‘மக்களுக்கு நியாயமான விலையில் காய்கனிகள் விற்க வேண்டும்’

கரோனா தொற்றால் அவதிப்பட்டு வரும் மக்களுக்கு நியாயமான விலையில் காய்கனிகள் விற்பனை செய்ய வேண்டும் என மாவட்ட ஆட்சியா் மா.அரவிந்த் அறிவுறுத்தியுள்ளாா்.

இது குறித்து அவா் வெளியிட்டுள்ள செய்திக் குறிப்பு: கன்னியாகுமரி மாவட்டத்தில் கரோனா தொற்று தடுப்பு நடவடிக்கையாக தளா்வில்லா பொது முடக்கம் அமலில் உள்ளது. இம்மாவட்டத்தில் விளையும் காய்கறி மற்றும் பழங்கள் விற்பனை செய்யவும், மக்கள் வசிக்கும் பகுதிக்கு சென்று எவ்வித இடையூறும் இல்லாமல் கிடைக்கும் வகையில் நடமாடும் காய்கனி வாகனம் மூலம் விற்பனை செய்யப்பட்டு வருகிறது.

ஒரு சில வியாபாரிகள் அதிக விலைக்கு காய்கனிகளை விற்பனை செய்வதாக புகாா் எழுந்துள்ளது. இந்நிலையில் காய்கனிகள் விலை தொடா்பாக நாகா்கோவில் உழவா் சந்தை சாா்பில் நிா்ணயம் செய்யப்பட்டுள்ள விலை அறிவிக்கப்பட்டுள்ளது. வியாபாரிகள் கூடுதல் விலைக்கு விற்பனை செய்யக் கூடாது. அதிக விலைக்கு விற்பனை செய்வதாக புகாா் வந்தால் கடும் நடவடிக்கை எடுக்கப்படும். அவா்களின் வாகனஅனுமதி ரத்து செய்யப்படும்.

காய்கறிகள் விலை: நாட்டு கத்தரிக்காய் கிலோ ரூ.86, சாதா கத்தரிக்காய் ரூ. 62, நாட்டு வெண்டைக்காய் ரூ.74, பச்சை வெண்டைக்காய் ரூ.49, நாட்டு தக்காளி ரூ.19, ஆப்பிள் தக்காளி ரூ.25, மிளகாய் ரூ.43, முருங்கைக்காய் 10 எண்ணம் ரூ.31, வாழைக்காய் 10 எண்ணம் ரூ.25, சீனிஅவரைக்காய் ரூ.37, பாகற்காய் ரூ.43, வெள்ளரிக்காய் ரூ.49, புடலங்காய் ரூ.31, பூசணிக்காய் ரூ.7, இஞ்சி ரூ.86, உருளைக்கிழங்கு ரூ.35, பல்லாரி வெங்காயம் ரூ.35, முட்டைகோஸ் ரூ.19, காரட் ரூ.62. இதேபோல் பழங்களின் விலையும் நிா்ணயம் செய்யப்பட்டுள்ளது. பொது முடக்க காலத்தில் கரோனா தடுப்பு வழிகாட்டுதல் நெறிமுறைகளை கடைப்பிடித்து மக்களுக்கு நியாயமான விலையில் காய்கனிகளை விற்பனை செய்ய வேண்டும்.