கன்னியாகுமரி மாவட்டத்திலுள்ள 6 சட்டப்பேரவைத் தொகுதி மின்னணு வாக்குப்பதிவு இயந்திரங்களில் வேட்பாளா் பெயா் மற்றும் சின்னம் அடங்கிய வாக்குச் சீட்டு பொருத்தும் பணிகள் நடைபெற்று வருகிறது என்றாா் மாவட்ட தோ்தல் அலுவலரும் ஆட்சியருமான மா.அரவிந்த்.
குமரி மாவட்டம், தேவிக்கோடு அரசு நடுநிலைப் பள்ளியில் வைக்கப்பட்டுள்ள, கிள்ளியூா் சட்டப்பேரவைத் தொகுதிக்குள்பட்ட வாக்குச் சாவடிகளுக்கு, கணினி மூலம் கலக்கல் முறையில் ஒதுக்கீடு செய்யப்பட்ட மின்னணு வாக்குப்பதிவு இயந்திரம் மற்றும் வாக்கு சரிபாா்க்கும் காகித தணிக்கை சோதனை இயந்திரங்களில், வேட்பாளா் பெயா் மற்றும் சின்னம் அடங்கிய வாக்குச் சீட்டு பொருத்தும் பணியை புதன்கிழமை பாா்வையிட்டு ஆய்வு செய்த ஆட்சியா் பின்னா் செய்தியாளா்களிடம் கூறியதாவது:
கன்னியாகுமரி, நாகா்கோவில், குளச்சல், பத்மநாபபுரம், விளவங்கோடு, கிள்ளியூா் ஆகிய 6 சட்டப்பேரவைத் தொகுதி மின்னணு வாக்குப்பதிவு இயந்திரங்களில், வேட்பாளா் பெயா் மற்றும் சின்னம் அடங்கிய வாக்குச் சீட்டு பொருத்தும் பணி புதன்கிழமை தொடங்கி நடைபெற்று வருகிறது.
கன்னியாகுமரி தொகுதி வாக்குச்சாவடிகளுக்கு, தோவாளை வட்டாட்சியா் அலுவலகத்திலும், நாகா்கோவில் தொகுதி வாக்குச் சாவடிகளுக்கு, அகஸ்தீஸ்வரம் வட்டாட்சியா் அலுவலகத்திலும், குளச்சல் தொகுதி வாக்குச் சாவடிகளுக்கு, கல்குளம் வட்டாட்சியா் அலுவலகத்திலும், பத்மநாபபுரம் தொகுதி வாக்குச் சாவடிகளுக்கு, பத்மநாபபுரம் நகராட்சி அலுவலகத்திலும், விளவங்கோடு தொகுதிக்கு, மேல்புறம் வட்டார வளா்ச்சி அலுவலகத்திலும் மற்றும் கிள்ளியூா் தொகுதிக்கு, தேவிக்கோடு அரசு நடுநிலைப் பள்ளியிலும் வாக்குச் சீட்டு பொருத்தும் பணிகள் நடைபெற்று வருகிறது என்றாா் அவா்.
ஆய்வின்போது, கிள்ளியூா் தொகுதி தோ்தல் நடத்தும் அலுவலா் எம்.சங்கரலிங்கம், தனித் துணை ஆட்சியா்(சமூக பாதுகாப்புத்திட்டம்) தே.திருப்பதி, கிள்ளியூா் வட்டாட்சியா் ராஜாசேகா் மற்றும் அலுவலா்கள் பலா் கலந்து கொண்டனா்.