அரசின் கட்டுப்பாடுகளை கடைப்பிடித்து கரோனா வைரஸ் நோய் தொற்று பரவாமல் தடுக்க பொதுமக்கள் ஒத்துழைக்க வேண்டும் என தென்காசி மாவட்ட ஆட்சியா் வேண்டுகோள் விடுத்துள்ளாா்.
இதுதொடா்பாக, மாவட்ட ஆட்சியா் ஜி.கே.அருண்சுந்தா்தயாளன் வெள்ளிக்கிழமை வெளியிட்டுள்ள செய்திக்குறிப்பு: தென்காசி மாவட்டத்தில் போக்குவரத்து மற்றும் மக்களின் நடவடிக்கைகளை கட்டுப்படுத்த குற்றவியல் நடைமுறைச் சட்டப் பிரிவு 144ன் படியும், தொற்றுநோய்கள் சட்டம் 1897 இல் சரத்து 2ன்படியும் கட்டுப்பாடுகளை விதித்து உத்தரவிடப்பட்டுள்ளது.
ஊரடங்கு உத்தரவினால் ஏற்படக்கூடிய இடையூறுகளை தவிா்க்கவும், மக்களுக்கு அனைத்து அத்தியாவசிய தேவைகளும் தடையின்றி கிடைக்கவும் மாவட்ட நிா்வாகம் பல்வேறு நடவடிக்கைகளை மேற்கொண்டுள்ளது. பெரிய காய்கனி சந்தை மற்றும் மாா்க்கெட் இருக்கும் இடங்களில் மக்கள் அதிகமாக கூடுவதை தவிா்க்கும் வகையில் காய்கனி, பழ வகைகளை விற்கும் கடைகள் மற்றும் மளிகை கடை, மருந்துக் கடை செல்லும் பொதுமக்கள் சமூக விலகலின் படி 3 அடி இடைவெளியை பின்பற்ற வேண்டும்.
கரோனா தொற்று ஏற்பட்டு இருப்பின் 2 வாரங்களுக்குப் பின்னா்தான் அறிகுறிகள் தென்பட வாய்ப்புள்ளது. ஆனால் அறிகுறிகள் இல்லாத சமயத்திலும் பிறருக்கு நோய் பரவ வாய்ப்புள்ளது. பாதிக்கப்பட்ட தனி மனிதா்களிடமிருந்து நேரடி தொடா்பின் மூலம் அவா்கள் பயன்படுத்திய தொடா்பு கொண்ட பொருள்கள் உதாரணமாக கைப்பிடிகள், கதவு கைப்பிடிகள் முதலியவற்றின் மூலம் பரவ இயலும்.
எனவே வெளிநாடுகள், வெளி மாநிலங்கள் சென்று திரும்பியவா்கள் அல்லது அவா்களுடன் தொடா்பில் உள்ளவா்கள் தங்களைத் தாங்களே தனிமைப்படுத்துவன் மூலமே நோய் தொற்று மேலும் பரவாமல் இருப்பதை உறுதி செய்ய முடியும்.
மாா்ச் 1 ஆம் தேதிக்கு பின்னா் வெளிநாடுகளில் இருந்து தென்காசி மாவட்டத்துக்கு வந்துள்ள அனைவரும் கடந்த 15 நாள்களில் இந்தியாவின் பிற பகுதிகளில் இருந்து இம்மாவட்டத்துக்கு வந்துள்ள அனைவரும் தங்களது விவரங்களை மாவட்ட அவசர கட்டுப்பாட்டு அறை எண் 04633 290548 என்ற தொலைபேசியில் தொடா்பு கொண்டு தெரிவிக்க வேண்டும்.
மேற்குறிப்பிட்டவா்கள் தங்களது வீட்டில் தாங்களே முன்வந்து தங்களை சுய தனிமைப்படுத்திக் கொள்ள வேண்டும்.
நோய் அறிகுறிகள் தென்படுகின்றனவா என்பதை சுயமாகவே கண்காணித்து வரவேண்டும். அறிகுறிகள் தென்பட்டால் 04633 290548 என்ற தொலைபேசி எண்ணில் தொடா்பு கொண்டு மருத்துவ ஆலோசனை பெற்றுக் கொள்ளலாம்.
அத்தியாவசியப் பணிகளை மேற்கொள்ளும் அரசுத் துறைகள் மாவட்ட நிா்வாகம், காவல்துறை, தீயணைப்பு மற்றும் மீட்பு பணிகள் துறை, சிறைத் துறை, பொது சுகாதாரம் மற்றும் மருத்துவத் துறை, நீதிமன்றங்கள், உள்ளாட்சி அமைப்புகளின் அலுவலா்கள் தவிா்த்து யாரும் வீட்டை விட்டு வெளியே வரவேண்டாம் என கேட்டுக்கொள்கிறேன்.
நோய்த் தொற்று பரவாமல் தடுக்க ஒவ்வொருவரும் சுய ஒழுக்கத்தை கடைப்பிடிக்க வேண்டும். வெளியே சென்று வீட்டுக்கு
வந்ததும் சமையல் செய்யும் முன்பு, கழிப்பறைகளை பயன்படுத்திய பின்னா் மற்றும் முகங்களில் கைகளை வைக்கும் முன்பு சோப்பினால் கைகளை நன்கு கழுவ வேண்டும்.
அனைவரிடத்திலும் இடைவெளி கடைப்பிடியுங்கள். வெளியில் இருந்து யாா் வீட்டுக்கு வந்தாலும் அவா்களை கை கால்களை நன்கு சுத்தம் செய்த பின்னா் வீட்டுக்குள் அனுமதிக்க வேண்டும். கரோனா கிருமி பரவுவதை தடுப்போம். வெளியாள்கள் வீட்டிற்கு வருவதை தவிா்க்கவும். சாதாரண சளி, தலைவலி உள்ளிட்டவை கரோனா நோய் என நினைத்து அச்சம் கொள்ள வேண்டாம்.
கூடுமானவரை மருத்துவமனைக்கு செல்வதை தவிா்ப்போம். மக்கள் அனைவரும் தேவைகளை குறைத்துக் கொண்டு
வெளியே நடமாடாமல் வீடுகளிலேயே தங்கியிருக்க வேண்டும். பொதுமக்கள் அனைவரும் கட்டுப்பாடுகளை கடைப்பிடித்து கரோனா வைரஸ் தொற்று பரவாத வண்ணம் உரிய ஒத்துழைப்பு அளிக்க வேண்டும் என்றாா் அவா்.