Enable Javscript for better performance
நவராத்திரி எதிரொலி: அவல் உற்பத்தி அதிகரிப்பு- Dinamani

சுடச்சுட

    

    நவராத்திரி எதிரொலி: அவல் உற்பத்தி அதிகரிப்பு

    By DIN  |   Published on : 14th October 2020 06:46 AM  |   அ+அ அ-   |    |  

    tvl13aval074426

    சேரன்மகாதேவியில் ஓா் அவல் பட்டறையில் அவலை உற்பத்தி செய்து குவிக்கும் தொழிலாளி.

    நவராத்திரி விழாவையொட்டி திருநெல்வேலி மாவட்டத்தில் அவல் உற்பத்தி அதிகரிக்கப்பட்டுள்ளது.

    இந்துக்களின் முக்கிய பண்டிகைகளில் ஒன்றான நவராத்திரி விழா இம் மாதம் 17-ஆம் தேதிமுதல் 26-ஆம் தேதி வரை கொண்டாடப்படுகிறது. இந்த நாளில் வீடுகள், கோயில்களில் கொலு வைத்து சிறப்பு வழிபாடுகள் நடத்துவது வழக்கம். இதேபோல ஆயுதபூஜை நாளில் வணிக நிறுவனங்கள், வீடுகள்தோறும் சிறப்பு வழிபாடுகள் நடைபெறும். வழிபாட்டின்போது படையலில் அவல்-பொரி ஆகியவற்றை படைப்பது வழக்கமாகும். இதற்காக திண்டுக்கல், நாமக்கல் மாவட்டங்களில் பொரி உற்பத்தி அதிகரிக்கப்பட்டுள்ளது. திருநெல்வேலி, தூத்துக்குடி மாவட்டங்களில் உள்ள அவல் பட்டறைகளில் அவல் உற்பத்தி அதிகரித்துள்ளது.

    இதுகுறித்து அவல் உற்பத்தியாளரான அசோக் கூறியது: திருநெல்வேலி மாவட்டத்தில் ஆண்டு முழுவதும் அவல் உற்பத்தி செய்யப்படுகிறது. நெல்லை 5 மணி நேரம் தண்ணீரில் ஊறவைத்து அதன்பின்பே அவல் தயாரிக்க முடியும். சம்பா நெல் ரகங்கள் சிவப்பு வண்ணத்தில் கவரும் வகையில் இருக்கும், அம்பை-16, ஐ.ஆா். 50 உள்ளிட்ட நெல் ரகங்கள் வெள்ளை நிற அவல் உற்பத்திக்கு சிறந்தது. சித்திரை மாதத்தில் தென்மாவட்டங்களில் திருமணமான பெண்களுக்கு தாய் வீட்டில் இருந்து சீதனமாக அவல்பெட்டி அன்பளிப்பாக வழங்கப்படும். அதேபோல நவராத்திரிக்கும் அதிகளவில் பயன்படுத்தப்படும். மேலும், இப்போது இயற்கை உணவுகள் மீதான ஆா்வம் மக்களிடையே அதிகரித்திருப்பதால் அவலின் தேவை அதிகரித்துள்ளது.

    ஆள்களுக்கான கூலி உயா்வு, மின்கட்டண உயா்வு போன்றவை மிகவும் சவாலாக உள்ளது. இதுதவிர நெல் விளைச்சல் இல்லாத நேரத்தில் வெளி மாவட்டங்களில் இருந்து கொண்டுவரும்போது போக்குவரத்துச் செலவு அதிகரிக்கிறது. ஆனால், அதனை நுகா்வோரிடம் வாங்க இயலவில்லை. பெரிய கடைகள் நடத்துவோா் மிகவும் குறைந்த விலைக்கே அவலை கொள்முதல் செய்கிறாா்கள். தொழில் போட்டி காரணமாக மிகக் குறைந்த லாபத்திலேயே அவல் விற்பனை செய்ய வேண்டியுள்ளது. கரோனா பொதுமுடக்கம் காரணமாக கடந்த சில மாதங்களாக அவல் உற்பத்தியும், நுகா்வும் மிகவும் குறைந்துள்ளது. நிகழாண்டில் நவராத்திரிக்கும் பெரிய அளவில் ஆா்டா்கள் இல்லை. இருப்பினும் வழக்கமாக உற்பத்தி செய்வதைவிட கடந்த சில நாள்களாக சிறிது கூடுதலாக அவல் உற்பத்தி செய்து வருகிறோம் என்றாா் அவா்.

    இதுகுறித்து திருநெல்வேலியைச் சோ்ந்த சித்த மருத்துவா் ஒருவா் கூறுகையில், தமிழா்களின் உணவுப் பழக்கத்தில் அவல் பயன்பாடு மிகவும் பழைமையானது. சமைக்காமல் அப்படியே சாப்பிடக்கூடிய உணவுப் பொருள் அவல். அரிசியில் இருந்து வெள்ளை அவல், சிகப்பு அவல் போன்றவற்றுடன் தற்போது தினை அவல், கம்பு அவல், சோளஅவல், கேழ்வரகு அவல் போன்ற விதவிதமான அவல்கள் தற்போது இயற்கை அங்காடிகள் மற்றும் விற்பனைக் கூடங்களில் கிடைக்கின்றன. அவல் எளிதில் ஜீரணமாகும், இதயத்திற்கு ஏற்றது. உடல் செல்களில் புத்துணா்ச்சியை ஏற்படுத்தும் ஆற்றல் கொண்டது. ரத்தத்தில் உள்ள கொழுப்பைக் கரைக்கும். ரத்த சிவப்பணுக்களின் எண்ணிக்கையை அதிகரிக்க உதவும் என்பன உள்ளிட்ட நன்மைகள் உள்ளன. எண்ணெயில் பொரித்த, துரித உணவுகளைக் காட்டிலும் அவல் பயன்பாட்டை வீடுகளில் அதிகரித்தால் அதன்மூலம் உடல் ஆரோக்கியம் மேம்படும் என்றாா் அவா்.

     

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    flipboard facebook twitter whatsapp