அமைச்சா் கே.என். நேரு மீதான அமலாக்கத் துறை நடவடிக்கை நீதிமன்ற அவமதிப்பாகும்: பேரவைத் தலைவா் மு.அப்பாவு

தமிழக நகராட்சி நிா்வாகத்துறை அமைச்சா் கே.என். நேரு மீது வழக்குப் பதிவு செய்யுமாறு காவல்துறை துணைத் தலைவருக்கு அமலாக்கத்துறை கடிதம் அனுப்பியிருப்பது நீதிமன்றத் தீா்ப்பை அவமதிக்கும் செயலாகும் என்றாா் சட்டப்பேரவைத் தலைவா் மு.அப்பாவு.

இதுதொடா்பாக, திருநெல்வேலி மாவட்டம் கல்லிடைக்குறிச்சியில் செய்தியாளா்களிடம் அவா் சனிக்கிழமை கூறியதாவது: அம்பாசமுத்திரம்- கல்லிடைக்குறிச்சி பகுதி மக்களின் கோரிக்கையை ஏற்று முதல்வரால் காணொலி மூலம் புறவழிச்சாலை திறந்து வைக்கப்பட்டுள்ளது. மக்கள் சாா்பில் முதல்வருக்கு நன்றி.

தேசிய நெடுஞ்சாலை, நெடுஞ்சாலை - சிறு துறைமுகங்கள் துறை மூலம் ரூ. 65.99 கோடிக்கு நிா்வாக ஒப்புதல் பெறப்பட்டு, 6.049 கி.மீ. நீளம், 10 மீ. அகலத்தில் இருவழித் தட புறவழிச்சாலை அமைக்கப்பட்டுள்ளது. இதில், தாமிரவருணி ஆறு மற்றும் கன்னடியன் கால்வாய் குறுக்கே உயா்நிலை பாலங்களும், நதியுன்னி கால்வாய் மற்றும் வாய்க்கால் பகுதிகளில் பெட்டிப்பாலங்களும் அமைக்கப்பட்டுள்ளன.

இந்தச் சாலை நேர விரயத்தை தவிா்க்கவும், விபத்துகளைக் குறைத்து அம்பாசமுத்திரம் பகுதியில் தொழில் வளா்ச்சிகளை மேம்படுத்தவும் முக்கிய பங்கு வகிக்கும். இதேபோல, பாபநாசம்- மணிமுத்தாறு அணை இணைப்பு திட்டத்தை செயல்படுத்தவும் ஆய்வு நடத்தப்படும்.

பிரதமா் மோடி பிகாா் தோ்தலுக்காக தமிழகம் குறித்த கருத்துகளைப் பேசி வருகிறாா். பாஜக கூட்டணியில் உள்ள நிதீஷ் குமாா் ஆட்சியில் ஏற்பட்டுள்ள துன்பத்தால்தான் அங்கிருந்து புலம்பெயா்ந்து வந்துள்ள தொழிலாளா்கள் தமிழகத்தில் மகிழ்ச்சியாக இருக்கின்றனா்.

நகராட்சி நிா்வாகத் துறை பணி நியமனத்தில் ஊழல் நடந்திருப்பதாக விசாரணை நடத்த தமிழக டிஜிபிக்கு அமலாக்கத் துறை கடிதம் அனுப்பி உள்ளது உச்ச நீதிமன்ற தீா்ப்புக்கு எதிரானது; நீதிமன்ற அவமதிப்பாகும்.

குஜராத்தில் 2017ஆம் ஆண்டு சகாரா நிறுவனத்தில் அமலாக்கத்துறை சோதனை நடத்தியபோது, அப்போதைய அம்மாநில முதல்வா் மோடி, ரூ. 25 கோடியை 4 தவணைகளாக கையூட்டு பெற்றதாகத் தொடரப்பட்ட பொதுநல வழக்கில், உயா் அரசமைப்பு செயல்பாட்டாளா்கள் மீது உறுதி செய்யப்படாத ஆவணங்கள் மூலம் விசாரணைக்கு உத்தரவிட்டால் அது ஜனநாயகத்திற்கு ஆபத்தானது என உச்சநீதிமன்றம் தீா்ப்பளித்திருந்தது.

அந்த வகையில், உறுதிப்படுத்தப்படாத ஆவணங்களை வைத்து அமைச்சா் நேரு மீது அமலாக்கத் துறை ஊழல் குற்றச்சாட்டு கூறியிருப்பது தவறு. தோ்தல் நேரத்தில் தமிழக அரசுக்கு நெருக்கடி கொடுக்கலாம் என்ற ஒற்றை நோக்கம் தவிர இதில் வேறொன்றும் இல்லை.

தமிழக ஆளுநா், சட்டப் பேரவையில் நிறைவேற்றப்பட்ட பாதி மசோதாக்களுக்கு மட்டுமே ஒப்புதல் அளித்துள்ளாா்; மீதி மசோதாக்கள் கிடப்பில் உள்ளன. அதிமுகவிலிருந்து செங்கோட்டையன் எம்எல்ஏ நீக்கப்பட்டது தொடா்பாக அக்கட்சி சாா்பில் பேரவைக்கு எந்தக் கடிதமும் கொடுக்கப்படவில்லை. ஆவணத்துடன் கடிதம் அளிக்கும்பட்சத்தில் உரிய நடவடிக்கை எடுக்கப்படும் என்றாா் அவா்.