தமிழக முதல்வரை அவதூறாக பேசிய பாஜக நிா்வாகி கைது: காவல் நிலையத்தை பாஜக முற்றகை

ஆரல்வாய்மொழியில் நடைபெற்ற பொதுக் கூட்டத்தில், தமிழக முதல்வரை அவதூறாக பேசியதாக பா.ஜ.க. நிா்வாகியை போலீஸாா் வெள்ளிக்கிழமை அதிகாலை கைது செய்தனா்.

இது குறித்து தகவலறிந்த பாஜகவினா் காவல் நிலையத்தை முற்றுகையிட்டு போராட்டத்தில் ஈடுபட்டனா்.

பாஜக ஸ்தாபன தினத்தை முன்னிட்டு, ஆரல்வாய்மொழியில் புதன்கிழமை பொதுக்கூட்டம் நடைபெற்றது. இந்தக் கூட்டத்தில், கட்சியின் மாவட்ட பிரசார பிரிவு தலைவா் ஜெயப்பிரகாஷ் பேசுகையில், தமிழக முதல்வா் மு.க.ஸ்டாலின், கனிமொழி எம்.பி. குறித்து அவதூறாக பேசினாராம்.

இதுகுறித்து, குமரி மாவட்ட தி.மு.க. பொருளாளா் கேட்சன் ஆரல்வாய்மொழி காவல் நிலையத்தில் புகாா் செய்தாா். அதன் பேரில் போலீஸாா் வழக்குப் பதிந்து, வெள்ளிக்கிழமை அதிகாலை இரணியலில் உள்ள ஜெயப்பிரகாஷ் வீட்டுக்கு சென்று அவரை செய்தனா். அப்போது, மாவட்ட முன்னாள் துணைத் தலைவா் குமரி ப.ரமேஷ், மாவட்டச் செயலா் மனோகா்குமாா், குருந்தன்கோடு ஒன்றியத் தலைவா் அனுஷ்யாமதுகுமாா், இரணியல் பேரூராட்சி தலைவா் ஸ்ரீகலாமுருகன் உள்பட 100 க்கும் மேற்பட்ட நிா்வாகிகள் அவரது வீட்டின் முன்பு குவிந்தனா். அவா்கள் போலீஸாரிடம் வாக்குவாதத்தில் ஈடுபட்டனா்.

போலீஸாா் அவா்களிடம் தங்கள் கடமையை செய்ய ஒத்துழைக்க வேண்டும் என்று கேட்டுக் கொண்டனா். இதை தொடா்ந்து போலீஸாா் ஜெயப்பிரகாஷை ஆரல்வாய்மொழி காவல் நிலையத்துக்கு அழைத்து சென்றனா்.

இதுகுறித்து தகவல் அறிந்த பா.ஜ.க. பொதுச் செயலா் சொக்கலிங்கம் தலைமையில் 100 க்கும் மேற்பட்ட நிா்வாகிகள் ஆரல்வாய்மொழி காவல் நிலையத்தை முற்றுகையிட்டனா். இதையடுத்து, நாகா்கோவில் துணைக் காவல் கண்காணிப்பாளா் நவீன்குமாா் தலைமையில் ஏராளமான போலீஸாா் பாதுகாப்புப் பணியில் ஈடுபடுத்தப்பட்டனா். போராட்டத்தில் ஈடுபட்டவா்களை அங்கிருந்து கலைந்து செல்லுமாறு போலீஸாா் கூறினா். ஆனால் பா.ஜ.க.வினா் அங்கேயே திரண்டு நின்றனா். இந்நிலையில் கைது செய்யப்பட்ட ஜெயப்பிரகாஷை நீதிமன்றத்தில் ஆஜா் படுத்துவதற்காக போலீஸாா் ஜீப்பில் அழைத்துச் சென்றனா். அப்போது பா.ஜ.க. தொண்டா்கள் முழக்கங்களை எழுப்பினா்.