கேஜரிவால் அரசின் அலட்சித்தால் தில்லி சாலைகளில் பள்ளங்கள்: வீரேந்திர சச்தேவா சாடல்

கடந்த 10 ஆண்டுகளாக செயல்படாமல் இருக்கும் அரவிந்த் கேஜரிவால் அரசின் அலட்சியம் காரணமாக தில்லியில் சாலைகள் பள்ளங்கள் ஏற்பட்டு, மிகவும் மோசமான நிலையில் உள்ளன என்று தில்லி பாஜக தலைவா் வீரேந்திர சச்தேவா விமா்சித்துள்ளாா். மேலும், நகரம் முழுவதும் ஏராளமான கழிவுநீா் மற்றும் குடிநீா் குழாய்கள் உடைந்து காணப்படுகின்றன என்றும் அவா் குற்றம்சாட்டியுள்ளாா்.

இதுகுறித்து அவா் செவ்வாய்க்கிழமை மேலும் கூறியதாவது: தில்லியின் புதிய முதல்வா் அதிஷி ஏறக்குறைய ஒரு வருடமாக பொதுப் பணித் துறை மற்றும் ஜல் போா்டு துறைகளை கையாண்டு வந்துள்ளாா். சாலை ஆய்வுகள் என்ற பெயரில் தனது அமைச்சா்கள் மற்றும் கட்சித் தலைவா்களுடன் ஊடக நிகழ்வுகளைத்தான் அவா் ஏற்பாடு செய்து வருகிறாா்.

தில்லியின் சாலைகளின் மோசமான நிலைக்கு ஆயிரக்கணக்கான உடைந்த சாக்கடை மற்றும் நீா் குழாய்களின் கசிவுதான் முக்கியக் காரணமாகும். சாலைகளை தற்காலிக பழுதுபாா்ப்பு மூலம் சரிசெய்ய முடியாது. எனினும், எதிா்வரும் தோ்தல்கள் வரை தற்காலிக சீரமைப்புகளில் அரசு அதிக கவனம் செலுத்துவதாகத் தெரிகிறது.

சாலை சீரமைப்பு குறித்து முதல்வா் அதிஷி மற்றும் எம்எல்ஏ மனீஷ் சிசோடியா ஆகியோரின் முரண்பாடான அறிக்கைகளால் தில்லி மக்கள் அதிா்ச்சியடைந்துள்ளனா்.

சாலை சீரமைப்பு பணிகள் 2 முதல் 3 நாள்களுக்குள் தொடங்கும் என்று முதல்வா் அதிஷி செவ்வாய்க்கிழமை கூறியுள்ளாா். அதே நேரத்தில் அவரது அரசியல் வழிகாட்டி மனீஷ் சிசோடியா, சாலை ஆய்வு பிரசாரம் நல்ல விளைவுகளை காட்டியிருப்பதாகவும். பல சாலைகள் ஏற்கெனவே சரிசெய்யப்பட்டுள்ளதாகவும் கூறியுள்ளாா்.

ஆம் ஆத்மி கட்சித் தலைவா்களின் அறிக்கைகளால் தில்லி மக்கள் திகைத்துள்ளனா். அதாவது, இன்னும் இரண்டு நாள்களில் பழுது நீக்கும் பணி தொடங்கும் என்று முதல்வா் அதிஷி கூறுவதை நம்புவதா அல்லது பழுதுபாா்க்கும் பணிகள் தொடங்கிவிட்டதாக சிசோடியா கூறியதை நம்புவதா என்று ஆச்சரியமடைந்துள்ளனா். மக்கள் தற்போது தில்லியில் உடைந்த சாலைகளைளேயே பாா்க்க முடிகிறது என்றாா் வீரேந்திர சச்தேவா.