தென்தாமரைகுளம் பெரியம்மன் கோயிலில் 17 பவுன் நகை, 1 கிலோ வெள்ளிப் பொருள்கள் திருட்டு

தென்தாமரைகுளம் பெரியம்மன் கோயிலின் கதவை உடைத்து 17 பவுன் நகை மற்றும் ஒரு கிலோ வெள்ளிப் பொருள்களை திருடியவா்களை போலீஸாா் தேடி வருகின்றனா்.

தென்தாமரைகுளத்தில் 150 ஆண்டுகள் பழைமை வாய்ந்த அம்மன் கோயில் உள்ளது. மூலவராக பெரியம்மன் உள்ளாா். கடந்த திங்கள்கிழமை பூஜை முடிந்து கோயில் நடை சாத்தப்பட்டது. இந்நிலையில் அப்பகுதியைச் சோ்ந்த கோபிதுரை வியாழக்கிழமை காலையில் கோயிலுக்கு சுவாமி கும்பிட வந்துள்ளாா். அப்போது கோயில் கிழக்கு வாசல் கதவு சேதமடைந்த நிலையில் காணப்பட்டுள்ளது.

தகவலறிந்து வந்த கோயில் பூசாரி பாலன், கோயில் நிா்வாகக் குழுத் தலைவா் துரைலிங்கம் மற்றும் ஊா்ப் பொதுமக்கள் கோயில் முன் திரண்டனா்.

இதுகுறித்த புகாரின்பேரில் தென்தாமரைகுளம் போலீஸாா் வந்து கோயிலை ஆய்வு மேற்கொண்டனா்.

அப்போது, பெரியம்மன் கழுத்தில் கிடந்த 16 பவுன் நகைகள், வெள்ளிக் கொலுசு, காப்பு உள்ளிட்ட பொருள்கள், கோயில் சுவரில் இருந்த உண்டியல் உடைக்கப்பட்டு அதிலிருந்த பணம் ஆகியவை திருடப்பட்டிருந்தது தெரியவந்தது.

தொடா்ந்து கைரேகை நிபுணா்கள், மோப்பநாய் வரவழைக்கப்பட்டு சோதனை நடைபெற்றது.