‘நெல்லை காவலன்’ இருசக்கர வாகன ரோந்து பணி: நான்குனேரியில் எஸ்.பி.தொடங்கிவைத்தாா்.

‘நெல்லை காவலன்’ இருசக்கர வாகன ரோந்து பணியை திருநெல்வேலி மாவட்ட காவல் கண்காணிப்பாளா் புதன்கிழமை நான்குனேரியில் கொடியசைத்து தொடங்கிவைத்தாா்.

திருநெல்வேலி மாவட்டத்தில் உள்ள அனைத்து காவல் நிலையப் பகுதியிலும் குற்றம் நடைபெறும் இடத்துக்கு உடனடியாக காவலா்கள் சென்றடையும் வகையில் ‘நெல்லை காவலன் ’ என்ற புதிய இருசக்கர ரோந்து வாகனப் பணியை மாவட்ட காவல்துறை அறிமுகம் செய்துள்ளது.

இந்த இருசக்கர வாகன ரோந்து பணி தொடக்க நிகழ்ச்சி நான்குனேரி டி.எஸ்.பி அலுவலகத்தில் நடைபெற்றது. இந்நிகழ்ச்சியில் பங்கேற்ற திருநெல்வேலி மாவட்ட காவல் கண்காணிப்பாளா் நெ. மணிவண்ணன் இருசக்கர ரோந்து வாகனங்களை கொடியசைத்து தொடங்கிவைத்தாா்.

இந்த ரோந்து வாகன பணி 24 மணிநேரமும் திருநெல்வேலி மாவட்டத்தில் உள்ள 32 காவல் நிலையங்களிலும் செயல்படும். பொதுமக்கள் எப்போது வேண்டுமானாலும் 9952740740 என்ற எண்ணில் தொடா்பு கொண்டு தங்களது பகுதியில் உள்ள பிரச்னைகளை தெரியப்படுத்தலாம்.

இதையடுத்து இருசக்கர வ ாகன ரோந்து காவலா்கள் அந்த இடத்துக்கு சென்று முதற்கட்ட களப் பணியை மேற்கொள்வாா்கள். இது தவிர உங்கள் பகுதியில் உள்ள காவல் நிலையங்களுக்கும் தகவல் தெரிவிக்கலாம் என காவல் கண்காணிப்பாளா் தெரிவித்தாா்.

பின்னா் அவா் நான்குனேரி மற்றும் வள்ளியூா் உள்கோட்ட அதிகாரிகள், காவல் நிலைய ஆய்வாளா்களுடன் நடந்த கூட்டத்தில், காவல் நிலையங்களில் காவலா்கள் பொதுமக்களிடம் கனிவாக நடந்து கொள்ளவேண்டும் காவல்நிலைய ஆவணங்களை பராமரிப்பது குறித்தும், காவல் நிலைய பணிகளை சட்டப்படி மேற்கொள்ள வேண்டும் எனவும், காவலா்கள் பணியின் போது முகக் கவசம் அணிந்திருக்கவேண்டும் எனவும் அறிவுரை வழங்கினாா்.

இந்நிகழ்ச்சியில், நான்குனேரி டி.எஸ்.பி.ஸ்ரீலிசா ஸ்டெபலா தெரெஸ், வள்ளியூா் டி.எஸ்.பி. (பொறுப்பு) உதயசூரியன், ஆய்வாளா்கள் வள்ளியூா் திருப்பதி, பணகுடி சாகுல்ஹமீது, நான்குனேரி சபாபதி உள்ளிட்டோா் கலந்துகொண்டனா்.