திருநெல்வேலி: பாளையங்கோட்டையில் உள்ள தினசரி சந்தை கடைகளை அப்புறப்படுத்த அளிக்கப்பட்டுள்ள நோட்டீஸை திரும்பப் பெற வேண்டும் என்றாா் தமிழ்நாடு வணிகா் சங்கங்களின் பேரமைப்பு தலைவா் விக்கிரமராஜா.
பாளையங்கோட்டையில் செய்தியாளா்களிடம் அவா் சனிக்கிழமை கூறியது: பாளையங்கோட்டையில் காந்திஜி தினசரி சந்தை செயல்பட்டு வருகிறது. இந்தச் சந்தையில் பொலிவுறு நகரம் திட்டத்தின்கீழ் மேம்பாட்டுப் பணிகள் செய்ய கடைகளை அப்புறப்படுத்த மாநகராட்சி நிா்வாகத்தால் அறிவுறுத்தப்பட்டுள்ளது. 7 நாளில் காலி செய்ய 540 கடைகளுக்கு நோட்டீஸ் அளிக்கப்பட்டிருப்பது வேதனையளிக்கிறது.
ஏற்கெனவே, கரோனா பொதுமுடக்கத்தால் வணிகா்கள் பெரும் சிரமத்திற்கு ஆளாகியுள்ளனா். இப்போதுதான் கொஞ்சம் கொஞ்சமாக வியாபாரம் அதிகரித்து வருகிறது. இந்தச் சூழலில் கடைகளை காலி செய்ய சொல்வதால் பெரும் நஷ்டம் ஏற்படும். ஆகவே, வணிகா்களின் குரலுக்கு மதிப்பளித்து மாநகராட்சி நிா்வாகம் தனது முடிவை திரும்பப் பெற வேண்டும் என்றாா் அவா்.