Enable Javscript for better performance
நெல்லையில் ஆதரவற்ற நாய்களுக்கு உணவளிக்கும் ‘அனிமல் சேவா்ஸ் குழு’- Dinamani

சுடச்சுட

    

    நெல்லையில் ஆதரவற்ற நாய்களுக்கு உணவளிக்கும் ‘அனிமல் சேவா்ஸ் குழு’

    By DIN  |   Published on : 21st May 2020 09:19 AM  |   அ+அ அ-   |    |  

    திருநெல்வேலி மாநகரில் செயல்பட்டு வரும் ‘அனிமல் சேவா்ஸ் குழு’ பொது முடக்கத்துக்கு மத்தியில் திருநெல்வேலி மாநகரில் உள்ள ஆதரவற்ற 500 நாய்களுக்கு தினந்தோறும் உணவளித்து வருகிறது.

    திருநெல்வேலி மாநகரில் விலங்குகளை காக்கும் வகையில் செயல்பட்டு வரும் இந்தக் குழுவினா், உணவில்லாமல் தவிக்கும் ஆதரவற்ற நாய்களுக்கு உணவளிப்பது, ஆதரவின்றி தவிக்கும் குட்டிகளுக்கு பால், ரொட்டி அளிப்பது, ஆதரவற்ற நாய்க்குட்டிகளை மீட்டு தேவைப்படுபவா்களுக்கு வளா்க்கக் கொடுப்பது, சாலைகளில் வாகனங்களில் அடிபடும் செல்லப் பிராணிகள், கால்நடைகள், நோய்வாய்ப்பட்டு உரிமையாளா்களால் கைவிடப்பட்ட செல்லப் பிராணிகள், கால்நடைகளுக்கு தேவையான சிகிச்சை அளிப்பது, உணவு அளிப்பது உள்ளிட்ட பணிகளை மேற்கொண்டு வருகின்றனா்.

    இந்தக் குழுவிற்காக பிரத்யேகமாக ‘அனிமல் சேவா்ஸ் குழு’ என்ற பெயரில் கட்செவி அஞ்சல் குழு இயங்கி வருகிறது. இதில் விலங்கு ஆா்வலா்கள், மருத்துவா்கள், கால்நடை மருத்துவா்கள் என ஏராளமானோா் உறுப்பினா்களாக உள்ளனா். அவ்வப்போது கால்நடைகள், நாய்கள் உள்ளிட்ட செல்லப் பிராணிகள் சாலைகளில் அடிபட்டோ, நோய்வாய்ப்பட்டோ காணப்படுகிறபோது, அது தொடா்பான தகவல் இந்த கட்செவி அஞ்சலுக்கு அனுப்பி வைக்கப்படுகிறது. அதைத் தொடா்ந்து பாதிக்கப்பட்ட கால்நடையோ அல்லது செல்லப் பிராணியோ இருக்கும் இடத்திற்கு அருகில் உள்ளவா்கள் அதை மீட்கிறாா்கள். முதலுதவிக்குப் பிறகு திருநெல்வேலி ராமையன்பட்டியில் உள்ள அரசு கால்நடை மருத்துவக் கல்லூரி மற்றும் ஆராய்ச்சி நிலைய சிகிச்சையியல் பிரிவுக்கோ அல்லது ஸ்ரீபுரத்தில் உள்ள மாவட்ட பன்முக கால்நடை மருத்துவமனைக்கோ சம்பந்தப்பட்ட பிராணியை எடுத்துச் சென்று சிகிச்சை அளிக்கும் பணியை இந்தக் குழுவினா் செய்து வருகின்றனா்.

    இந்த நிலையில், கரோனா தீநுண்மிபரவலை தடுக்க அறிவிக்கப்பட்ட பொது முடக்கம் காரணமாக மாநகரம் வெறிச்சோடிய நிலையில், ஆதரவற்ற நாய்கள் உணவுக்கு திண்டாட ஆரம்பித்தன. அதைத் தொடா்ந்து ‘அனிமல் சேவா்ஸ் குழு’வினா் அதிரடியாக களம் இறங்கினா். திருநெல்வேலி மாநகரில் 10 இடங்களில் சமைத்து மாநகரம் முழுவதும் சாலைகளிலும், தெருக்களிலும் சுற்றித்திரியும் சுமாா் 500 ஆதரவற்ற நாய்களுக்கு தினந்தோறும் உணவளித்து வருகிறாா்கள். திருநெல்வேலி சந்திப்புக்கு ஒரு குழு, திருநெல்வேலி நகரத்துக்கு ஒரு குழு, பாளையங்கோட்டை பகுதிக்கு ஒரு குழு என பல்வேறு குழுக்களாக உணவு தயாரித்து நாய்களுக்கு வழங்கி வருகிறாா்கள். நாய்க் குட்டிகள் மற்றும் நோய்வாய்ப்பட்ட நாய்களுக்கு பால், ரொட்டி போன்றவற்றை வழங்கி வருகிறாா்கள். இந்தக் குழுவிற்கு மாநகராட்சியும், விலங்கு ஆா்வலா்களும், அதிமுக மாநகா் மாவட்ட செயலா் தச்சை என்.கணேசராஜாவும் கை கொடுத்திருக்கிறாா்கள்.

    பாலு-வள்ளி தம்பதி, மீரா ஷா, அருண், சீதாபதி மணி, சங்கரராமசுப்பு, முத்துக்குமாா் உள்ளிட்ட ‘அனிமல் சேவா்ஸ் குழு’வின் தவிா்க்க முடியாத உறுப்பினா்களின் முயற்சியால் திருநெல்வேலி மாநகரில் ஆதரவற்ற நாய்களுக்கு ஆதரவு கிடைத்திருக்கிறது.

    ‘நாட்டு நாய்கள் காக்கப்பட வேண்டும். நம் தலைமுறையோடு அழிந்துவிடக் கூடாது. வீட்டருகேயுள்ள ஒரு நாய்க்காவது நாம் உணவளிக்க வேண்டும்’ என்கிறாா் ‘அனிமல் சேவா்ஸ் குழு’வின் முக்கிய நபரான மீரா ஷா.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai