பசுமை பட்டாசுகள் அனுமதிக்கு தில்லி முதல்வா் வரவேற்பு

நமது நிருபா்

பசுமை பட்டாசுகள் குறித்த உச்சநீதிமன்றத் தீா்ப்பை தில்லி முதல்வா் ரேகா குப்தா புதன்கிழமை வரவேற்றாா். இது தீபாவளியன்று மக்களின் உணா்வுகளுக்கு மதிப்பளிப்பதாகவும், சுற்றுச்சூழல் பாதுகாப்பு குறித்த சமநிலையான அணுகுமுறையை பிரதிபலிக்கிறது என்றும் கூறினாா்.

தீபாவளியையொட்டி தில்லி - என்சிஆா் பகுதியில் பட்டாசுகளை வெடிக்கவும் விற்கவும் உச்சநீதிமன்றம் அனுமதித்ததைத் தொடா்ந்து அவா் இக்கருத்தை தெரிவித்துள்ளாா்.

எக்ஸ்’ பதிவில் அவா் கூறியுள்ளதாவது: இந்த முடிவு தீபாவளியின் புனிதமான நாளில் மக்களின் உணா்வுகள் மற்றும் பண்டிகை உணா்வை மதிக்கிறது. அதே நேரத்தில் சுற்றுச்சூழல் பாதுகாப்பு குறித்த சமநிலையான அணுகுமுறையையும் பிரதிபலிக்கிறது. தில்லி அர;ஞ் பொதுமக்களின் உணா்வுகளையும் சுத்தமான மற்றும் பசுமையான தில்லியின் தொலைநோக்குப் பாா்வையையும் மதிக்க முழுமையாக உறுதிபூண்டுள்ளது. சுற்றுச்சூழலைப் பாதுகாக்கும் அதே வேளையில் பண்டிகை மகிழ்ச்சி தொடா்வதை உறுதி செய்வதே எங்கள் குறிக்கோள்’ என்று தெரிவித்துள்ளாா்.

பசுமை பட்டாசுகளுடன் பண்டிகை மற்றும் நல்லிணக்கத்தைக் கொண்டாட மக்கள் ஒன்று சேர வேண்டும் என்று அவா் வலியுறுத்தினாா். தில்லி அமைச்சா் கபில் மிஸ்ராவும் இந்த உத்தரவை வரவேற்றாா். பல ஆண்டுகளுக்குப் பிறகு மக்கள் பாரம்பரியமாக தீபாவளி பண்டிகையைக் கொண்டாடுவாா்கள் என்றும் அவா் கூறினாா்.

‘எக்ஸ்’ தளத்தில் இந்தி மொழியில் அவா் வெளியிட்ட ஒரு பதிவில், தில்லியில் அரசு மாற்றத்துடன், இந்து பண்டிகைகளுக்கான தடை முடிவுக்கு வந்துவிட்டது’ என்று தெரிவித்துள்ளாா்.

‘அரசு மாற்றத்துடன், பல ஆண்டுகளுக்குப் பிறகு, தில்லி மக்கள் பாரம்பரிய முறையில் தீபாவளியைக் கொண்டாடுவாா்கள். தீபாவளியன்று பசுமை பட்டாசுகளை அனுமதிக்கும் உச்சநீதிமன்றத்தின் முடிவு வரவேற்கத்தக்கது. நீதிமன்றத்தின் முன் மக்களின் குரலை முன்வைத்ததற்காக முதல்வா் மற்றும் தில்லி அரசுக்கு நன்றி’ என்று கபில் மிஸ்ரா கூறினாா்.

தீபாவளிக்கு தில்லியில் பசுமை பட்டாசுகளை விற்பனை செய்யவும் வெடிக்கவும் உச்சநீதிமன்றம் அனுமதித்தது. மத்திய அரசு மற்றும் தில்லி அரசின் கூட்டு கோரிக்கையை ஏற்று, தலைமை நீதிபதி பி.ஆா். கவாய் மற்றும் நீதிபதி கே. வினோத் சந்திரன் ஆகியோா் அடங்கிய அமா்வு, பசுமை பட்டாசுகள் மீதான தடையை தளா்த்தியது.