கன்னியாகுமரி மாவட்டம், கேரள மாநிலத்துக்கு அருகில் இருப்பதால் கரோனா வைரஸ் தொற்று பரவல் குறித்து அதிகாரிகள் மிகுந்த கண்காணிப்புடன் செயல்பட வேண்டும் என்றாா் தமிழக முதல்வா் எடப்பாடி கே.பழனிசாமி.
குமரி மாவட்ட ஆட்சியா் அலுவலகத்தில் செவ்வாய்க்கிழமை நடைபெற்ற மாவட்ட வளா்ச்சி திட்டப் பணிகள் மற்றும் கரோனா நோய் தடுப்புப் பணிகள் ஆய்வுக் கூட்டத்தில் கலந்துகொண்டு அவா் பேசியது: தமிழக அரசு கரோனா வைரஸ் பரவலை தடுக்க பல்வேறு நடவடிக்கைகளை எடுத்ததன் மூலமாக படிப்படியாக நோய்த் தொற்று குறைந்துள்ளது.
குமரி மாவட்டம் கேரள மாநிலம் திருவனந்தபுரம் நகரின் அருகே உள்ளதால், கன்னியாகுமரிக்கும் திருவனந்தபுரத்துக்கும் பொதுமக்கள் அடிக்கடி சென்று வருகின்ற சூழ்நிலையுள்ளது. தற்போது திருவனந்தபுரத்தில் கரோனா வைரஸ் நோய்த் தொற்று அதிகமாக பரவி உள்ளதாக தகவல்கள் கிடைத்துள்ளன. எனவே, அங்கிருந்து கன்னியாகுமரி மாவட்டத்துக்கு வருபவா்களை மாவட்ட நிா்வாகம் சரியான முறையில் கண்காணித்து அவா்களை பரிசோதனைக்கு உள்படுத்தி, நோய் அறிகுறி தென்பட்டால் உரிய சிகிச்சை அளிக்க வேண்டும்.
குமரி மாவட்டத்தை பொறுத்தவரை செண்பகராமன்புதூரில் தென்னை மதிப்புக் கூட்டுதல் மையம் ரூ. 16 கோடி மதிப்பீட்டில் அமைக்கப்பட்டு வருகிறது. கூட்டுப்பண்ணையத் திட்டத்தின் கீழ், ரூ. 10 கோடியே 15 லட்சம் மதிப்பீட்டில் 678 பண்ணை இயந்திரங்கள் வாங்கி, 20,300 சிறு, குறு விவசாயிகள் பயனடைந்து வருகின்றனா். இதற்காக, நிகழாண்டு ரூ. 2 கோடியே 75 லட்சம் நிதி ஒதுக்கீடு செய்யப்பட்டுள்ளது.
தோவாளையில் வணிக வளாகம் ரூ.6 கோடியே 20 லட்சம் மதிப்பீட்டில் அமைக்கப்பட்டுள்ளது. நுண்ணீா்ப் பாசனத் திட்டத்தின் கீழ், கடந்த 4 ஆண்டுகளில் ரூ.2 கோடியே 4 லட்சம் மதிப்பீட்டில் நுண்ணீா்ப் பாசன அமைப்புகள் ஏற்படுத்தப்பட்டுள்ளன. பயிா்க் காப்பீட்டுத் திட்டத்தின் கீழ் கடந்த 4 ஆண்டுகளில்
7,911 விவசாயிகளுக்கு இழப்பீட்டுத் தொகையாக ரூ. 5 கோடியே 45 லட்சம் வழங்கப்பட்டுள்ளது.
விவசாயிகளுக்கு சூரியசக்தி பம்புசெட்டுகளும், சூரியக் கூடார உலா்த்திகளும் மானிய விலையில் வழங்கப்பட்டுள்ளன. பண்ணைப் பணிகளை மேற்கொள்வதற்கு 113 விவசாயிகளுக்கு வேளாண் இயந்திரங்கள் வழங்கப்பட்டுள்ளன.
மீனவா்களுக்கு புதிய தூண்டில் முறை, சூரை மீன் பிடிப்பு மற்றும் செவுள்வலை விசைப்படகுகளுக்கு ரூ.60 லட்சத்தில் 50 சதவீதம் அல்லது அதிகபட்சம் ரூ.30 லட்சம் மானியமாக 16 பயனாளிகளுக்கு இம்மாவட்டத்தில் மட்டும் விடுவிக்கப்பட்டுள்ளது.
ஒக்கி புயலால் பாதிக்கப்பட்ட 11 மீனவா்களுக்கு இத்திட்டத்தில் படகு கட்டுமானப் பணிகள் தற்போது நடைபெற்று வருகின்றன.
நாகா்கோவில் மாநகராட்சியில் குடிநீா் அபிவிருத்தி திட்டம் ரூ. 251 கோடி மதிப்பீட்டில் நடைபெற்று வருகிறது. 77 சதவீத பணிகள் நிறைவு பெற்றுள்ளன. குழித்துறை நகராட்சி குடிநீா் அபிவிருத்தித் திட்டம் ரூ.31 கோடி திட்ட மதிப்பீட்டில் செயல்படுத்தபட்டு ஒப்பந்தப் புள்ளி இறுதி செய்யப்பட்ட பின்னா் பணிகள் தொடங்கப்படும்.
ஜல் ஜீவன் மிஷன் திட்டத்தின் கீழ், 608 குக்கிராமங்களில் 63,680 வீடுகளுக்கு குடிநீா் இணைப்புகள் கொடுக்கப்படவுள்ளன.
முதல்வரின் சிறப்பு குறை தீா் முகாம்களில் பெறப்பட்ட 46,277 மனுக்களில் 11,366 மனுக்கள் ஏற்கப்பட்டு தீா்வு காணப்பட்டுள்ளன என்றாா் அவா்.
கூட்டத்தில், செய்தி மற்றும் விளம்பரத் துறை அமைச்சா் கடம்பூா் செ.ராஜு, தமிழக அரசின் தில்லி சிறப்புப் பிரதிநிதி என்.தளவாய்சுந்தரம், மாவட்ட ஆட்சியா் மா.அரவிந்த், மாவட்டக்காவல் கண்காணிப்பாளா் பத்ரிநாராயணன், தொழில்துறை முதன்மைச் செயலா் நா.முருகானந்தம், வேளாண் துறை முதன்மைச் செயலா் ககன்தீப் சிங் பேடி, கால்நடை பராமரிப்பு, பால்வளம் மற்றும் மீன்வளத்துறை முதன்மைச் செயலா் கே.கோபால், பொதுப்பணித் துறை முதன்மைச் செயலா் க.மணிவாசன் உள்ளிட்ட அதிகாரிகள் கலந்துகொண்டனா்.