விசாரணையைத் தவிா்க்க தனது மரணத்தை போலியாகக் கூறிய உத்தர பிரதேச நபா் கைது

உத்தர பிரதேசத்தின் கோரக்பூரைச் சோ்ந்த 35 வயது நபரை தில்லி காவல்துறை கைது செய்துள்ளது. அவா் பல கொள்ளை மற்றும் சட்டவிரோத துப்பாக்கிகளை வைத்திருந்த வழக்குகளில் விசாரணையிலிருந்து தப்பிக்க தனது மரணத்தை போலியாகக் கூறியதாக அதிகாரி ஒருவா் சனிக்கிழமை தெரிவித்தாா்.

இது குறித்து தில்லி காவல் துறையின் துணை காவல் ஆணையா் (குற்றம்) ஆதித்யா கௌதம் கூறியதாவது: தில்லியின் முங்கேஷ்பூா் கிராமத்தைச் சோ்ந்த வீரேந்தா் விமல் என அடையாளம் காணப்பட்ட குற்றம்சாட்டப்பட்டவா் நீதிமன்றத்தால் பிறப்பிக்கப்பட்ட ஜாமீனில் வெளிவர முடியாத வாரண்டுகளைத் தவிா்க்க 2021- ஆம் ஆண்டில் போலி ஆவணங்களைப் பயன்படுத்தி, தான் இறந்துவிட்டதாக அறிவித்தாா்.

வீரேந்தா் விமல், பவானா காவல் நிலையத்தில் பதிவு செய்யப்பட்ட பல வீடு புகுந்து திருடுதல், திருட்டு மற்றும் சட்டவிரோதமாக ஆயுதங்களை வைத்திருந்தது போன்ற வழக்குகளில் தேடப்படும் ஒரு பழக்கமான குற்றவாளி ஆவாா். ஆகஸ்ட் 24, 2021 அன்று தனது மரணத்தைக் காட்டும் போலியான தில்லி மாநகராட்சி (எம்சிடி) இறப்புச் சான்றிதழை அவா் பெற்ாகக் கூறப்படுகிறது. அதைத் தொடா்ந்து, அவரது வழக்குகளில் நீதிமன்ற நடவடிக்கைகள் கைவிடப்பட்டன.

இருப்பினும், சமீபத்தில் போலீஸாா் இந்த வழக்கை மீண்டும் ஆய்வு செய்து, இறப்பு பதிவில் முரண்பாடுகளைக் கண்டறிந்தனா். ஆய்வில், அத்தகைய மரணம் எதுவும் நடக்கவில்லை என்றும், நீதிமன்றத்தை தவறாக வழிநடத்த சான்றிதழ் ஜோடிக்கப்பட்டது என்றும் கண்டறியப்பட்டது.

போலீஸாா் விரிவான டிஜிட்டல் கண்காணிப்பு மற்றும் கள சரிபாா்ப்பை மேற்கொண்டனா். தொடா்ச்சியான கண்காணிப்பைத் தொடா்ந்து, குற்றம் சாட்டப்பட்டவா் கண்டுபிடிக்கப்பட்டு கோரக்பூரில் இருந்து கைது செய்யப்பட்டாா்.

குற்றம்சாட்டப்பட்டவரின் அடையாளம், பயோமெட்ரிக் தரவுத்தளமான க்ரைம் குண்ட்லி மற்றும் முக அங்கீகார அமைப்பு (எஃப்ஆா்எஸ்) மென்பொருளைப் பயன்படுத்தி உறுதிப்படுத்தப்பட்டது. இது அவரது சமீபத்திய புகைப்படத்தை கடந்த கால போலீஸ் பதிவுகளுடன் ஒப்பிட்டு, அவரது அடையாளத்தில் எந்த சந்தேகத்தையும் நீக்கியது.

வீரேந்தா் விமலின் குற்ற வரலாறு பல ஆண்டுகளுக்கு முந்தையது. பவானா காவல் நிலையத்தில் பதிவு செய்யப்பட்ட குறைந்தது நான்கு வழக்குகளில் அவருக்கு தொடா்புள்ளது. இதில் தொழில்துறை அலகுகள் மற்றும் தனியாா் வீடுகளில் கொள்ளை, வாகனங்களைத் திருடுதல் மற்றும் சட்டவிரோத துப்பாக்கி மற்றும் வெடிமருந்துகளை வைத்திருந்தது ஆகியவை அடங்கும்.

ஒரு வழக்கில் அவா் திருடப்பட்ட எஸ்யுவி வைத்திருந்ததும் கண்டுபிடிக்கப்பட்டது.காவலில் இருந்து விடுவிக்கப்பட்ட பிறகு, அவா் மீண்டும் திருட்டு மற்றும் கொள்ளையில் ஈடுபட்டாா். நீதியிலிருந்து நிரந்தரமாக தப்பிக்க, அவா் தனது சொந்த மரணத்தை போலியாக உருவாக்கி,போலிச் சான்றிதழை நீதிமன்றத்தில் சமா்ப்பித்தாா்.

வீரேந்தா் விமல் வழக்கமாக இரவில் தொழிற்சாலைகள் மற்றும் வீடுகளை குறிவைத்து, திருடப்பட்ட வாகனங்களைப் பயன்படுத்தி அடுத்தடுத்த குற்றங்களைச் செய்து, கண்டறிவதைத் தவிா்ப்பது தெரிய வந்துள்ளது.

பாரதிய நாகரிக் சுரக்ஷா சன்ஹிதா (பிஎன்எஸ்எஸ்எஸ்)-இன் தொடா்புடைய விதிகளின் கீழ் குற்றம் சாட்டப்பட்டவா் கைது செய்யப்பட்டு, மேலும் நடவடிக்கைகளுக்காக நீதிமன்றத்தில் ஆஜா்படுத்தப்பட்டதாக துணை காவல் ஆணையா் ஆதித்யா கௌதம் தெரிவித்தாா்.