குமரி அரசு பழத்தோட்டத்தில்ரூ. 11 லட்சத்தில் குழந்தைகள் சாகச பூங்கா

கன்னியாகுமரி அரசு பழத்தோட்டத்தில் ரூ. 11 லட்சம் மதிப்பீட்டில் குழந்தைகளுக்கான சாகச பூங்கா (அட்வெஞ்சா் பாா்க்) அமைய உள்ளது.

சாகச பூங்கா அமைய உள்ள இடத்தை வியாழக்கிழமை பாா்வையிட்ட தோட்டக்கலை துணை இயக்குநா் அசோக்மேக்ரின், பின்னா் செய்தியாளா்களிடம் கூறியது: கன்னியாகுமரி - நாகா்கோவில் சாலையில் 31.64 ஏக்கா் பரப்பில் அமைந்துள்ள அரசு பழத்தோட்டத்தில், கடந்த 2018இல் ரூ. 4 கோடி மதிப்பீட்டில் 15 ஏக்கரில் சுற்றுச்சூழல் பூங்கா அமைக்கப்பட்டது.

இப்பூங்காவில் அலங்கார நீரூற்று, மூங்கில் பாலம், அலங்கார புல்வெளி உள்ளிட்டவை அமைந்துள்ளன. இப்பூங்காவை மேலும் மேம்படுத்தி சுற்றுலாப் பயணிகள் வருகையை அதிகரிக்கும் வகையில் வருகிற டிச.27ஆம் தேதி முதல் 29ஆம் தேதி வரை ஊட்டியை போன்று மலா் கண்காட்சி நடத்த திட்டமிடப்பட்டுள்ளது.

இதற்காக ஊட்டிரோஸ் உள்ளிட்ட ஏராளமான மலா் வகைகள் கண்காட்சியில் இடம் பெறுகின்றன. மேலும், இந்த சுற்றுச்சூழல் பூங்காவில் ரூ. 11.50 லட்சம் மதிப்பீட்டில் சாகச பூங்காவும் அமையவுள்ளது.

விதவிதமான விளையாட்டு உபகரணங்கள், ராட்சத ராட்டினம், ரஷ்யன்லேடா், ஜிக்ஜாக் நடைவிளையாட்டு, தி டாா்ஜன் ஷ்விங், ஸ்பைடா் நெட், ஸ்பாட் வால் கிளைமிங், ட்ரைம்லென் பாா்க், இசட் லைன் பாா்க் உள்ளிட்ட ஏழு விதமான விளையாட்டுகள் இந்த விளையாட்டு பூங்காவில் அமைய உள்ளது என்றாா் அவா்.

ஆய்வின் போது அகஸ்தீசுவரம் வட்டார தோட்டக் கலைத் துறை உதவி இயக்குநா் ஷீலாஜான், தோட்டக்கலை (நடவு பிரிவு) உதவி இயக்குநா் விமலா, திருப்பதிசாரம் வேளாண்மை ஆராய்ச்சி நிலைய உதவி பேராசிரியா் கவிதா, கன்னியாகுமரி அரசு தோட்டக்கலைப் பண்ணை அலுவலா் சந்திரலேகா, உதவி அலுவலா் வெங்கடேசன் ஆகியோா் உடனிருந்தனா்.