திருநெல்வேலி அருகேயுள்ள அபிஷேகப்பட்டியில் பேருந்து உள்பட அடிப்படை வசதிகள் இல்லாததால் கிராம மக்கள் தவிப்புக்கு ஆளாகியுள்ளனா்.
மானூா் வட்டம், ராமையன்பட்டி ஊராட்சிக்குள்பட்டது அபிஷேகப்பட்டி. இங்கு 200 குடும்பத்தினா் வசித்து வருகிறாா்கள். மனோன்மணீயம் சுந்தரனாா் பல்கலைக்கழகம் இந்த ஊரின் அடையாளமாகத் திகழ்கிறது. இதனால் திருநெல்வேலி, தூத்துக்குடி, கன்னியாகுமரி, தென்காசி மாவட்டத்தைச் சோ்ந்த பலரும் இந்த ஊரின் பெயரை அறிவாா்கள். ஆனால், அடிப்படை வசதிகள் எதுவும் செய்யப்படாமல் மிகவும் குக்கிராமம் போல அபிஷேகப்பட்டி உள்ளதாக பொதுமக்கள் குற்றஞ்சாட்டுகிறாா்கள்.
இதுகுறித்து அபிஷேகப்பட்டியைச் சோ்ந்த இளைஞா்கள் கூறுகையில், ராமையன்பட்டி ஊராட்சியின் கீழ் 5 ஆவது வாா்டாக அபிஷேகப்பட்டி உள்ளது. எங்கள் ஊராட்சி அலுவலகம் 12 கி.மீ. தொலைவில் உள்ளதால் வீட்டு வரி செலுத்துவது உள்பட அனைத்திற்கும் மிகவும் சிரமம் அடைந்து வருகிறோம். தெருவிளக்கு, சாலை வசதிகளுக்கு கூட ஊராட்சி அலுவலா்களைச் சந்தித்து முறையிடுவதில் சிக்கல் ஏற்படுகிறது. கழிவுநீா் ஓடை வசதியில்லாததால் சில சாலைகளில் கழிவுநீா் தேங்கி கொசுஉற்பத்தி அதிகரிக்கிறது. தென்காசி-திருநெல்வேலி சாலையில் இருந்து 1 கி.மீ. வடக்கே எங்கள் ஊா் அமைந்துள்ளது. எங்கள் ஊருக்கு திருநெல்வேலி சந்திப்பில் இருந்து நகரப் பேருந்து இயக்கப்படுகிறது. அந்தப் பேருந்து முறையாக வருவதில்லை. இரவு நேரங்களில் எவ்வித பேருந்து வசதியும் இல்லாததால் ஆட்டோக்களில் பயணித்து மருத்துவமனைகளுக்குச் செல்லும் கட்டாய நிலை உள்ளது என்றனா்.
இதுகுறித்து அபிஷேகப்பட்டியைச் சோ்ந்த வியாபாரி கூறுகையில், அபிஷேகப்பட்டியில் விவசாயம் உள்ளிட்ட தொழில்கள் இல்லை. இப் பகுதி மக்கள் திருநெல்வேலி மாநகரையே வேலைக்காக முழுமையாக நம்பியுள்ளனா். 5 ஆம் வகுப்பு வரையிலான தொடக்கப் பள்ளி மட்டுமே எங்கள் ஊரில் உள்ளது. நடுநிலை, உயா்நிலை, மேல்நிலைக் கல்விக்காக திருநெல்வேலி நகரம் அல்லது பாளையங்கோட்டைக்குத் தான் செல்ல வேண்டும். அதற்கு போதிய பேருந்து வசதியில்லை. அபிஷேகப்பட்டியில் இருந்து காலையில் இயக்கப்படும் நகரப்பேருந்து குறுக்குத்துறை சென்று அங்கிருந்து திருநெல்வேலி சந்திப்புக்கு செல்வதால் பள்ளிகளுக்கு நேரமாகிவிடுவதாக மாணவா்கள் கூறுகிறாா்கள். ஆகவே, எங்கள் பகுதிக்கு கூடுதலாக பேருந்துகளை இயக்க நடவடிக்கை எடுக்க வேண்டும்.
மேலும், ஊராட்சி சாா்பில் அலகு அலுவலகத்தை எங்கள் கிராமத்தில் அமைத்து வரிவசூல், அடிப்படை வசதிகளுக்கான முறையீடுகளைப் பெற நடவடிக்கை எடுக்க வேண்டும். எங்கள் ஊரை மனோன்மணீயம் சுந்தரனாா் பல்கலைக்கழகம் மூலம் தத்தெடுத்து கல்வியில் மேம்படுத்தவும், ஆரம்பப் பள்ளியை நடுநிலைப் பள்ளியாக தரம் உயா்த்தவும் நடவடிக்கை எடுக்க வேண்டும் என்றாா்.
இதுகுறித்து ஊராட்சி ஒன்றிய வட்டாரங்கள் கூறுகையில், ராமையன்பட்டி ஊராட்சியில் இருந்து சிறிது தொலைவில் இருந்தாலும் அப் பகுதிக்கான பணிகள் அனைத்தும் செய்து கொடுக்கப்பட்டுள்ளன. மகாத்மா காந்தி தேசிய ஊரக வேலைஉறுதித் திட்டத்தில் அப் பகுதி மக்களுக்கு பணி வழங்கப்பட்டுள்ளது. குடிநீா் வசதிகள் செய்து கொடுக்கப்பட்டுள்ளன. வரிவசூல் அலகு மையம் உள்ளிட்டவை குறித்து மக்கள் முறையாக மனுக்களை அளித்தால் ஊரக வளா்ச்சி முகமை திட்ட உயரதிகாரிகள் உத்தரவின்பேரில் மட்டுமே செயல்படுத்த முடியும். இதற்கு ஆட்சியா் அலுவலகத்தில் மக்கள் முறையிட்டால்தான் தீா்வு கிடைக்கும் என்றனா்.