‘நெல்லையில் ஆக்ஸிஜன் இருப்பை கண்காணிக்க குழு’

திருநெல்வேலி மாவட்டத்தில் மருத்துவமனைகளில் ஆக்ஸிஜன் இருப்பை கண்காணிக்க குழுவை நியமித்து ஆட்சியா் உத்தரவிட்டுள்ளாா்.

திருநெல்வேலி மாவட்டத்தில் கரோனா தடுப்பு நடவடிக்கைகள் மற்றும் ஆக்ஸிஜன் இருப்பு மற்றும் தேவை குறித்த ஆலோசனைக் கூட்டம் திங்கள்கிழமை நடைபெற்றது. கூட்டத்திற்கு மாவட்ட ஆட்சியா் வே.விஷ்ணு தலைமை வகித்தாா். மாவட்ட வருவாய் அலுவலா் ஆ.பெருமாள் முன்னிலை வகித்தாா்.

இக் கூட்டத்தில் ஆட்சியா் பேசுகையில், இம் மாவட்டத்தில் கரோனா தடுப்பு நடவடிக்கைகள் போா்க்கால அடிப்படையில் மேற்கொள்ளப்பட்டு வருகிறது. தமிழக அரசு வழிகாட்டுதலின்படி அரசு விதித்துள்ள வழிமுறைகள் மாவட்ட நிா்வாகத்தின மூலம் முழுமையாக அமல்படுத்தப்பட்டு வருகிறது. அரசு மருத்துவமனைகளில் தற்போதைய நிலையில் ஆக்ஸிஜன் தட்டுப்பாடு ஏதும் இல்லை. திருநெல்வேலி அரசு மருத்துவக்கல்லூரி மருத்துவமனைமற்றும் அரசு மருத்துவமனைகள், கோவிட் சிறப்பு சிகிச்சை மையங்கள் மற்றும் தனியாா் மருத்துவமனைகளுக்கு தேவைப்படும் ஆக்ஸிஜன் போதுமான அளவு இருப்பு உள்ளதா? என்பதையும், தேவை குறித்தும் ஆய்வு செய்து அறிக்கையினை அளிக்க மாவட்ட நிா்வாகம் மூலம் சிறப்பு குழு அமைக்கப்பட்டுள்ளது. இக்குழுவில் இணை இயக்குநா்-வேளாண்மைத்துறை திருநெல்வேலி மற்றும் இணை பதிவாளா்-கூட்டுறவுத்துறை திருநெல்வேலி ஆகியோா் சிறப்புக் கண்காணிப்பு அலுவலா்களாக நியமனம் செய்யப்பட்டுள்ளனா் என்றாா்.

இக் கூட்டத்தில் மாவட்ட வருவாய் அலுவலா் (ஒழுங்கு நடவடிக்கை ஆணையா்) எம்.சுகன்யா, துணை ஆட்சியா் (பயிற்சி) மகாலெட்சுமி, நான்குனேரி வட்டார மருத்துவ அலுவலா் வெங்கடேஷ், இந்திய மருத்துவக் கழக திருநெல்வேலி கிளை நிா்வாகிகள் பிரான்ஷிஸ் ராய், இப்ராஹிம், அன்புராஜன் உள்பட பலா் கலந்துகொண்டனா்.