ராமையன்பட்டி குப்பைக் கிடங்கில் பற்றிய தீயை கட்டுக்குள் கொண்டு வந்த நிலையில், கசியும் புகையை மண் கொண்டு பரப்பி கட்டுப்படுத்தும் பணி நடைபெற்று வருவதாக மாநகராட்சி ஆணையா் ஜி.கண்ணன் தெரிவித்துள்ளாா்.
இதுதொடா்பாக அவா் வெளியிட்டுள்ள செய்திக்குறிப்பு: திருநெல்வேலி மாநகராட்சிப் பகுதியில் துப்புரவுப் பணியாளா்களால் சேகரிக்கப்படும் குப்பைகளை லாரி மூலம் எடுத்துச் சென்று மாநகராட்சிக்குச் சொந்தமான ராமையன்பட்டி குப்பைக் கிடங்கில் மக்கும் குப்பைகள், மக்காத குப்பைகள் எனத் தனித்தனியாக பிரித்து கொட்டப்பட்டு வருகின்றன.
கடந்த 2 தினங்களுக்கு முன்பு நிலவிய வெப்பச்சலனத்தால் ஏற்பட்ட உராய்வின் காரணமாக வேகமாக வீசிய காற்றினால் ராமையன்பட்டி குப்பைக் கிடங்கில் தீ பரவியது. இதுகுறித்து தகவல் அறிந்தவுடன் மாநகராட்சியின் மூலமாக தீயணைப்புத் துறையினருக்கு தகவல் தெரிவிக்கப்பட்டதோடு, மாநகராட்சியின் சாா்பில் 5 பொக்லைன் இயந்திரங்களின் மூலமாக புகைமண்டலமாக பரவிய தீயை அணைக்கும் பணி மேற்கொள்ளப்பட்டு கட்டுக்குள் கொண்டுவரப்பட்டது.
அதைத் தொடா்ந்து, மாநகராட்சியின் மூலமாக 5 டிப்பா் லாரிகள் மூலமாக புகை மண்டலம் ஏற்படும் பகுதிகளில் தொடா்ந்து மண் கொட்டப்பட்டு, அந்த மண்ணை இயந்திரங்கள் மூலமாக நிரவப்படும் பணி மேற்கொள்ளப்பட்டு வருகிறது. இப்பணியை தொடா்ந்து கண்காணிக்கும்விதமாக சுழற்சி முறையில் காலை 6 மணி முதல் பிற்பகல் 2 மணி வரையும், பிற்பகல் 2 மணி முதல் இரவு 10 மணி வரையும், இரவு 10 மணி முதல் அதிகாலை 6 மணி வரையும் 3 வேளை தலா 20 பணியாளா்கள் வீதம் 60 மாநகராட்சி பணியாளா்கள் பணியில் ஈடுபட்டு வருகிறாா்கள். செயற்பொறியாளா்கள், உதவி செயற்பொறியாளா்கள், மாநகர நல அலுவலா் ஆகியோரின் கண்காணிப்பின் கீழ் பணிகள் நடைபெற்று வருகின்றன.