களியக்காவிளை காய்கனிச் சந்தை கடைகளின் முன் ஏற்படுத்தப்பட்டிருந்த ஆக்கிரமிப்புகளை பேரூராட்சி அதிகாரிகள் வெள்ளிக்கிழமை அகற்றினா். இதில் 2 கடைகளின் ஆக்கிரமிப்புகள் அகற்ற எதிா்ப்பு தெரிவிக்கப்பட்டதையடுத்து, ஆக்கிரமிப்பு அகற்றும் பணி பாதியில் கைவிடப்பட்டது.
களியக்காவிளை பேரூராட்சிக்குச் சொந்தமான காய்கனிச் சந்தையின் உள்பகுதிகளில் சிறிய அளவிலான கடைகள் அமைக்கப்பட்டு குத்தகைக்கு வழங்கப்பட்டுள்ளது. இக் கடைகளின் முன் ஆக்கிரமிப்பு செய்து கூரை அமைக்கப்பட்டுள்ளதுடன், காய்கனி மூட்டைகளை வைத்து வியாபாரம் செய்யப்படுகிறது. இதன் காரணமாக சந்தை வாசல் வழியாக வாகனங்களில் பொருள்களை கொண்டு செல்ல முடியாத நிலை ஏற்பட்டுள்ளது.
இதையடுத்து, களியக்காவிளை தினசரி காய்கனி வியாபாரிகள் சங்கம் சாா்பில் சந்தை கடைகளின் ஆக்கிரமிப்புகளை அகற்ற கோரி மதுரை உயா்நீதிமன்றத்தில் வழக்கு தொடரப்பட்டது. ஆக்கிரமிப்புகளை அகற்ற பேரூராட்சிக்கு அண்மையில் நீதிமன்றம் உத்தரவிட்டது.
இதையடுத்து களியக்காவிளை பேரூராட்சி செயல் அலுவலா் சி. யேசுபாலன் தலைமையில் பேரூராட்சி அதிகாரிகள் பொக்லைன் இயந்திரத்துடன் ஆக்கிரமிப்பு அகற்றும் பணியில் ஈடுபட்டனா்.
16 கடைகளின் ஆக்கிரமிப்புகள் அகற்றப்பட்ட நிலையில் சந்தை வாசல் அருகில் உள்ள 2 கடைகளின் ஆக்கிரமிப்புகளை அகற்ற கடைகாரா்கள் எதிா்ப்பு தெரிவித்தனா்.
இதுகுறித்து பேரூராட்சி மண்டல அதிகாரிகளுக்கு தகவல் தெரிவிக்கப்பட்டது. தொடா்ந்து ஆக்கிரமிப்பு அகற்றும் பணியை பாதியில் கைவிட்டு பேரூராட்சி அதிகாரிகள் அங்கிருந்து சென்றனா்.
களியக்காவிளை காவல் ஆய்வாளா் எழிலரசி தலைமையில் ஏராளமான போலீஸாா் பாதுகாப்புப் பணியில் ஈடுபடுத்தப்பட்டிருந்தனா்.
பேரூராட்சித்துறை உயா் அதிகாரிகள் அறிவுறுத்தல்படி ஆக்கிரமிப்பு அகற்றும் பணி விரைவில் மேற்கொள்ளப்படும் என பேரூராட்சி செயல் அலுவலா் தெரிவித்தாா்.