Enable Javscript for better performance
நெல்லை மாவட்ட அளவில் ஜன. 5-ல் பள்ளி மாணவர்களுக்கு திருப்பாவை, திருவெம்பாவை போட்டிகள்- Dinamani

சுடச்சுட

    

    நெல்லை மாவட்ட அளவில் ஜன. 5-ல் பள்ளி மாணவர்களுக்கு திருப்பாவை, திருவெம்பாவை போட்டிகள்

    By திருநெல்வேலி,  |   Published on : 26th December 2013 03:49 AM  |   அ+அ அ-   |    |  

    இந்து சமய அறநிலையத் துறை சார்பில், திருநெல்வேலி மாவட்ட அளவில் பள்ளி மாணவ, மாணவியருக்கான திருப்பாவை, திருவெம்பாவை ஒப்பித்தல் போட்டி, கட்டுரைப் போட்டி ஆகியன ஜன. 5-ஆம் தேதி நெல்லையப்பர் கோயிலில் நடைபெறவுள்ளன.

    இதுதொடர்பாக அருள்மிகு நெல்லையப்பர், அருள்தரும் காந்திமதி அம்மன் திருக்கோயில் செயல் அலுவலர் ந. யக்ஞனநாராயணன் கூறியது:

    இந்து சமய அறநிலையத் துறை கட்டுப்பாட்டின்கீழ் உள்ள கோயில்களில் மாவட்ட அளவில் மார்கழி மாத திருப்பாவை, திருவெம்பாவை போட்டிகள் நடத்த உத்தரவிடப்பட்டுள்ளது.

    இதன்படி, திருநெல்வேலி மாவட்ட அளவிலான போட்டிகள் நெல்லையப்பர் கோயிலில் ஜன. 5-ஆம் தேதி நடைபெறுகிறது.

    ஒன்றாம் வகுப்பு முதல் 5-ஆம் வகுப்பு வரை, 6 முதல் 8-ஆம் வகுப்பு வரை, 9 முதல் 12-ஆம் வகுப்பு வரை என மூன்று பிரிவுகளாகப் போட்டிகள் நடத்தப்படுகின்றன.

    5-ஆம் வகுப்பு வரை உள்ளோருக்கு திருப்பாவை, திருவெம்பாவையில் ஏதாவது ஒன்றில் முதல் 5 பாசுரங்களை ஒப்பிக்க வேண்டும். ஆண்டாளும், இயற்கையும் அல்லது மார்கழியும், மாணிக்கவாசகரும் எனும் தலைப்பில் கட்டுரை எழுத வேண்டும்.

    8-ஆம் வகுப்பு வரை உள்ளவர்கள் 10 பாசுரங்களை ஒப்பிக்க வேண்டும். அவதாரங்கள் அல்லது உள்ளம் உருக்கும் திருவாசகம் எனும் தலைப்பில் கட்டுரை எழுத வேண்டும். 12-ஆம் வகுப்பு வரை உள்ள மாணவர்கள் 20 பாசுரங்களை ஒப்பிக்க வேண்டும். பூஜை முறைகள் அல்லது சிவனது தோற்ற வர்ணனை எனும் தலைப்பில் கட்டுரை எழுத வேண்டும்.

    ஒவ்வொரு போட்டியிலும் முதல் பரிசு ரூ. 3 ஆயிரம், 2-ஆவது பரிசு ரூ. 2 ஆயிரம், 3-ஆம் பரிசு ரூ. 1000 ரொக்கமாக வழங்கப்படும். ஒவ்வொரு பிரிவிலும் ஒரு பள்ளியில் இருந்து அதிகபட்சமாக 2 மாணவர்கள் அல்லது 2 மாணவிகள் பங்கேற்கலாம்.  

    போட்டிகள் ஜன. 5-ஆம் தேதி, காலை 10 மணிக்குத் தொடங்கும். கூடுதல் விவரங்களுக்கு கோயில் அலுவலகத்தை நேரிலோ, 0462-2339910 என்ற தொலைபேசி எண்ணிலோ தொடர்பு கொள்ளலாம் என்றார் அவர்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai