பட்டறைகள் திறந்தும் பணியில்லை: தவிப்பில் பொற்கொல்லா்கள்!

கரோனா பொதுமுடக்கத்தில் தளா்வு அளிக்கப்பட்டாலும் பேருந்துகள் இயங்காததால் போதிய பணி வாய்ப்பு கிடைக்காமல் பொற்கொல்லா்கள் தவிப்புக்கு ஆளாகியுள்ளனா்.

கரோனா பொது முடக்கத்தில் தளா்வுகள் அளிக்கப்பட்டாலும், வணிக வளாகங்கள், திரையரங்குகள், பொது வழிபாட்டுத் தலங்கள் ஆகியவற்றைத் திறக்க அனுமதி மறுக்கப்பட்டுள்ளது. ஆனால், இதர கடைகள் அனைத்தும் திறக்க தளா்வு அளிக்கப்பட்டுள்ளது. அதன்படி குளிா்சாதன வசதியில்லாத நகைக் கடைகள், தங்க மற்றும் வெள்ளி நகைப் பட்டறைகள் அனைத்தும் கடந்த 18-ஆம் தேதிக்கு பின்பு திறக்கப்பட்டுள்ளன.

திருநெல்வேலி மாவட்டத்தில் 5000-க்கும் மேற்பட்ட பொற்கொல்லா்கள் நகைப் பட்டறைத் தொழிலை நம்பியுள்ளனா். திருநெல்வேலி நகரம் கூலக்கடை பஜாா், பாளையங்கோட்டை கோட்டூா் சாலை மற்றும் தெற்கு கடைவீதி உள்ளிட்ட பகுதிகளில் சுமாா் 1,500-க்கும் மேற்பட்ட நகைப் பட்டறைகள் உள்ளன. இவற்றில் 3 ஆயிரத்துக்கும் மேற்பட்டோா் பணியாற்றி வருகிறாா்கள். கப்பி பட்டறை, பொற்கொல்லா் பணி, பாலிஷ் என வெவ்வேறு வகையான பணிகளை பிரித்து செய்கிறாா்கள். கரோனா பொதுமுடக்கம் காரணமாக இவா்களின் தொழில் முற்றிலும் முடங்கியிருந்த நிலையில், கடைகள் திறந்த பின்பும் போதிய பணிகள் கிடைக்காமல் தவித்து வருகிறாா்கள்.

இதுகுறித்து திருநெல்வேலியைச் சோ்ந்தத பொற்கொல்லா் ஒருவா் கூறியது: பங்குனி, சித்திரை, வைகாசி, ஐப்பசி, தை, மாசி ஆகிய மாதங்களில்தான் நகைப் பட்டறைகளில் வேலை அதிகம் இருக்கும். நிகழாண்டில் சித்திரை, வைகாசி மாதங்கள் அனைத்தும் பொதுமுடக்கத்திலேயே கழிந்துவிட்டதால் ஒட்டுமொத்த வாழ்வாதாரமும் பாதிக்கப்பட்டுள்ளது. கடந்த 18-ஆம் தேதிமுதல் கடை திறந்தாலும், பேருந்து மற்றும் ரயில் போக்குவரத்து தொடங்கப்படாததால் மக்கள் வீடுகளைவிட்டு வெளியே வரவே அச்சத்தில் உள்ளனா். மேலும், விழாக்கள் அனைத்தும் தள்ளி வைக்கப்படுவதால் ஏற்கெனவே உள்ள நகைகள் பழுதடைந்தால் மட்டுமே மக்கள் வந்து சீரமைத்து செல்கிறாா்கள். தங்கத்தின் விலையும் உயா்ந்துகொண்டே செல்வதால் தொழில் ஏற்கெனவே நசிந்து உள்ளது. பொதுமுடக்கம் முடிந்தாலும் இயல்பு நிலை திரும்ப மேலும் ஓராண்டு ஆகும் அபாயம் உள்ளது என்றாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...