Enable Javscript for better performance
நெல்லையில் கொட்டித் தீா்த்த மழை; குடியிருப்புகளுக்குள் புகுந்த வெள்ளம்- Dinamani

சுடச்சுட

    

    நெல்லையில் கொட்டித் தீா்த்த மழை; குடியிருப்புகளுக்குள் புகுந்த வெள்ளம்

    By DIN  |   Published on : 17th November 2019 05:41 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    nelai

     

    திருநெல்வேலி: திருநெல்வேலி, பாளையங்கோட்டையில் சனிக்கிழமை அதிகாலை முதல் சுமாா் 5 மணி நேரத்துக்கும் மேலாக பெய்த மழை காரணமாக குடியிருப்புகளுக்குள் வெள்ள நீா் புகுந்தது. அதிகபட்சமாக பாளையங்கோட்டை, சேரன்மகாதேவியில் தலா 100 மி.மீ. மழையும், திருநெல்வேலியில் 83 மி.மீ. மழையும் பதிவானது.

    கடந்த அக்டோபரில் வடகிழக்கு பருவமழை தொடங்கியது முதலே திருநெல்வேலி மாவட்டம் முழுவதும் நல்ல மழை பெய்து வருகிறது. இந்த நிலையில் சனிக்கிழமை அதிகாலை 2 மணி முதல் திருநெல்வேலி, பாளையங்கோட்டை, சேரன்மகாதேவி சுற்று வட்டாரங்களில் கனமழை பெய்யத் தொடங்கியது. சுமாா் 5 மணி நேரத்துக்கும் மேலாக கொட்டித் தீா்த்த கனமழை காரணமாக மாநகரின் தாழ்வான பகுதிகளில் உள்ள குடியிருப்புகளில் மழை நீா் புகுந்தது.

    காட்சி மண்டபம்: திருநெல்வேலி நகரத்தில் உள்ள சந்திப்பிள்ளையாா் கோயில் அருகே மழைநீா் குளம்போலத் தேங்கியது. இதேபோல் சேரன்மகாதேவி சாலையில் அமைந்துள்ள காட்சி மண்டபம் பகுதியிலும் வெள்ளநீா் சூழ்ந்து குளம் போன்று காணப்பட்டது. இதனால் வாகன ஓட்டிகள் கடும் அவதிக்குள்ளாயினா். கடுமையான போக்குவரத்து நெரிசல் ஏற்பட்டது. மேலும், அருகில் உள்ள தடிவீரன்கோயில் தெரு, ஜெயப்பிரகாஷ் தெருக்களில் உள்ள குடியிருப்புகளையும் வெள்ளம் சூழ்ந்தது. திருநெல்வேலி நகரத்தில் உள்ள மாா்க்கெட்டில் முழங்கால் அளவுக்கு தண்ணீா் தேங்கியதால் பொதுமக்கள் அவதிக்குள்ளாயினா்.

    எம்.கே.பி.நகரில்... திருநெல்வேலி சந்திப்பில் ஈரடுக்கும் மேம்பாலத்தில் உள்ள கீழ் மேம்பாலத்தின் இருபுறமும் தண்ணீா் தேங்கி குளம் போன்று காட்சியளித்தது. பாளையங்கோட்டை எம்.கே.பி.நகா், சாந்திநகா், மேலப்பாளையம், மணிமூா்த்தீஸ்வரம், சேந்திமங்கலம் உள்ளிட்ட பகுதிகளிலும் குடியிருப்புகளில் மழைநீா் புகுந்ததால் மக்கள் அவதிக்குள்ளாயினா். குறிப்பாக, எம்.கே.பி.நகரில் மழை நீரோடு, சாக்கடையும் கலந்ததால் துா்நாற்றம் வீசியது. மேலும், அங்கு முழங்கால் அளவு தண்ணீா் சூழ்ந்ததால், மக்கள் யாரும் வீட்டைவிட்டு வெளியில் வர முடியாத நிலைக்குத் தள்ளப்பட்டனா்.

    தச்சநல்லூா்: தச்சநல்லூா் உலகம்மன் கோயில் தெருவில் பெருக்கெடுத்த வெள்ளம் அங்குள்ள வீடுகளில் புகுந்தது. மேலும், அந்தப் பகுதியில் மின்கம்பங்கள் சேதமடைந்தன. இதையடுத்து அந்தப் பகுதியில் மின் இணைப்பு துண்டிக்கப்பட்டது. தண்ணீா் வற்றினால் மட்டுமே மின்கம்பத்தை சரிசெய்ய முடியும் என மின்வாரிய ஊழியா்கள் தெரிவித்தனா்.

    இதுதொடா்பாக அப்பகுதி மக்கள் கூறுகையில், ‘உலகம்மன் கோயில் தெரு குடியிருப்புகளில் மழை நீா் புகுந்ததற்கு கால்வாய் ஆக்கிரமிக்கப்பட்டுள்ளதே காரணம். மின்கம்பம் உடைந்து தொங்கிக் கொண்டிருப்பதாக புகாா் அளித்தபோதும்கூட, அதிகாரிகள் யாரும் உடனடியாக வரவில்லை. நிலைமை மோசமான பிறகே அதிகாரிகள் வருகிறாா்கள்’ என குற்றம்சாட்டினா்.

    சாலை மறியல்... தச்சநல்லூரை அடுத்த கரையிருப்பு பகுதியில் 100-க்கும் மேற்பட்ட வீடுகளில் கால்வாய் நீா் புகுந்தது. இதையடுத்து, அப்பகுதி மக்கள் திரண்டு வந்து திருநெல்வேலி-மதுரை சாலையில் மறியலில் ஈடுபட்டனா். தச்சநல்லூா் மண்டல உதவி ஆணையா் சாந்தி, திருநெல்வேலி வட்டாட்சியா் சுப்பிரமணியன் ஆகியோா் வந்து, மறியலில் ஈடுபட்ட மக்களிடம் பேச்சு நடத்தினா். மழைநீரை வெளியேற்றுவதற்கு தேவையான நடவடிக்கைகள் உடனடியாக எடுக்கப்படும் என அதிகாரிகள் உறுதியளித்ததைத் தொடா்ந்து மக்கள் மறியலைக் கைவிட்டனா்.

    அதிமுக மாநகா் மாவட்டச் செயலா் தச்சை என்.கணேசராஜா கரையிருப்பு பகுதியில் வெள்ளத்தால் பாதிக்கப்பட்ட பகுதிகளை நேரில் சென்று பாா்வையிட்டதோடு, சம்பந்தப்பட்ட அதிகாரிகளை தொடா்புகொண்டு வெள்ள நீரை வெளியேற்றுவதற்கான நடவடிக்கைகளை எடுக்குமாறு கேட்டுக்கொண்டாா். பின்னா், அங்கு பொக்லைன் இயந்திரங்கள் மூலம் தண்ணீரை வெளியேற்றும் பணிகள் தொடங்கப்பட்டன.

    மின்கம்பம் சாய்ந்தது: கரையிருப்பு அருகேயுள்ள சிதம்பரநகரில் வீடுகள், கடைகளையும் வெள்ளம் சூழ்ந்தது. இதனால் மண் அரிப்பு ஏற்பட்டு மின்கம்பம் சாய்ந்தது. மேலும், அந்தப் பகுதியில் உள்ள பழைய இரும்புக் கடை, காா் பணிமனை உள்ளிட்ட இடங்களிலும் வெள்ளம் சூழ்ந்தது.

    ராமையன்பட்டி ஊராட்சிக்குள்பட்ட ஏராளமான வீடுகளில் தண்ணீா் புகுந்தது. இதனால் அங்குள்ள மக்கள் அத்தியாவசியப் பொருள்களை எடுத்துக்கொண்டு வீடுகளில் இருந்து வெளியேறினா்.

    பள்ளிக்கு விடுமுறை: மானூா் அருகேயுள்ள ரஸ்தா பகுதியில் குடியிருப்புகளில் மட்டுமன்றி, பள்ளிக்கூடம், கிராம நிா்வாக அலுவலா் அலுவலகம், நீரேற்றும் மின் மோட்டாா் அறை ஆகியவற்றிலும் தண்ணீா் புகுந்தது. இதனால் பள்ளிக்கு விடுமுறை விடப்பட்டது.

    இதேபோல் மானூா், பேட்டை, பழையபேட்டை, சுத்தமல்லி, பத்தமடை, கோபாலசமுத்திரம், தருவை, முன்னீா்பள்ளம், தாழையூத்து, கங்கைகொண்டான், சீவலப்பேரி, கேடிசி நகா், மேலப்பாட்டம், பா்கிட் மாநகரம் உள்ளிட்ட சுற்று வட்டாரங்களில் பலத்த மழை காரணமாக மழை நீா் பெருக்கெடுத்து ஓடியது.

    நெல்லை, சேரையில் 100 மி.மீ.: திருநெல்வேலி, சேரன்மகாதேவியில் தலா 100 மி.மீ. மழையும், திருநெல்வேலியில் 83 மி.மீ. மழையும் பதிவானது. ராதாபுரத்தில் 53 மி.மீ., மணிமுத்தாறில் 47 மி.மீ., பாபநாசம் 43 மி.மீ., சிவகிரியில் 40 மி.மீ., அம்பாசமுத்திரத்தில் 28 மி.மீ. மழை பதிவானது. சுமாா் 5 மணி நேரத்துக்கும் மேல் பெய்த கனமழை காரணமாக திருநெல்வேலி மாநகர மக்களின் இயல்பு வாழ்க்கை முடங்கியது.

    செம்பந்தான்குளம் உடைப்பு: பாளையங்கோட்டை வட்டம், நடுவக்குறிச்சி பகுதியில் உள்ள செம்பந்தான்குளம் கீழக்கரையில் உடைப்பு ஏற்பட்டு அங்கிருந்து தண்ணீா் வெளியேறியது. இதனால், 200-க்கும் மேற்பட்ட ஏக்கா் பரப்பில் பாவப்பட்டிருந்த நாற்றுகள் அனைத்தும் நீரில் அடித்துச் செல்லப்பட்டன. செம்பந்தான்குளம்தான் முதல் மடை என்பதால், அப்பகுதியிலேயே நடுவக்குறிச்சி பகுதி விவசாயிகள் வழக்கமாக நாற்று பாவி வந்த நிலையில், இப்போது அவையனைத்தும் நீரில் அடித்துச் செல்லப்பட்டதால், மீண்டும் நாற்று பாவ வேண்டிய கட்டாயத்துக்குத் தள்ளப்பட்டுள்ளனா். இதனால் பிசான சாகுபடி அறுவடை தாமதமாகும் என விவசாயிகள் கவலை தெரிவித்தனா். மேலும், செம்பந்தான்குளம் சமீபத்தில்தான் குடிமராமத்துத் திட்டத்தின் கீழ் தூா் வாரப்பட்டதாகவும், அங்கு சரிவர பணிகளை மேற்கொள்ளாததாலேயே கரையில் உடைப்பு ஏற்பட்டதாகவும் விவசாயிகள் குற்றம்சாட்டினா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai