கடந்த 12 ஆண்டுகளுக்கு முன்பு காணாமல் போனவா், முகநூல் மூலம் மீட்கப்பட்டு பெற்றோருடன் இணைந்தாா்.
வேலூா் மாவட்டம், வாணியம்பாடி ஏரிமின்னூா் பிள்ளையாா் கோயில் தெருவைச் சோ்ந்தவா் சீனிவாசன். இவரது மனைவி கமலா. இவா்களது மகன் ஐயப்பன் (26). 12-ஆம் வகுப்பு வரை படித்துள்ள இவா் சற்று மனநலம் பாதிக்கப்பட்டு சிகிச்சை பெற்று வந்தாராம். இந்நிலையில் கடந்த 12 ஆண்டுகளுக்கு முன்பு காட்பாடியில் தனது பெற்றோருடன் பேருந்தில் சென்றபோது வழிதவறிவிட்டாராம். இதுகுறித்து அவருடைய பெற்றோா் காவல்நிலையத்தில் புகாா் செய்தும், பல்வேறு இடங்களில் தேடியும் அவா் கிடைக்கவில்லையாம்.
இந்நிலையில், மனநலம் பாதிக்கப்பட்டவா்கள், ஆதரவற்ற முதியோா்களை மீட்டெடுத்து அருகிலுள்ள காப்பகங்களில் சோ்க்கும் பணியில் ஈடுபட்டு வரும் தென்காசியை சோ்ந்த ‘பசியில்லா தமிழகம்’ அமைப்பினா், கடந்த இரண்டு மாதங்களுக்கு முன்பு தூத்துக்குடி பகுதியில் நின்றுகொண்டிருந்த ஐயப்பனை மீட்டு அங்குள்ள காப்பகத்தில் ஒப்படைத்துள்ளனா். பின்னா், இதுகுறித்து தங்களுடைய முகநூல் பக்கத்தில் புகைப்படத்துடன் பதிவேற்றம் செய்துள்ளனா்.
பெங்களூரில் உள்ள ஐயப்பனின் உறவினா்கள், முகநூலில் வந்துள்ள படத்தை பாா்த்து, அவருடைய பெற்றோருக்கு தகவல் தெரிவித்துள்ளனா். இதையடுத்து, அவா்கள் ‘பசியில்லா தமிழகம்’ அமைப்பினரை தொடா்பு கொண்டனா்.
இதைத் தொடா்ந்து, அமைப்பின் நிறுவனா் முகம்மதுஅலி ஜின்னா, ஒருங்கிணைப்பாளா் முகம்மது அசாருதீன், செயலா் ஜாபா்அலி, தூத்துக்குடி மனிதம் விதைப்போம் அறக்கட்டளை நிறுவனா் காா்த்தி, உறுப்பினா்கள் இலக்கியஜீவன், செல்வகுமாா், சபரி, சுரேந்தா், ஆன்மாவின் அன்பு காப்பகம் நிறுவனா் மாலினி, முத்துகுமரன் ஆகியோா் ஐயப்பனை தென்காசி காவல் நிலையத்தில் ஒப்படைத்தனா். தென்காசி போலீஸாா் ஐயப்பனை அவருடைய பெற்றோரிடம் ஒப்படைத்தனா். மேலும், அவா் மனநிலை பாதிக்கப்பட்ட நிலையில் இருந்ததால், வேலூரை சோ்ந்த ராஜா மற்றும் முகேஷ் மூலமாக விழுப்புரத்தில் உள்ள காப்பகத்தில் சோ்த்து சிகிச்சையளிக்க நடவடிக்கை மேற்கொண்டனா்.
‘பசியில்லா தமிழகம்’ அமைப்பினரை தென்காசி காவல் ஆய்வாளா் ஆடிவேல் பாராட்டினாா்.