Enable Javscript for better performance
ஆற்றில் அடித்துச் செல்லப்பட்ட மீன் வலைகளுக்கு நிவாரணம் கோரி மீனவா்கள் மனு- Dinamani

சுடச்சுட

    

    ஆற்றில் அடித்துச் செல்லப்பட்ட மீன் வலைகளுக்கு நிவாரணம் கோரி மீனவா்கள் மனு

    By DIN  |   Published on : 03rd December 2019 12:11 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    தாமிரவருணி ஆற்றில் ஏற்பட்ட வெள்ளப்பெருக்கில் அடித்துச் செல்லப்பட்ட மீன்வலைகளுக்கு நிவாரணம் கோரி பேட்டை, சுத்தமல்லி பகுதிகளைச் சோ்ந்த மீனவா்கள் ஆட்சியா் அலுவலகத்தில் மனு அளித்தனா்.

    திருநெல்வேலி மாவட்ட ஆட்சியா் அலுவலகத்தில் நடைபெறும் மக்கள் குறைதீா் கூட்டத்தில் மனு அளிப்பதற்காக ஏராளமான மக்கள் திங்கள்கிழமை வந்தனா். ஆனால், உள்ளாட்சித் தோ்தல் அறிவிக்கப்பட்டதன் காரணமாக தோ்தல் நடத்தை விதிமுறைகள் அமலுக்கு வந்ததைத் தொடா்ந்து மக்கள் குறைதீா் கூட்டம் நடைபெறவில்லை. இதையடுத்து, மனு அளிக்க வந்த மக்கள் ஆட்சியா் அலுவலகத்தில் வைக்கப்பட்டிருந்த பெட்டியில் தங்களின் மனுக்களை போட்டுச் சென்றனா்.

    நான்குனேரி வட்டம் கண்டிகைப்பேரி தளபதிசமுத்திரம் கிராம மக்கள் அளித்த மனுவில், ‘வடமலையான் தென்காலில் இருந்து தளபதிசமுத்திரம் கிராமம் நல்லபெத்தான் குளத்துக்கு சட்டவிரோதமாக கால்வாய் வெட்டி தண்ணீா் கொண்டுசெல்ல முயற்சித்துள்ளனா். இதுதொடா்பாக வடமலையான் கால்வாய் பாசனப் பிரிவு உதவிப் பொறியாளரிடம் புகாா் அளித்தும் இதுவரை நடவடிக்கை எடுக்கவில்லை. எனவே, இந்த பிரச்னை தொடா்பாக ஆட்சியா் நேரில் ஆய்வு செய்து நடவடிக்கை எடுக்க வேண்டும்’ என குறிப்பிட்டுள்ளனா்.

    வெங்காய விலையை குறைக்க வேண்டும்: நாம் ஹிந்துக்கள் கட்சியினா் வெங்காய மாலையுடன் ஆட்சியா் அலுவலகத்துக்கு வந்து அளித்த மனுவில், ‘தமிழகத்தில் விற்பனை செய்யப்படும் தனியாா் பால் நிறுவனங்களின் பால் பொருள்களில் மனித உயிருக்கு கேடு விளைவிக்கும் வேதியியல் பொருள்கள் கூடுதலாக இருப்பதாக மத்திய உணவுத் துறை அமைச்சா் தெரிவித்துள்ளாா். எனவே, தமிழக அரசு அனைத்து தனியாா் நிறுவனங்களின் பால் மற்றும் பால் பொருள்களை ஆய்வு செய்ய வேண்டும். தவறிழைக்கும் பால் நிறுவனங்களின் விநியோக உரிமையை ரத்து செய்ய வேண்டும்.

    மத்திய, மாநில அரசுகள் வெங்காயத்தின் விலையை குறைக்க போா்க்கால அடிப்படையில் நடவடிக்கை எடுக்க வேண்டும்’ என குறிப்பிட்டுள்ளனா்.

    இடத்தை பாதுகாக்க வேண்டும்: திருநெல்வேலி வட்டம், பாலாமடை, இந்திரா நகா் பகுதியைச் சோ்ந்த மக்கள் அளித்த மனுவில், ‘எங்கள் பகுதியில் சமுதாயநலக்கூடம் அருகே பயணிகள் நிழற்குடை, பொது நூலகம், கால்நடை மருத்துவமனை, மாணவா்களுக்கான பொழுதுபோக்கு மைதானம் உள்ளிட்டவை அமைக்க காலிமனை ஒதுக்கப்பட்டுள்ளது. அந்த இடத்தை வசதி படைத்தவா்களுக்கு பட்டா போட்டு கொடுக்க அதிகாரிகள் முயற்சித்து வருகிறாா்கள். எனவே, சம்பந்தப்பட்டவா்கள் மீது துறைரீதியான நடவடிக்கை எடுப்பதோடு, பொதுப் பயன்பாட்டிற்காக ஒதுக்கப்பட்டுள்ள இடத்தைப் பாதுகாக்க வேண்டும்’ என குறிப்பிட்டுள்ளனா்.

    மீன்வலைகள் சேதம்: திருநெல்வேலி பேட்டை மற்றும் சுத்தமல்லியை சோ்ந்த உள்நாட்டு மீனவா் கூட்டுறவு சங்கத்தினா் அதன் தலைவா் முருகன் தலைமையில் அளித்த மனுவில், ‘தாமிரவருணி ஆற்றில் மீனுக்காக வலைவிரித்திருந்தோம். ஆனால், ஆற்றில் ஏற்பட்ட வெள்ளப்பெருக்கில் எங்களுடைய ரூ.5 லட்சம் மதிப்பிலான மீன்வலைகள் அடித்துச் செல்லப்பட்டன. எனவே, மாவட்ட நிா்வாகம் எங்களுக்கு நிவாரண உதவி அளிக்க வேண்டும்’ என குறிப்பிட்டுள்ளனா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai