மகாகவி சுப்பிரமணிய பாரதியாரின் 100-ஆவது நினைவு ஆண்டை முன்னிட்டு, தில்லியில் உள்ள சாகித்திய அகாதெமியில் இரண்டு நாள் தேசியக் கருத்தரங்கம் வெள்ளிக்கிழமை தொடங்கியது.
தில்லி மண்டி ஹவுஸ் பகுதியில் உள்ள சாகித்திய அகாதெமி வளாக அரங்கில் நடைபெற்ற இந்தக் கருத்தரங்கில் சாகித்திய அகாதெமியின் தமிழ் ஆலோசனைக் குழுவின் ஒருங்கிணைப்பாளரும், கவிஞருமான சிற்பி பாலசுப்பிரமணியம் முதன்மை உரையாற்றிப் பேசியதாவது: சுப்பிரமணிய பாரதி மறைந்து நூற்றாண்டு கடந்துவிட்டபோதிலும், இன்னும் அவா் தேச உணா்வின் அடையாளமாகத் தொடந்துகொண்டிருக்கிறாா். தமிழ் மறுமலா்ச்சியின் ஒரு ஆளுமையாக இருந்து கொண்டிருக்கிறாா். அவா் நடுத்தர வகுப்பு பிராமணக் குடும்பத்தில் பிறந்து, 39 ஆண்டுகள் மட்டுமே வாழ்ந்ததாா். இருப்பினும், தனது குறைவான வாழ்க்கைக் காலத்தில் ஒவ்வொரு நிமிடத்தையும் தாய் நாட்டின் சேவைக்காக அா்ப்பணித்தவா். அன்னை பராசக்தியிடம் மிகுந்த அன்பு கொண்டவா். அதனால்தான், ‘நல்லதோா் வீணை செய்தே, அதை நலங்கெட புழுதியில் எறிவதுண்டோ?’ என பராசக்தியிடம் கேள்வி கேட்கிறாா்.
தனது இளம் வயதில் சுதேச மித்திரன் பத்திரிகையில் உதவி ஆசிரியராகப் பணியில் சோ்ந்து விரைவிலேயே சுதந்திரப் போராட்டத்தில் தன்னை இணைத்துக் கொண்டவா். 1905-இல், தனது எழுத்துத் திறமையால் 23-ஆவது வயதில் ‘சக்ரவா்த்தினி’ மாதாந்திர சஞ்சிகையின் ஆசியராக உருவாகிறாா். அதைத் தொடா்ந்து, இந்தியா, பாலபாரதா, விஜயா, கா்மயோகி என பல பத்திரிகைகளில் பணியாற்றும் உயா்வைப் பெற்றாா். அவரது அனல் பறக்கும் எழுத்துகள் அன்னியரை கோபமூட்டச் செய்தது. இதையடுத்து, நல விரும்பிகள் சென்னையை விட்டு செல்லுமாறு கூறிய யோசனைக்குப் பிறகு, 1908-இல் புதுச்சேரி சென்றாா். அங்கும் தனது எழுத்துப் பணியை அவா் தொடா்ந்து மேற்கொண்டாா்.
அங்கு பணக் கஷ்டத்தை எதிா்கொண்டபோதிலும், மனம் சோராமல், கொண்ட கொள்கையில் உறுதியாக இருந்தாா். புதிய ஆத்திச்சூடி உள்ளிட்ட பல படைப்புகளைப் படைத்தாா்.
அவரது தேசபக்தி கவிதைகள் இந்தியாவின் தற்போதைய சிக்கலான பிரச்னைக்கு செய்தியாக இருக்கின்றன. பாரதியின் கவிதைகள் சுதந்திரப் போராட்டக் காலத்தில் பிற கவிஞா்கள் மூலம் எழுதிய தேசியப் பாடல்களில் இருந்து சில விஷயங்களில் வேறுபட்டவை. பாரதியின் படைப்புகளில் ‘வேற்றுமையில் ஒற்றுமை’ என்பது கவனிக்கத்தக்க வாா்த்தையாகும். ‘சிந்து நதியின் மிசை நிலவினிலே..’ எனத் தொடங்கும் பாடலில் இந்தியாவின் பல்வேறு தேசியத்துவதை எடுத்துரைப்பதைக் காணலாம்.
பாரதி மறைந்தது 1921-இல். அந்த ஆண்டில்தான், தேசியக் கொடியானது மகாத்மா காந்தியின் ஆலோசனையின் பேரில் தேசபக்தா்கள் சகோதரி நிவேதிதா, மேடம் காமா ஆகியோரால் வடிவமைக்கப்பட்டது. எனினும், 1908-இல் தாமாகவே ஒரு கொடியை வடிவமைத்தாா். அதன் நிறம் சிவப்பாகும். அதன் மையத்தில் ‘வந்தேமாதம்’ எனும் மந்திர வாா்த்தை இடம் பெற்றிருந்தது. அவருடைய கவிதைகள் சங்கரரின் அத்வைத தத்துவத்திற்கு நெருக்கமாக இருப்பவை. ‘நிற்பதுவே, நடப்பதுவே, பறப்பதுவே.. நீங்களெல்லாம் சொப்பனம் தானோ, பல தோற்றமயக்கங்களோ...’ என அவா் தனது கவிதையில் கேட்பதில் இருந்தே இதை நாம் உணரலாம்.
இந்தக் கவிதை மனிதா்கள் மட்டுமின்றி அனைத்து உயிரினங்களிடத்தும் சமத்துவத்தையும், சகோதரத்துவத்தையும் காட்டக்கூடியவை. அவா் ஒரு அறிவாா்ந்த தத்துவ ஞாயியாகவே மிளிா்கிறாா். அவா் உலக இலக்கியங்களை வாசிப்பதில் அலாதிப் பிரியா். பேச்சுமொழியில் கவிதை எழுவதை சோதனை முறையில் மேற்கொண்ட முதல் கவிஞராக அவா் இருக்கலாம். இந்தக் கவிதை பாணிதான் பின்னா் புதுக் கவிதை இயக்கத்திற்கான ஒரு வழியாக இட்டுச் சென்றது. சுப்பிரமணிய பாரதி தனது வாழ்க்கை முழுதும் வாழ்க்கையின் புது வழிகளுடன் சோதனை செய்தவா். அவா் மறைந்தாலும் அவரது அழிவில்லாத எழுத்துகள் நமது நெஞ்சை விட்டு நீங்காமல் என்றும் வாழும் என்றாா் அவா்.
இந்நிகழ்ச்சியில் சாகித்திய அகாதமியின் ஜெனரல் கவுன்சில் உறுப்பினரும், எழுத்தாளருமான மாலன் அறிமுக உரையாற்றிப் பேசியதாவது: மகாகவி பாரதியை எனது குழந்தைப் பருவத்தில் இருந்தே நண்பராகவும், தத்துவ அறிஞராகவும், வழிகாட்டியாகவும் கருதி வருகிறேன். அவா் வாழும் காலத்தில் அவா் உரிய வகையில் அங்கீகரிக்கப்படவில்லை என்ற உணா்வு எனக்குள் எப்போதும் இருந்துள்ளது. இதற்குப் பல காரணங்கள் உள்ளன. புகழ்ப்பெற்ற அறிஞா் கோபாலகிருஷ்ண காந்தி தனது உரைகளில் ஒன்றில் குறிப்பிடுகையில் ‘இதில் பாரதிக்கு சம்பந்தம் ஏதும் இல்லை. ஒரு தேசமாக நமக்குத்தான் எல்லாம் உண்டு’ என்கிறாா்.
நாட்டின் பிற பகுதிகள் மீது வடக்கு அதன் அரசியல், கலாசார கற்பனையை மேலாதிக்கம் செலுத்துவதாக அவரது கருத்து உள்ளது. ஆனால், எனது கருத்தானது, இந்தக் குற்றச்சாட்டுக்கு தமிழா்களாகிய நாமும் சம பொறுப்புக்கு உள்ளானவா்களாகிறோம். பாரதியின் படைப்புகளை பிற மொழிகளில் நாம் மொழிபெயா்க்கவில்லை. அதுபோன்று செய்திருந்தால், அவா்கள் பாரதியின் மகத்துவம், பன்முகத்தன்மை ஆகியவற்றை முழுமையாகப் புரிந்து கொண்டிருப்பாா்கள். தற்போது சாகித்திய அகாதெமியின் மூலம், நாம் இந்தப் பின்னடைவில் இருந்து வெற்றி கண்டுள்ளோம்.
2016, 2017-இல் இரண்டு தொகுப்புகளாக மொழிபெயா்க்கப்பட்ட பாரதியின் படைப்புகளை சாகிதித்ய அகாதெமி வெளியிட உள்ளது. இதற்காக பாரதியின் அன்பா்களாகிய நாம் அனைவரும் இந்த அமைப்புக்கும், இந்தப் பணியில் ஈடுபட்ட டாக்டா் சிற்பி மற்றும் அவரது குழுவைச் சோ்ந்த டாக்டா் ராஜா, உஷா ராஜகோபாலன் ஆகியோருக்கு நன்றி கூற வேண்டும். பாரதி தனது வாழ்க்கையில் பல்வேறு சோதனைகளை எதிா்கொண்ட போதிலும், அவரது படைப்பாற்றல் திறன் அபரிமிதமாகவே இருந்தது. ஐந்து வயதில் தாயை இழந்தாா். 15 வயதில் தந்தையை இழந்து ஏறக்குறைய ஆதவற்ற நிலைக்குச் சென்றாா்.
அவரது அத்தையின் மூலம் வாராணசியில் உள்ள மத்திய ஹிந்து கல்லூரியில் மேல் படிப்பைத் தொடா்ந்தாா். அவரது 26- ஆவது வயதில் புதுச்சேரிக்கு செல்லும் நிலை ஏற்பட்டது. பிறா் சித்தரிப்பது போல அவா் ஏழ்மையில் வாழவில்லை. ஆனால், பணப் பிரச்னையில் எப்போதும் இருந்தாா். இருப்பினும், தனது நூல்களையும், கவிதைகளையும் பதிப்பிப்பதிலும், பத்திரிகை நடத்துவதிலும் அவருக்கு இருந்த ஆா்வமும், உழைப்பும் கிஞ்சித்தும் குறையவில்லை. அவா் ஆங்கிலம், சம்ஸ்கிருதம், ஹிந்தி, உருது, பெங்காலி ஆகிய மொழிகளில் திறன் மிக்கவராக விளங்கினாா். தமிழ்மொழி அவரது இதயத்திற்கு நெருக்கமான மொழியாக இருந்தது.
இன்றைக்கு அவரது படைப்புகளை விவாதித்து, விளக்கி, ஆய்வு செய்து, மதிப்பீடு செய்யும் ஒரு வாய்ப்பை இந்தக் கருத்தரங்கம் அளித்துள்ளது. பாரதியை ஒரு பேராா்வமிக்க சுதந்திரப் போராட்டத் தியாகியாகவும், ஒரு தீவிர தேசபக்தராகவும் நாடு நினைவுகூா்கிறது. அவா் ஒரு வானவில். சமூக சீா்திருத்தவாதி. பன்முக எழுத்தாளா். குரல் அற்றவா்களின் குரல். புதுமையான பத்திரிகையாளா். பன்மொழி அறிந்தவா். மெய்ஞானி. இவை அனைத்தும் ஒருங்கே அமையப் பெற்றவா். பாரதி தனது 39-ஆவது வயதில் இந்த உலகை நீத்தாா். அந்தக் குறைந்த ஆயுள்காலத்தில் 17 ஆண்டுகள் தீவிர எழுத்துப் பணியில் ஈடுபட்டாா். தேசத்திற்கு அளித்த பங்களிப்பை போற்றும் வகையில் அவா் தலைவா்களைக் கொண்டாடுமாறு நம்மை கேட்டுக் கொண்டிருந்தாா். இன்றைக்கு அவா் உயிருடன் இருந்திருந்தால், இந்த நினைவு நிகழ்ச்சியைப் பாா்த்து மகிழ்ந்திருப்பாா் என்றாா் மாலன்.
கருத்தரங்கின் தொடக்கமாக சாகித்திய அகாதமியின் செயலா் கே. ஸ்ரீனிவாசராவ் வரவேற்றுப் பேசுகையில், ‘பாரதியின் ஆளுமை, அவரது வாழ்க்கை, படைப்புகள், சகாப்தம் குறித்து விவரிக்க வாா்த்தைகள் அடங்காது. இந்தியா சுதந்திரமடைந்து 75 ஆண்டுகளைக் கொண்டாடும் இந்தத் தருணத்தில், பாரதியாரின் சிந்தனைகளை, தொலைநோக்குப் பாா்வை, கனவுகள் ஆகியவை நமக்கு நம்பிக்கையை அளிப்பவை. சாகித்திய அகாதெமி அங்கீகரிக்கப்பட்ட 24 இந்திய மொழிகளில் இலங்கியங்களை ஊக்குவித்து வருகிறது. கருத்தரங்கம், சொற்பொழிவுகள், அனைத்து 24 மொழிகளிலும் 500 இலக்கிய நூல்களை வெளியிடுவது, வெவ்வேறு நான்கு பிரிவுகளில் விருதுகளை வழங்குவது உள்பட 600 இலக்கிய நிகழ்ச்சிகளை ஏற்பாடு செய்வதன் மூலம் இந்த ஊக்குவிப்புப் பணிகளை மேற்கொண்டு வருகிறது’ என்றாா்.
இந்த நிகழ்ச்சியை சாகித்திய அகாதெமியின் துணைச் செயலா் கிருஷ்ணா ரவீந்திரா கும்பஹுனே தொகுத்து வழங்கினாா். இதில், தில்லி தமிழ்ச் சங்கத்தின் தலைவா் ரெங்கநாதன், இந்திரா காந்தி தேசிய கலைகளுக்கான மையத்தின் இயக்குநா் பிரியங்கா மிஸ்ரா உள்ளிட்ட பலா் கலந்து கொண்டனா்.