Enable Javscript for better performance
வறட்சியால் பாதிக்கப்பட்ட தென்னை விவசாயிகளுக்கு ரூ.14.5 லட்சம் இழப்பீடு: மாவட்ட வருவாய் அலுவலர்- Dinamani

சுடச்சுட

    

    வறட்சியால் பாதிக்கப்பட்ட தென்னை விவசாயிகளுக்கு ரூ.14.5 லட்சம் இழப்பீடு: மாவட்ட வருவாய் அலுவலர்

    By DIN  |   Published on : 24th March 2018 04:38 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    திருநெல்வேலி மாவட்டத்தில் வறட்சியால் பாதிக்கப்பட்ட 457 தென்னை விவசாயிகளுக்கு இழப்பீடாக ரூ.14.5 லட்சம் வழங்க நடவடிக்கை எடுக்கப்பட்டுள்ளதாக மாவட்ட வருவாய் அலுவலர் பூ.முத்துராமலிங்கம் தெரிவித்தார்.
    திருநெல்வேலி ஆட்சியர் அலுவலகத்தில் வெள்ளிக்கிழமை நடைபெற்ற மாவட்ட விவசாயிகள் குறைதீர் கூட்டத்தின்போது மாவட்ட வருவாய் அலுவலர் பூ.முத்துராமலிங்கம் பேசியதாவது:
    திருநெல்வேலி மாவட்டத்தில் பிசானப் பருவத்தில் 60,230 ஹெக்டேர் பரப்பில் நெற்பயிர் சாகுபடி செய்யப்பட்டு, தற்போது அறுவடைப் பணி நடைபெற்று வருகிறது. நேரடி நெல் கொள்முதல் நிலையங்கள் மூலம் சன்னரக நெல் குவிண்டாலுக்கு ரூ.1,660 ஆகவும், இதர ரகங்கள் குவிண்டாலுக்கு ரூ.1,600 ஆகவும் கொள்முதல் செய்யும் பணி நடைபெற்று வருகிறது. அனைத்து வட்டங்களிலும் நுகர்பொருள் வாணிபக் கழகம் மூலம் 10,220 மெட்ரிக் டன் நெல் கொள்முதல் செய்யப்பட்டுள்ளது.
    2016-17-இல் பிரதமரின் பயிர்க்காப்பீட்டுத் திட்டத்தின் கீழ் மக்காச்சோளம் பயிர்க் காப்பீடு செய்த 7,221 கடன்பெறா விவசாயிகளுக்கு ரூ.22.22 கோடி இழப்பீட்டுத் தொகையும், பாசிப்பயறு காப்பீடு செய்த 2,666 விவசாயிகளுக்கு ரூ.7.52 கோடி இழப்பீடும் விவசாயிகளின் வங்கிக் கணக்கில் வரவு வைக்கப்பட்டு வருகிறது.
    2016-17-இல் நெற்பயிர் சாகுபடி செய்த 8,730 விவசாயிகளுக்கு ரூ.7.51 கோடியும், உளுந்து சாகுபடி செய்த 20,205 விவசாயிகளுக்கு ரூ.48.66 கோடியும் இழப்பீடாக வழங்கப்பட்டுள்ளது. இத்திட்டத்தின் கீழ் இம்மாவட்டத்தில் மொத்தம் 39,322 விவசாயிகள் ரூ.85.91 கோடி இழப்பீடு பெற்று பயன் அடைந்துள்ளனர்.
    இதுதவிர பருத்தி காப்பீடு செய்த 1,527 விவசாயிகள், கரும்பு பயிர் காப்பீடு செய்த 228 விவசாயிகளுக்கு இழப்பீடு பெற்று தருவதற்கான நடவடிக்கை எடுக்கப்பட்டு வருகிறது. உளுந்து பயறுக்கு காப்பீட்டுத் தொகை வழங்குவதில் இடர்ப்பாடு ஏற்பட்ட கிராமங்களுக்கும் உரிய நிவாரணம் கிடைத்திட ஐசிஐசிஐ நிறுவனம் மூலம் நடவடிக்கை எடுக்கப்பட்டு வருகிறது.
    2016-இல் ஏற்பட்ட வறட்சியில் பாதிக்கப்பட்ட தென்னை விவசாயிகள் 457 பேருக்கு இழப்பீடாக ரூ.14 லட்சத்து 55 ஆயிரம் அரசிடம் இருந்து பெற்று விவசாயிகளின் வங்கிக் கணக்கில் வரவு வைக்கப்பட்டு வருகிறது. ஏற்கெனவே வறட்சி நிவாரணம் வழங்கியபோது விடுபட்ட 1,267 விவசாயிகளுக்கும் வறட்சி நிவாரணம் கிடைத்திட நடவடிக்கை மேற்கொள்ளப்பட்டு வருகிறது என்றார்.
    கருங்காடு விவசாயி கடும் வாக்குவாதம்
    விவசாயிகள் குறைதீர் கூட்டத்தின்போது, கருங்காட்டைச் சேர்ந்த விவசாயி மாடசாமி, தனக்கு கிணறு அமைத்ததற்கான மானியத் தொகை ரூ. 8 லட்சம் வழங்க வேண்டும். ஆனால் ரூ.4 லட்சம் மட்டுமே வழங்கிவிட்டு, எஞ்சிய தொகையை தராமல் இழுத்தடிக்கிறார்கள் எனக் கூறி மாவட்ட வருவாய் அலுவலர் உள்ளிட்ட அதிகாரிகளுடன் கடும் வாக்குவாதத்தில் ஈடுபட்டார்.
    அப்போது குறுக்கிட்ட மாவட்ட வருவாய் அலுவலர், கடந்த மாதம் விவசாயிகளிடம் இருந்து பெறப்பட்ட மனுக்கள் மீது எடுக்கப்பட்டுள்ள நடவடிக்கைகள் குறித்த விவரங்களை தெரிவித்துவிட்டு அதன் பிறகு உங்கள் விவகாரம் குறித்து பேசலாம் என்றார்.
    ஆனால், அதற்கு மறுத்த மாடசாமி, மாவட்ட வருவாய் அலுவலர் முன்பு தரையில் இருந்து அமர்ந்து தர்னாவில் ஈடுபட்டார். அப்போது அவரை சில விவசாயிகள் சமாதானப்படுத்த முயற்சித்தனர். அப்போது மாடசாமிக்கு ஆதரவாக சில விவசாயிகள் குரல் கொடுக்க, விவசாயிகளிடையே மோதல் ஏற்படும் சூழல் உருவானது.
    இதனால் சுமார் 10 நிமிடங்கள் விவசாயிகள் குறைதீர் கூட்டத்தில் கூச்சல் குழப்பம் நிலவியது. அதைத் தொடர்ந்து மாடசாமியின் கோரிக்கை தொடர்பாக உரிய நடவடிக்கை எடுப்பதாக மாவட்ட வருவாய் அலுவலர் பூ.முத்துராமலிங்கம் தெரிவித்தார். அதன்பிறகு மாடசாமி தனது போராட்டத்தைக் கைவிட்டு வெளியேறினார்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai