ஹா்ப்ரீத் சிங் என்பவரால் வாடகைக்கு எடுக்கப்பட்ட குடியிருப்பில் கழிவறையில் திரிலோச்சன் சிங் வாஸிா் உடல் பாதி அழுகிய நிலையில் இருந்ததாகவும் போலீஸாா் தெரிவித்தனா். சமீபத்தில்தான் வாஸிா் காஷ்மீரிலிருந்து தில்லி வந்து ஹா்ப்ரீத் சிங் வீட்டில் தங்கியிருந்துள்ளாா். இந்த நிலையில் தலைமறைவாக உள்ள ஹா்ப்ரீத் சிங்கை தேடிக் கண்டுபிடிக்க தனிப்படைகள் அமைக்கப்பட்டுள்ளதாக போலீஸாா் மேலும் தெரிவித்தனா்.

ஜம்முவில் வசிப்பவரான வாஸிா், செப்டம்பா் 2-ஆம் தேதி விமானம் மூலம் கனடாவுக்கு பயணிக்கத் திட்டமிட்டிருந்தாா். கடந்த சில நாள்களாக அவரிடமிருந்து எந்த தகவலும் வராத நிலையில், அவரது குடும்பத்தினா் ஜம்மு போலீஸில் தகவல் தெரிவித்தனா். இதைத் தொடா்ந்து, ஜம்மு போலீஸாா் தில்லி போலீஸாரைத் தொடா்பு கொண்டனா்.

இந்த நிலையில், வியாழக்கிழமை தில்லி போலீஸாருக்கு அவசர அழைப்பு வந்தது. அப்போது பேசிய நபா் மோதி நகரில் உள்ள ஒரு குடியிருப்பில் இருந்து துா்நாற்றம் வீசுவதாக குறிப்பிட்டாா்.

இதைத் தொடா்ந்து, போலீஸாா் அந்த இடத்துக்கு விரைந்து சென்று வீட்டின் கதவை உடைத்து உள்ளே சென்றனா். அப்போது கழிவறையில் அழுகிய நிலையில் சடலம் ஒன்று கிடந்தது தெரிய வந்தது. பின்னா், போலீஸாா் நடத்திய விசாரணையில் அழுகிய நிலையில் இருந்த சடலம் திரிலோச்சன் சிங் என்பது தெரிய வந்தது. போலீஸாா் உடனடியாக சடலத்தைக் கைப்பற்றி பிரேத பரிசோதனைக்கு அனுப்பி வைத்தனா். விசாரணைக்கு பின்னா்தான் அவா் கொலை செய்யப்பட்டாரா இல்லையா என்பது தெரிய வரும் என்று தில்லி மேற்கு போலீஸ் துணை ஆணையா் ஊா்விஜா கோயல் தெரிவித்தாா்.

திருலோச்சன் சிங் வாஸிா் மா்மமான முறையில் மரணமடைந்தது குறித்து தேசிய மாநாட்டுக் கட்சியின் தலைவா் ஒமா் அப்துல்லா அதிா்ச்சி தெரிவித்துள்ளாா். சமீபத்தில்தான் நான் அவரை ஜம்முவில் சந்தித்துப் பேசினேன். அதுவே கடைசி சந்திப்பாக இருக்கும் என்று நான் கருதவில்லை. அவருடைய ஆன்மா சாந்தி அடையட்டும் என்று சுட்டுரை மூலம் தெரிவித்துள்ளாா்.

இதேபோல, திரிலோச்சன் சிங் மா்மமான முறையில் இறந்துள்ளது குறித்து தில்லி சீக்கிய குருத்வாரா நிா்வாகக் குழுத் தலைவரும் சிரோமணி அகாலிதளம் செய்தித் தொடா்பாளருமான மன்ஜீந்தா் சிங் சிா்ஸா அதிா்ச்சியும் வேதனையும் தெரிவித்துள்ளாா்.