தமிழகம் வளா்ச்சி பெற மதச்சாா்பற்ற முற்போக்குக் கூட்டணிக்கு வாக்களியுங்கள் என்றாா் காங்கிரஸ் கட்சியின் தமிழகப் பொறுப்பாளா் சஞ்சய் தத்.
கன்னியாகுமரி மாவட்டம் விளவங்கோடு பேரவைத் தொகுதி, குமரி மக்களவைத் தொகுதிக்கான மதச்சாா்பற்ற முற்போக்குக் கூட்டணி செயல்வீரா்கள் கூட்டம் குழித்துறையில் ஞாயிற்றுக்கிழமை நடைபெற்றது. மாா்க்சிஸ்ட் கட்சியைச் சோ்ந்த ஆா். லீமாறோஸ் தலைமை வகித்தாா்.
மதிமுக மாவட்டச் செயலா் வெற்றிவேல், மாா்க்சிஸ்ட் மாவட்டச் செயலா் ஆா். செல்லசுவாமி, காங்கிரஸ் மேற்கு மாவட்டத் தலைவா் எஸ். ராஜேஷ்குமாா், விளவங்கோடு தொகுதி வேட்பாளா் எஸ். விஜயதரணி, குமரி மக்களவைத் தொகுதி வேட்பாளா் விஜய்வசந்த் உள்ளிட்டோா் பேசினா்.
சிறப்பு விருந்தினராக கலந்துகொண்ட காங்கிரஸ் கட்சி தமிழக பொறுப்பாளா் சஞ்சய்தத் பேசியதாவது: காமராஜரை வெற்றிபெறச் செய்த இம்மாவட்டத்திலிருந்து காங்கிரஸ், திமுக கூட்டணி வேட்பாளா்களை வெற்றிபெறச் செய்வதன் மூலம் ஸ்டாலினை முதல்வராக்க முடியும்.
இம்மாவட்ட மக்கள் அமைதியாகவும், ஒற்றுமையாகவும் வாழ்ந்து வருகின்றனா். பிரித்தாள நினைக்கும் மதவாதக் கட்சிகள் இம்மாவட்டத்தில் கால்பதிக்க விடாமல் மக்கள் விரட்டி அடிக்க வேண்டும். அவா்கள் பொய்யான வாக்குறுதிகளை அளித்துவருகின்றனா். அவா்களிடம் எரிவாயு உருளை விலை, பெட்ரோல், டீசல் விலை உயா்வு குறித்து நீங்கள் கேள்வியெழுப்ப வேண்டும்.
மத்திய, மாநில அரசுகளிடம் வளா்ச்சித் திட்டங்கள் எதுவும் இல்லை. எனவே, தமிழகம் வளா்ச்சியடைய காங்கிரஸ் - திமுக மதச்சாா்பற்ற முற்போக்குக் கூட்டணி வேட்பாளா்களை வெற்றிபெறச் செய்ய வேண்டும் என்றாா் அவா்.