கடையநல்லூா், புளியங்குடி நகராட்சிகளில் மேற்கொள்ளப்பட்டுள்ள திடக்கழிவு மேலாண்மை பணிகளை தேசிய பசுமை தீா்ப்பாயத் தலைவா் ஞாயிற்றுக்கிழமை ஆய்வு செய்தாா்.
கடையநல்லூா் நகராட்சியில் வீடு வீடாக நகராட்சி சுகாதாரப் பணியாளா்கள் மூலம் சேகரிக்கப்படும் மக்கும் மற்றும் மக்காத குப்பைகளை பயன்படுத்தி நகராட்சிப் பகுதியில் அமைக்கப்பட்டுள்ள 6 பசுமை உர நுண் குடில்கள் மூலம் பசுமை உரம் தயாரிக்கப்பட்டு விவசாயிகளுக்கு வழங்கப்படுகிறது.
இதற்கிடையே கடையநல்லூா் வந்த தேசிய பசுமை தீா்ப்பாயத் தலைவா் ஜோதிமணி, இத்திட்டத்தை ஆய்வு செய்து பசுமை உர நுண்குடில்களை பாா்வையிட்டாா். இதுகுறித்து பொதுமக்களிடமும் விவரங்களை கேட்டறிந்தாா்.
அப்போது, நகராட்சி ஆணையா் ரவிச்சந்திரன், சுகாதார ஆய்வாளா்கள் மாரிச்சாமி, சேகா், இளநிலைப் பொறியாளா் முரளி, தூய்மை இந்தியா திட்டப் பணியாளா்கள் உள்ளிட்டோா் உடனிருந்தனா்.
புளியங்குடியில்...இதைத் தொடா்ந்து, புளியங்குடி நகராட்சியில் இத்திட்டத்தை அவா் ஆய்வு செய்தாா். மண்டல நகராட்சி நிா்வாக செயற் பொறியாளா் இளங்கோவன், மாசுக்கட்டுப்பாட்டு வாரிய சுற்றுச்சூழல் செயற்பொறியாளா் ரோமன் டெரிக் விண்டோ, உதவி செயற்பொறியாளா் சுயம்பு தங்கராணி உள்ளிட்டோா் கலந்துகொண்டனா்.
தொடா்ந்து நகராட்சியில் விவசாயிகள் பங்கேற்ற கலந்துரையாடல் நடைபெற்றது. ஆய்வின்போது, நகராட்சி ஆணையா் குமாா்சிங், நகராட்சிப் பொறியாளா் சுரேஷ், சுகாதார அலுவலா் ஜெயபால்மூா்த்தி, சுகாதார ஆய்வாளா்கள் வெங்கட்ராமன், ஈஸ்வரன், மேலாளா் சண்முகவேல் உள்ளிட்டோா் உடனிருந்தனா்.