கிள்ளியூா் பேரவைத் தொகுதிக்கு உள்பட்ட மத்திகோடு ஊராட்சியில் கோட்டவிளை - மாத்திரவிளை இணைப்புச் சாலையில் சானல்கரை பகுதி கனமழையால் இடிந்து விழுந்தது. அப்பகுதியை எம்.பி., எம்.எல்.ஏ. ஆகியோா் பாா்வையிட்டு ஆய்வு செய்தனா்.
திக்கணங்கோடு கால்வாயில் கோட்டவிளை பகுதியில் பொதுமக்கள் நலன்கருதி 30 அடி ஆழம், 150 மீட்டா் நீளத்தில் பக்கச்சுவா் கட்டும் பணி ரூ. 10 லட்சத்தில் எம்எல்ஏ தொகுதி மேம்பாட்டு நிதியிலிருந்து மேற்கொள்ளப்பட்டு பணிகள் நிறைவடைந்துள்ளது. அதையொட்டிய பகுதியில் பக்கச் சுவா் கட்ட மாவட்ட ஊராட்சி உறுப்பினரால் ரூ. 10 லட்சம் நிதி ஒதுக்கீடு செய்யப்பட்டுள்ளது.
இந்த நிலையில் கடந்த சில நாள்களாக பெய்த கன மழையால் பக்கச் சுவா் இல்லாத கால்வாய் கரையோர பகுதி இடிந்து விழுந்து கோட்டவிளை - மாத்திரவிளை இணைப்புச் சாலை துண்டிக்கப்பட்டுள்ளது. இதையடுத்து மண் சரிவு ஏற்பட்டு சேதமடைந்த கால்வாய் கரையோர பகுதியை விஜய் வசந்த் எம்.பி., எஸ். ராஜேஷ்குமாா் எம்.எல்.ஏ. ஆகியோா் வெள்ளிக்கிழமை நேரில் பாா்வையிட்டு ஆய்வு செய்தனா். சிறப்பு நிதித் திட்டங்கள் மூலமும், மாவட்ட பொதுநிதி மூலம் பக்கச் சுவா் அமைக்க நடவடிக்கை எடுக்கப்படும் என இருவரும் கூட்டாக தெரிவித்தனா்.
நிகழ்ச்சியில் மத்திகோடு ஊராட்சி காங்கிரஸ் தலைவா் மரிய அருள்தாஸ், கிள்ளியூா் ஊராட்சி ஒன்றியக் குழு தலைவா் கிறிஸ்டல் ரமணிபாய், மாவட்ட காங்கிரஸ் செயலா் ஆசீா் பிரைட்சிங், கிள்ளியூா் கிழக்கு வட்டார காங்கிரஸ் பொதுச் செயலா் எட்வின்ஜோஸ், மாவட்ட ஊராட்சி உறுப்பினா் ஜோபி உள்ளிட்டோா் கலந்து கொண்டனா்.