நெல்லை தாமிரவருணி ஆற்றில் மாஞ்சோலை தோட்டத் தொழிலாளா்களுக்கு அஞ்சலி

திருநெல்வேலி தாமிரவருணி ஆற்றில் உயிரிழந்த மாஞ்சோலை தோட்டத் தொழிலாளா்களுக்கு அரசியல் கட்சியினா், பல்வேறு அமைப்பினா் வியாழக்கிழமை அஞ்சலி செலுத்தினா்.

திருநெல்வேலி கொக்கிரகுளம் தாமிரவருணி ஆற்றில் 1999ஆம் ஆண்டு உயிரிழந்த மாஞ்சோலை தேயிலைத் தோட்டத் தொழிலாளா்களின் நினைவு தினம் வியாழக்கிழமை கடைப்பிடிக்கப்பட்டது. இதையொட்டி, தாமிரவருணி ஆற்றில் அஞ்சலி செலுத்தும் நிகழ்வு வியாழக்கிழமை நடைபெற்றது.

காங்கிரஸ் கமிட்டி சாா்பில் திருநெல்வேலி மாநகா் மாவட்டத் தலைவா் கே. சங்கரபாண்டியன் தலைமையில் மலா் தூவி, மலா் வளையம் வைத்து அஞ்சலி செலுத்தப்பட்டது. மாவட்டப் பொருளாளா் எஸ். ராஜேஷ் முருகன், மானூா் வட்டாரத் தலைவா் சொா்ணம், மண்டலத் தலைவா் எஸ்.எஸ். மாரியப்பன், மாநகா் மாவட்ட பொதுச்செயலா்கள் மனோகரன், பாக்கியகுமாா், சொக்கலிங்ககுமாா் உள்பட பலா் பங்கேற்றனா்.

தமிழக மக்கள் முன்னேற்றக் கழகம் சாா்பில் மாநகா் மாவட்டத் தலைவா் கண்மணிமாவீரன் தலைமையில், மலா் தூவி அஞ்சலி செலுத்தப்பட்டது. முன்னதாக, கருப்பந்துறையில் உள்ள அந்தோணி, ரத்தினமேரி, விக்னேஷ் ஆகியோரின் நினைவிடத்தில் மலா் தூவி அஞ்சலி செலுத்தப்பட்டது. மாவட்ட இணைச் செயலா் கோ. துரைபாண்டியன், மாநில செய்தி தொடா்பாளா் சண்முகசுதாகா், மாநில மகளிரணிச் செயலா் நளினி, மாவட்டச் செயலா் நாகராஜசோழன் உள்ளிட்ட பலா் பங்கேற்றனா்.

மாா்க்சிஸ்ட் லெனினிஸ்ட் சாா்பில் மாவட்டச் செயலா் சங்கரபாண்டின் தலைமையில் தாமிரவருணி ஆற்றில் மலா் தூவி அஞ்சலி செலுத்தப்பட்டது. மாநிலக்குழு உறுப்பினா் ரமேஷ், மாவட்டக்குழு உறுப்பினா்கள் கணேசன், கருப்பசாமி, சுந்தர்ராஜ் உள்ளிட்ட பலா் பங்கேற்றனா்.

தொடா்ந்து, புதிய தமிழகம் கட்சியினா், விடுதலைச் சிறுத்தைகள் கட்சியினா், மாா்க்சிஸ்ட் கம்யூனிஸ்ட் கட்சியினா், பல்வேறு அமைப்பினா் மலா் தூவி அஞ்சலி செலுத்தினா். இதையொட்டி, கொக்கிரகுளம் ஆற்றுப்பாலப் பகுதியில் பலத்த போலீஸ் பாதுகாப்பு போட்டப்பட்டிருந்தது.