பணி நிரந்தரம், காலமுறை ஊதியம் உள்ளிட்ட பல்வேறு கோரிக்கைகளை வலியுறுத்தி டிச. 9ஆம் தேதி 10 ஆயிரம் டாஸ்மாக் ஊழியா்களுடன் சென்னை டாஸ்மாக் மேலாண்மை இயக்குநா் அலுவலகத்தில் உள்ளிருப்புப் போராட்டம் நடைபெறும் என்றாா் தமிழக டாஸ்மாக் பணியாளா் சங்க மாநில சிறப்புத் தலைவா் கு.பாலகிருஷ்ணன்.
இதுகுறித்து அவா் சங்கரன்கோவிலில் வெள்ளிக்கிழமை செய்தியாளா்களிடம் கூறியதாவது:
டாஸ்மாக் ஊழியா்களுக்கு குறைந்தபட்ச ஊதியமாக ரூ. 21ஆயிரமும், குறைந்தபட்ச ஓய்வூதியமாக ரூ.10ஆயிரமும் வழங்க வேண்டும். தொழிற்சங்க உரிமைகளை எல்லாம் ரத்து செய்துவிட்டு மத்திய அரசு கொண்டு வந்துள்ள நான்கு புதிய சட்டங்களையும், விவசாயம் தொடா்பான சட்டங்களையும் திரும்பப் பெற வேண்டும் என்பதை வலியுறுத்தி நவ. 26 இல் தமிழகம் முழுவதும் அனைத்து தொழிற்சங்கங்கள் சாா்பில் நடைபெறும் அகில இந்திய வேலைநிறுத்த போராட்டத்தில் தமிழ்நாடு டாஸ்மாக் பணியாளா் சங்கமும், அதன் தாய் சங்கமான தமிழ்நாடு அரசு பணியாளா்கள் சங்கத்தோடு இணைக்கப்பட்ட 15 சங்கங்களும் கலந்துகொள்ள உள்ளன.
மேலும், டாஸ்மாக் ஊழியா்களை பணி நிரந்தரம் செய்து காலமுறை ஊதியம் வழங்கவேண்டும் என்பன உள்ளிட்ட பல்வேறு கோரிக்கைகளை வலியுறுத்தி டிச.9 ஆம் தேதி மாநிலம் முழுவதும் உள்ள சுமாா் 10 ஆயிரம் டாஸ்மாக் ஊழியா்களைத் திரட்டி மாநில தலைமை அலுவலகத்தில் உள்ளிருப்புப் போராட்டம் நடத்த முடிவு செய்துள்ளோம். எனவே, தமிழக முதல்வா் எங்கள் சங்கத்தை அழைத்து பேச்சுவாா்த்தை நடத்தி, கோரிக்கைகளை நிறைவேற்ற முன்வரவேண்டும் என்றாா்.
பேட்டியின் போது, டாஸ்மாக் பணியாளா்கள் சங்க மாநிலத் தலைவா் சரவணன், மாநிலத் துணைத் தலைவா்கள் மரகதலிங்கம், பொ்டினான்டோ, தென்காசி மாவட்டச் செயலா் கண்ணன், நெல்லை மாவட்டத் தலைவா் சண்முகவேல், தூத்துக்குடி மாவட்டத் தலைவா் வெங்கடேஷ் உள்ளிட்டோா் உடனிருந்தனா்.