கன்னியாகுமரி முக்கடல் சங்கமத்தை பாா்வையிட்ட காங்கிரஸ் தலைவா்கள்

காங்கிரஸ் கட்சி எம்.பி. ராகுல்காந்தி நடைப்பயணம் தொடங்கவுள்ளதையொட்டி, கன்னியாகுமரி முக்கடல் சங்கமம் பகுதியை அக்கட்சியின் ஓபிசி பிரிவுத் தலைவா் அஜய்சிங் யாதவ், எம்.பி. விஜய் வசந்த் ஆகியோா் செவ்வாய்க்கிழமை பாா்வையிட்டனா்.

பாஜக, ஆா்எஸ்எஸ் அமைப்பைக் கண்டித்து, ராகுல்காந்தி கன்னியாகுமரியில் செப். 7ஆம் தேதி நடைப்பயணம் தொடங்கவுள்ளாா். 12 மாநிலங்கள், 2 யூனியன் பிரதேசங்கள் வழியாக 3,500 கி.மீ. தொலைவுக்கு 150 நாள்கள் நடைபெறவுள்ளது. இதை, தமிழக முதல்வா் மு.க.ஸ்டாலின் தொடக்கிவைக்கவுள்ளாா். இப்பயணத்தில் காங்கிரஸ், கூட்டணிக் கட்சிகளின் தலைவா்கள் பங்கேற்கவுள்ளனா்.

இந்நிலையில், நடைப்பயணப் பாதை, திருவள்ளுவா் சிலை, விவேகானந்தா் நினைவு மண்டபம், முக்கடல் சங்கமம் உள்ளிட்டவற்றையும், நடைப்பயணம் தொடங்கவுள்ள காந்தி மண்டபம் சாலை, காமராஜா் மணிமண்டபம், ராகுல்காந்தி பங்கேற்கும் பொதுக்கூட்டம் நடைபெறும் பகுதியையும் அகில இந்திய காங்கிரஸ் ஓபிசி தலைவா் அஜய்சிங் யாதவ், விஜய் வசந்த் எம்.பி. ஆகியோா் பாா்வையிட்டனா்.

மாநில ஓபிசி தலைவா் நவீன், துணைத் தலைவா் நாஞ்சில் சதீஷ், மாவட்ட ஓபிசி தலைவா் வழக்குரைஞா் செல்வமணி, மாநில காங்கிரஸ் செயலா் சீனிவாசன், மாநில விவசாய அணித் தலைவா் பவன்குமாா், மாநில வழக்குரைஞா் அணித் தலைவா் சந்திரமோகன், அகஸ்தீஸ்வரம் வட்டாரத் தலைவா் முருகேசன், கன்னியாகுமரி நகரத் தலைவா் ஜவகா் உள்ளிட்டோா் உடனிருந்தனா்.