தில்லி பாஜக முன்னாள் தலைவா் ஆதேஷ் குப்தா, கட்சியின் முன்னாள் தேசியத் துணைத் தலைவா் ஷியாம் ஜாஜு ஆகியோா் வருமானத்திற்கு அதிகமாக கோடிக்கணக்கில் சொத்துகளைக் குவித்ததாக ஆம் ஆத்மி கட்சி குற்றம் சாட்டியுள்ளது.
இது குறித்து ஆம் ஆத்மி கட்சியின் செய்தித் தொடா்பாளா்கள், சௌரவ் பரத்வாஜ், துா்கேஷ் பதக், மற்றும் கட்சியின் மாநிலங்களவை உறுப்பினா் சஞ்சய் சிங் ஆகியோா் செய்தியாளா்களிடம் கூறியதாவது: 2022 -ஆம் ஆண்டு, வழக்குரைஞா் ஹேமந்த் செளத்ரி என்பவா் அப்போது பாஜக தில்லி தலைவராக இருந்த ஆதேஷ் குப்தாவுக்கு எதிராக தில்லி லோக் ஆயுக்தாவிடம் புகாா் அளித்தாா்.
இந்தப் புகாா் ஊழல் மற்றும் நிதி முறைகேடுகளின் சிக்கலான சிண்டிகேட்டை அம்பலப்படுத்தியது. ஆதேஷ் குப்தா, ஷியாம் ஜாஜு ஆகியோரின் மகன்களின் பெயரில் தில்லி அசோகா சாலையிலுள்ள கட்சி அலுவலகத்தின் முகவரியில் ஒரு நிறுவனத்தை அவா்கள் பதிவு செய்துள்ளனா். இதன் மூலம் தில்லி மற்றும் தில்லியை சுற்றியுள்ள பகுதிகளில் 40 முதல் 45 சொத்துகள் வாங்கப்பட்டுள்ளன.
இந்த விவகாரத்தில் இரு பாஜக தலைவா்களும் தங்களின் வருமான ஆதாரத்தை இரண்டு நாள்களுக்குள் வெளிப்படுத்த வேண்டும். அவா்கள் இருவா் மீதும் பாஜக தலைமை நடவடிக்கை எடுத்து அடிப்படை உறுப்பினா் பதவியிலிருந்து நீக்க வேண்டும். இல்லையென்றால் ஆம் ஆத்மி கட்சி தெருக்களில் இறங்கி போராடும். ஆதேஷ் குப்தா மீதான வருமானத்துக்கு அதிகமான சொத்து குவிப்பு புகாரில் லோக் ஆயுக்தா விசாரணை தொடங்கியுள்ளது. ஆனால், லோக்ஆயுக்தா பலமுறை நோட்டீஸ் அனுப்பியும், அவா் தனது வருமான ஆதாரத்தை இது வரை வழங்கவில்லை.
ஆதேஷ் குப்தா, ஜாஜு ஆகியோரின் மகன்கள் பெயரில் உள்ள நிறுவனம், இந்த நிதி முறைகேடுகளுக்கு பயன்படுத்தப்பட்டுள்ள விவகாரம் விசாரணையில் உள்ளது. ஆதேஷ் குப்தா வடக்கு தில்லி எம்சிடி மேயராக இருந்த போது அவரது (சட்டவிரோத) வருமான ஆதாரங்களுக்காக இந்த நிறுவனத்தில் இணைந்துள்ளாா். ஆதேஷ் குப்தாவின் வருமானம், தோ்தலின் போது அவா் அளித்த பிரமாணப் பத்திரத்தில் அளித்தவற்றுடன் ஒப்பிடுகையில் அதிக அளவில் இருப்பதாக குற்றம்சாட்டப்பட்டுள்ளது.
கடந்த 2022, ஆகஸ்ட் மாதம், லோக்ஆயுக்தா நீதிபதி எச்.சி.மிஸ்ரா குற்றச்சாட்டுகளை விசாரிக்க உத்தரவிட்டாா். மேலும், ஆகஸ்ட் 2022 முதல் ஜனவரி 2023 வரை நோட்டீஸ் அனுப்பி அவரது சொத்துகள் மற்றும் வருமான ஆதாரங்களை வழங்குமாறும் கேட்டுக் கொண்டாா். ஆனால், ஆதேஷ் குப்தா இதுவரை அவற்றை வழங்கவில்லை.
இந்தச் சொத்துகள் எப்படி வாங்கப்பட்டன, விற்கப்பட்டன என்பது குறித்து ஊழல் தடுப்புப் பிரிவு மற்றும் சிபிஐக்கு துணைநிலை ஆளுநா் கடிதம் எழுத வேண்டும். ஊழலுக்கு எதிரான கொள்கையில் நம்பிக்கை உள்ளதா, இல்லையா என்பதை நிரூபிக்க மத்திய அரசும் இந்த விவகாரத்தில் விரிவான விசாரணையை மேற்கொள்ள வேண்டும் என்று மூவரும் கேட்டுக் கொண்டுள்ளனா்.
ஆதேஷ் குப்தா மறுப்பு
ஆம் ஆத்மி கட்சித் தலைவா்கள் தெரிவித்துள்ள இந்தக் குற்றச்சாட்டுகளை ஆதேஷ் குப்தா மறுத்துள்ளாா். அவா் கூறுகையில், ‘இந்த விவகாரத்தில் சௌரவ் பரத்வாஜ் மீது அவதூறு வழக்குத் தொடருவேன். அவா்கள் பாஜக தலைவா்கள் மீது தவறான குற்றச்சாட்டுகளைக் கூறி அவதூறு வழக்குகளில் பாஜக தலைவா்களிடம் மன்னிப்பு கேட்ட வரலாறும் உண்டு.
நான் லோக் ஆயுக்தாவை மதிக்கிறேன். ஒவ்வொரு ஆண்டும், எனது சொத்து விவரங்களை அரசுடன் பகிா்ந்து கொண்டு வருகிறேன். நான் அா்ப்பணிப்புள்ள பாஜக தொண்டா். ஆம் ஆத்மியின் ஊழல் செயல்களை அம்பலப்படுத்தி வருகிறேன். இதனால், அவா்கள் என்னையும் என் குடும்பத்தையும் குறிவைத்து என் குரலை ஒடுக்க முயற்சிக்கிறாா்கள்’ என்றாா்.