செங்கோட்டையில் தாயை அடித்து கொலை செய்துவிட்டு தலைமறைவான மகனை போலீஸாா் தேடி வருகின்றனா்.
தென்காசி மாவட்டம் செங்கோட்டை குளத்து முக்கு பகுதியில் வசித்து வருபவா் இசக்கியம்மாள் (70). இவரது கணவா் இறந்து விட்டாா்.
இந்நிலையில் செவ்வாய்க்கிழமை காலை இவரது இளைய மகன் மாரியப்பன், வீட்டில் பணம் வைத்திருந்ததாக கூறப்படுகிறது. அந்த பணத்தை செலவுக்காக இசக்கியம்மாள் எடுத்துள்ளாா்.
இந்நிலையில் தன் தாயிடம் சென்று அந்த பணம் குறித்து கேட்டபோது, அவா் செலவு செய்துவிட்டதாக கூறியுள்ளாா். இதனால் ஆத்திரமடைந்த மாரியப்பன், இசக்கியம்மாள் தலையில் கட்டையால் அடித்துவிட்டு தப்பியோடிவிட்டாராம். இதில் பலத்த காயமடைந்த இசக்கியம்மாள் சம்பவ இடத்திலேயே உயிரிழந்தாா்.
தகவலறிந்து வந்த செங்கோட்டை போலீஸாா் சடலத்தை கைப்பற்றி, செங்கோட்டை அரசு மருத்துவமனைக்கு உடற்கூறு ஆய்வுக்கு அனுப்பி வைத்தனா். மேலும் இதுகுறித்து வழக்குப் பதிந்து, தப்பியோடிய மாரியப்பனை தேடி வருகின்றனா்.
