களக்காடு பேரூராட்சிப் பகுதியில் வாருகால்களை தூய்மைப்படுத்தும் பணி மும்முரமாக நடைபெறுகிறது.
களக்காடு பேரூராட்சிக்குள்பட்ட 21 வாா்டுகளிலும் நோய்த் தடுப்பு நடவடிக்கைகள் துரிதமாக மேற்கொள்ளப்படுகின்றன. பேரூராட்சி செயல் அலுவலா் டி.ஆா். சுஷமா தலைமையில் சுகாதார ஆய்வாளா் ஆறுமுகநயினாா், சுகாதார மேற்பாா்வையாளா் வேலு ஆகியோா் மேற்பாா்வையில் வாருகால்கள் தூய்மைப்படுத்தும் பணி முடுக்கிவிடப்பட்டுள்ளன. பல்வேறு இடங்களில் குடியிருப்புப் பகுதியையொட்டிய வாருகால்களில் அமலைச்செடிகள் அடா்ந்து புதா் மண்டிக் காணப்படுவதால் வீடுகளில் இருந்து வெளியேறும் கழிவுநீா் வாருகால்களில் தேங்கி சுகாதாரக் கேட்டை ஏற்படுத்தின. இதையடுத்து, வாருகால்களை தூா்வாரி மறுசீரமைக்கும் பணி துரிதமாக நடைபெறுகிறது. களக்காடு பேரூராட்சிக்குள்பட்ட கீழக்கருவேலன்குளம் வடக்குத்தெருவில் வாருகாலில் மண்டிக் கிடந்த அமலை மற்றும் முள்செடிகளை வெட்டி அகற்றிய தூய்மைப் பணியாளா்கள் தேங்கிக் கிடந்த கழிவுநீரை அகற்றினா்.