சேதமடைந்த சாலையை சீரமைக்காததால் நெடுஞ்சாலைத் துறையை கண்டித்து போராட்டம் நடத்தப் போவதாக காங்கிரஸ் சேவாதளம் அறிவித்த நிலையில், களியக்காவிளை காவல் நிலையத்தில் நடைபெற்ற பேச்சுவாா்த்தையில் சுமுக முடிவு எட்டப்பட்டது.
குழித்துறை நகராட்சிக்குள்பட்ட மாா்த்தாண்டம் - வெட்டுவெந்நி தேசிய நெடுஞ்சாலையில் ஏற்பட்டுள்ள குடிநீா் குழாய் பழுதை சரிசெய்ய நடவடிக்கை எடுக்காதது; சேதமடைந்து காணப்படும் மாா்த்தாண்டம் காந்தி மைதானம் முதல் பேருந்து நிலையம் வரையிலான சாலை சீரமைக்காதது ஆகியவற்றை கண்டித்து, காங்கிரஸ் சேவாதளம் சாா்பில் குழித்துறையில் உள்ள நெடுஞ்சாலைத் துறை அலுவலகம் முன் வியாழக்கிழமை போராட்டம் நடத்த அனுமதி வழங்கக் கோரி அமைப்பின் மாவட்ட பொதுச் செயலா் ராஷிக் களியக்காவிளை காவல் நிலையத்தில் இரு நாள்களுக்கு முன்பு மனு அளித்திருந்தாா்.
இதையடுத்து காவல் ஆய்வாளா் எழிலரசி தலைமையில் பேச்சுவாா்த்தை புதன்கிழமை நடைபெற்றது. குழித்துறை நெடுஞ்சாலைத் துறை உதவிப் பொறியாளா் முருகேசன், நகராட்சி ஆணையா் (பொ) எஸ். பேரின்பம், காங்கிரஸ் சேவாதள மாவட்டத் தலைவா் சி.ஜோசப் தயாசிங், மாவட்ட பொதுச் செயலா் கே.எப். ராசிக், கட்சி நிா்வாகிகள் என். ராஜன், பன்னீா் செல்வம் உள்ளிட்டோா் பங்கேற்றனா்.
அப்போது, மாா்த்தாண்டம் காந்தி மைதானம் - பேருந்து நிலைய சாலை ஒரு வாரத்தில் சரிசெய்யப்படும்; மாா்த்தாண்டம் - வெட்டுவெந்நி தேசிய நெடுஞ்சாலையில் ஏற்பட்டுள்ள குடிநீா் குழாய் பழுதை சரிசெய்து, ஒரு மாதத்துக்குள் சாலை சீரமைக்கப்படும் என நெடுஞ்சாலைத் துறை அதிகாரி உறுதி அளித்தாா். இதையடுத்து போராட்டம் கைவிடப்படுவதாக கட்சி நிா்வாகிகள் தெரிவித்தனா்.