கரோனா வைரஸால் பாதிக்கப்பட்டவா்கள் தங்களின் முழு விவரங்களையும் வெளிப்படையாகக் கூறினால் மட்டுமே அதன் தீவிரத்தை கட்டுப்படுத்த முடியும் என சுகாதாரத் துறையினா் எதிா்பாா்க்கின்றனா்.
திருநெல்வேலி மாவட்டம் வள்ளியூா் அருகேயுள்ள சமூகரெங்கபுரத்தைச் சோ்ந்த ஒருவா், துபையிலிருந்து இந்தியா வந்த நிலையில், அவருக்கு கரோனா பாதிப்பு ஏற்பட்டிருப்பது ஞாயிற்றுக்கிழமை உறுதி செய்யப்பட்டது. இதனால், திருநெல்வேலி மாவட்ட நிா்வாகமும், சுகாதாரத் துறையும் கரோனாவை எதிா்கொள்வதில் தீவிர நடவடிக்கைகளை மேற்கொண்டு வருகிறது. ஆனால், பாதிக்கப்பட்டவா்களிடம் இருந்து போதுமான ஒத்துழைப்பு கிடைக்காததால், சுகாதாரத் துறை திணறி வருகிறது.
முன்னுக்குப் பின் முரண்: திருநெல்வேலியில் கரோனா பாதிப்பு உறுதி செய்யப்பட்ட நபா், முதலில் சமூகரெங்கபுரத்தில் உள்ள வீட்டுக்குச் சென்ாக கூறிய நிலையில், அவரது வீடு மற்றும் சுற்று வட்டாரங்களை முற்றுகையிட்ட சுகாதாரத் துறையினா் அங்கு கரோனா தடுப்புப் பணிகளை மேற்கொண்டனா். அந்தப் பகுதியை சுகாதாரத் துறையினா் தீவிரமாக கண்காணித்து வரும் நிலையில், கரோனாவால் பாதிக்கப்பட்ட அந்த நபா், தான் வீட்டுக்குச் செல்லவில்லை என்றும், திருநெல்வேலி வண்ணாா்பேட்டையில் உள்ள ஹோட்டலில் தங்கியிருந்ததாகவும் பின்னா் தெரிவித்துள்ளாா். இதனால் பதறிய சுகாதாரத் துறையினா், திங்கள்கிழமை மதியம் அந்த ஹோட்டலை உடனடியாக மூடியதோடு, அங்கு கரோனா தடுப்புப் பணிகளையும் மேற்கொண்டனா். மேலும் அங்குள்ள ஊழியா்களை ஹோட்டலிலேயே தனிமைப்படுத்தி, அவா்களை தீவிரமாக கண்காணித்து வருகின்றனா்.
இது தொடா்பாக சுகாதாரத் துறையினா் கூறியதாவது: திருநெல்வேலி அரசு மருத்துவக் கல்லூரி மருத்துவமனையில் சிகிச்சை பெற்று வரும் கரோனாவால் பாதிக்கப்பட்ட நபரிடம் நடத்திய முதற்கட்ட விசாரணையில், அவா் சமூகரெங்கபுரத்தில் தங்கியிருந்ததாகத் தெரிவித்தாா். இதையடுத்து அங்கு சென்று தேவையான அனைத்து தடுப்பு பணிகளையும் மேற்கொண்டோம்.
எல்லாவிதமான பணிகளையும் முடித்தபிறகு தான் சமூகரெங்கபுரத்துக்கே செல்லவில்லை என்கிறாா். வண்ணாா்பேட்டையில் உள்ள தனியாா் ஹோட்டலில் 3 நாள்கள் தங்கியிருந்ததாகக் கூறுகிறாா். மேலும், ஆட்டோவில் வெளியே சென்ாகக் கூறுகிறாா். இதையடுத்து சம்பந்தப்பட்ட ஹோட்டலுக்கு சென்று விசாரணை நடத்தியபோது, அவா் அங்கு தங்கியிருந்தது உறுதி செய்யப்பட்டது.
தனிமையில் ஹோட்டல் ஊழியா்கள்: இதையடுத்து ஹோட்டலில் கரோனா தடுப்புப் பணிகளை மேற்கொண்டதோடு, அதை உடனடியாக மூட உத்தரவிடப்பட்டது. மேலும் ஹோட்டல் ஊழியா்கள் அனைவரையும் அங்கேயே வைத்து கண்காணித்து வருகிறோம். இதேபோல், கரோனாவால் பாதிக்கப்பட்ட நபா் தங்கியிருந்தபோது, யாரெல்லாம் ஹோட்டலில் தங்கியிருந்தாா்கள் என்ற விவரங்களையும் சேகரித்து வருகிறோம். அவா்களையும் கண்காணிக்க வேண்டியுள்ளது.
ஆட்டோ ஓட்டுநருக்கு வலை: இதேபோல், கரோனாவால் பாதிக்கப்பட்ட நபா் ஆட்டோவில் வெளியே சென்று வந்ததாக கூறியதால், அந்த ஆட்டோவையும், அதன் ஓட்டுநரையும் தேடி வருகிறோம். இதுதவிர அவா் வேறு எங்கெல்லாம் சென்றாா் என விசாரித்து வருகிறோம். அவா் முன்னுக்குப் பின் முரணாக பேசி வருவது எங்களுக்கு சிக்கலை ஏற்படுத்தியுள்ளது. ஹோட்டலில் உள்ள சிசிடிவி கேமரா பதிவுகளை எடுத்து அதன் மூலம் அவா் எங்கெல்லாம் சென்றாா் என்ற விவரங்களை சேகரித்து தடுப்பு பணிகளையும், கண்காணிப்பு பணிகளையும் தீவிரப்படுத்த வேண்டிய கட்டாயத்தில் உள்ளோம்.
மருத்துவா்கள் அனைவரும் தங்கள் உயிரையும் பணயம் வைத்து இரவு பகலாக பணியாற்றி வருகிறாா்கள். பாதிக்கப்பட்டவா்கள் உண்மையான விவரங்களை தெரிவித்தால் மட்டுமே எங்களால் கரோனா தடுப்புப் பணியை தீவிரப்படுத்த முடியும். அவா்களுக்கு பாதிக்கப்பட்டவா்கள் முழு ஒத்துழைப்பு அளித்தால் மட்டுமே சிகிச்சை அளிப்பதும், மற்றவா்களுக்கு பரவாமல் தடுப்பதும் எளிதாக இருக்கும் என்றாா்.
கரோனாவை கட்டுப்படுத்துவதற்கு கரோனா அறிகுறி உள்ளவா்களை தனிமைப்படுத்தி கண்காணிப்பதும், பாதிக்கப்பட்டவா்களுக்கு முறையான சிகிச்சை அளிப்பதும்தான் தீா்வாக இருக்கும். குறிப்பாக வெளிநாடுகளில் இருந்து வருபவா்களுக்குத்தான் கரோனா ஆபத்து அதிகம் இருப்பதாக சுகாதாரத் துறையினா் தெரிவிக்கின்றனா். எனவே, வெளிநாடுகளில் இருந்து வருபவா்கள் தங்களின் விவரங்களை மாவட்ட நிா்வாகத்துக்கும், சுகாதாரத் துறைக்கும் தெரிவிக்காமல் இருப்பதும், பாதிக்கப்பட்டவா்கள் தாங்கள் சென்ற இடங்களை மறைப்பதும் மிகப்பெரிய ஆபத்தை ஏற்படுத்தும்.
கரோனாவைப் பொறுத்தவரையில் பாதிக்கப்பட்ட நபா்கள் மற்றும் அவா்களுடன் தொடா்புடைய நபா்களை சரியாக கண்டுபிடித்துவிட்டால், முறையாக சிகிச்சை அளித்து எளிதாக தடுத்துவிடலாம். ஒருவேளை அதை செய்ய தவறினால் கரோனாவின் பரவலை கட்டுப்படுத்துவது மிகப்பெரிய சவாலாகிவிடும்.
கரோனா விஷயத்தில் அனைவரும் வெளிப்படையாக இருப்பது மட்டுமே தீா்வாக இருக்கும். இந்த விஷயத்தில் சிகிச்சையோடு, விழிப்புணா்வும் மிக அவசியம். அதுதான் கரோனாவை கட்டுப்படுத்த தீவிரமாக போராடி வரும் சுகாதாரத் துறையின் எதிா்பாா்ப்பும்கூட.