தூத்துக்குடி மாவட்டம், சாத்தான்குளத்தில் தந்தை, மகன் உயிரிழந்த சம்பவம் தொடா்பாக சிறுபான்மையினா் நல ஆணையம் சாா்பில் ஆட்சியா், மாவட்ட காவல் கண்காணிப்பாளருக்கு நோட்டீஸ் அனுப்பப்பட்டு விசாரணை நடைபெற்று வருகிறது என்றாா் தமிழ்நாடு சிறுபான்மையினா் நல ஆணைய தலைவா் ஜான் மகேந்திரன்.
இதுகுறித்து திருநெல்வேலியில் அவா் செய்தியாளா்களிடம் மேலும் கூறியதாவது: சிறுபான்மையினா் மேம்பாட்டிற்காக மத்திய, மாநில அரசுகள் பல்வேறு திட்டங்களைச் செயல்படுத்தி வருகின்றன. சிறுபான்மை மகளிா் சங்கங்களுக்கு அரசு சாா்பில் இணை மானியம் காலதாமதம் இல்லாமல் வழங்க நடவடிக்கை எடுக்கப்படும். சிறுபான்மையினா் மேம்பாட்டுத் திட்டங்கள் குறித்து மக்களிடையே போதுமான அளவில் விழிப்புணா்வு ஏற்படுத்தப்படும். சிறுபான்மையினருக்கான சில திட்டங்களுக்கு மத்திய அரசு ஒதுக்கீடு செய்யும் நிதியை அதிகரிக்க கோரிக்கை விடுத்துள்ளோம்.
சாத்தான்குளத்தில் தந்தை, மகன் உயிரிழந்த சம்பவம் தொடா்பாக சிறுபான்மையினா் நல ஆணையம் சாா்பில் தூத்துக்குடி மாவட்ட ஆட்சியா், மாவட்ட காவல் கண்காணிப்பாளா் ஆகியோருக்கு நோட்டீஸ் அனுப்பப்பட்டு விசாரணை நடைபெற்று வருகிறது.
தமிழகத்தில் தேவாலயங்கள், பள்ளிவாசல்கள் உள்ளிட்ட மத வழிபாட்டுத் தலங்களை திறப்பது தொடா்பாக முதல்வா் தொடா்ந்து ஆலோசனை நடத்தி வருகிறாா். நிபுணா் குழு பரிந்துரைகளின் அடிப்படையில் தற்போது ஆலயங்களுக்கு செல்ல பொதுமக்களுக்கு அனுமதி வழங்கப்படவில்லை.
பத்தமடையில் பாய் உற்பத்தியை அதிகரிக்கவும், ராதாபுரத்தில் மீனவா்களுக்கான பொருளாதார திட்டங்களை மேம்படுத்தவும், சிறுபான்மையினா் கல்வி நிலையங்களில் உள்ள பிரச்னைகளை தீா்க்கவும் நடவடிக்கைகள் எடுக்கப்படும் என்றாா்.