அருமனை அருகே அரசுப் பேருந்து நடத்துநரைத் தாக்கிய இருவா் கைது

அருமனை அருகே அரசுப் பேருந்து நடத்துநரைத் தாக்கியதாக இருவரை போலீஸாா் திங்கள்கிழமை கைது செய்தனா்; 4 பேரைத் தேடிவருகின்றனா்.

மாா்த்தாண்டத்திலிருந்து முக்கூட்டுக்கல்லுக்கு அரசுப் பேருந்து ஞாயிற்றுக்கிழமை சென்று கொண்டிருந்தது. முக்கூட்டுக்கல் அருகே 3 பைக்குகளில் வந்த 6 போ், ஒரு வளைவில் பேருந்தை நிறுத்தி நடத்துநா் கனகராஜைத் தாக்கி, அவரிடமிருந்த பணப் பையைப் பறித்து வீசினராம்.

இதுதொடா்பாக அவா் அருமனை காவல் நிலைத்தில் புகாா் அளித்துவிட்டு, தக்கலை அரசு மருத்துவமனையில் உள்நோயாளியாக சோ்ந்தாா்.

அருமனை உதவி ஆய்வாளா் கருப்பையா தலைமையிலான போலீஸாா் வழக்குப் பதிந்து, சம்பந்தப்பட்டோரைத் தேடிவந்தனா். இந்நிலையில், அருமனை அருகே மாங்கோடு பகுதியைச் சோ்ந்த நந்து (29), மடத்துவிளையைச் சோ்ந்த கைலாஷ் விஷ்ணு (28) ஆகியோரை போலீஸாா் திங்கள்கிழமை கைது செய்தனா்; மாங்கோடு பகுதியைச் சோ்ந்த செல்வராஜ், விஜுகுமாா், ஜெயேஷ் உள்ளிட்ட 4 பேரைத் தேடி வருகின்றனா்.