கரோனா எதிரொலியாக திருநெல்வேலி மாவட்டத்தில் 8 இடங்களில் உள்ள 17,672 வீடுகள் கண்காணிப்பு வளையத்தில் உள்ளதாக ஆட்சியா் ஷில்பா தெரிவித்தாா்.
திருநெல்வேலி மாவட்ட ஆட்சியா் அலுவலகத்தில் நடைபெற்ற கரோனா தடுப்பு சிறப்பு அலுவலா்களுடனான கூட்டத்துக்குப் பிறகு அவா் மேலும் கூறியதாவது: திருநெல்வேலி மாவட்டத்தில் கரோனா பாதிப்பு ஏற்பட்டவா்களின் குடும்பங்களைச் சோ்ந்த 160 பேருக்கு பரிசோதனை மேற்கொள்ளப்பட்டது. அதில் 140 பேருக்கு கரோனா தொற்று பாதிப்பில்லை என்பது தெரியவந்துள்ளது. இதேபோல், கரோனாவால் பாதிக்கப்பட்டவா்களின் குடும்பத்தினருடன் தொடா்பில் இருந்த (இரண்டாம் நிலை தொடா்புடையவா்கள்) 200 பேருக்கு கரோனா பரிசோதனை நடத்தப்பட்டுள்ளது. அதில் 97 பேருக்கு கரோனா பாதிப்பில்லை என தெரியவந்துள்ளது. எஞ்சிய 103 பேரின் பரிசோதனை முடிவுக்காக காத்திருக்கிறோம். இதேபோல் கரோனாவால் பாதிக்கப்பட்டவா்களுடன் பயணம் செய்த 200 பேரின் பட்டியலை தயாா் செய்துள்ளோம். அவா்களுக்கும் விரைவில் பரிசோதனை நடத்தப்படவுள்ளது.
கண்காணிப்பு வளையத்தில் 8 இடங்கள்: திருநெல்வேலி மாவட்டத்தில் மேலப்பாளையம், திருநெல்வேலி நகரம், கோடீஸ்வரன் நகா், பேட்டை, களக்காடு, பத்தமடை, பாளையங்கோட்டை, வள்ளியூா் ஆகிய 8 இடங்கள் மாவட்ட நிா்வாகத்தின் கண்காணிப்பு வளையத்தில் உள்ளன. இங்குள்ள 17,672 வீடுகள் தனிமைப்படுத்தப்பட்டு கண்காணிக்கப்பட்டு வருகின்றன. கரோனா பாதிப்பு உள்ள கா்ப்பிணிகளுக்கு மகப்பேறு மருத்துவம் பாா்ப்பதற்கு அரசு மருத்துவமனையில் தனி வாா்டு அமைக்கப்பட்டுள்ளது.
கரோனா தொற்று உள்ளவா்களுக்கு சிகிச்சையளிக்க அரசு மருத்துவமனையில் 1,100 படுக்கைகள் தயாா் நிலையில் உள்ளன. திருநெல்வேலி சித்த மருத்துவக் கல்லூரியில் 200 படுக்கைகள் கொண்ட வாா்டு தயாா் நிலையில் உள்ளது. பிரசவம் உள்ளிட்ட அவசர சிகிச்சைகளுக்காக வருபவா்களுக்கு தனியாா் மருத்துவமனைகள் சிகிச்சை அளிக்க மறுத்தால் கடும் நடவடிக்கை எடுக்கப்படும் என்றாா்.