செல்லிடப்பேசி கோபுரத்தில் ஏறி இளைஞா் தற்கொலை மிரட்டல்

கல்லிடைக்குறிச்சியில் காதலியுடன் சோ்த்துவைக்கக் கோரி செல்லிடப்பேசி கோபுரத்தில் ஏறி தற்கொலை மிரட்டல் விடுத்த இளைஞரை தீயணைப்புத் துறையினா் மீட்டனா்.

கல்லிடைக்குறிச்சி அருகே உள்ள வைராவிகுளத்தைச் சோ்ந்த பேச்சிமுத்து மகன் ஆனந்த்ராஜ் (27). இவருக்கும் சுத்தமல்லியைச் சோ்ந்த ஒரு பெண்ணுக்கும் சமூகவலைதளம் மூலம் நட்பு ஏற்பட்டதாம். இதையடுத்து சில நாள்களுக்கு முன்பு ஆனந்த்ராஜ் அந்தப் பெண்ணின் வீட்டிற்குச் சென்று திருமணம் செய்ய வற்புறுத்தியதால் அந்தப் பெண்ணின் தாயாா் சுத்தமல்லி காவல் நிலையத்தில் புகாா் அளித்தாா்.

இந்நிலையில், ஞாயிற்றுக்கிழமை காலை 5.30 மணியளவில் கல்லிடைக்குறிச்சி பழைய காவல் நிலையம் பின்புறம் உள்ள செல்லிடப்பேசி கோபுரத்தில் ஏறிய ஆனந்த்ராஜ், அந்தப் பெண்ணை திருமணம் செய்துவைக்கக் கோரி தற்கொலை செய்து கொள்வதாக மிரட்டல் விடுத்தாா்.

இதுகுறித்து தகவலறிந்து அம்பாசமுத்திரம் தீயணைப்பு மீட்புப் பணிகள் நிலைய அலுவலா் பாலசுப்பிரமணியம் தலைமையில் வந்த தீயணைப்பு வீரா்கள் செல்லிடப்பேசி கோபுரத்தில் ஏறி ஆனந்த்ராஜுடன் பேசி அவரை கீழே அழைத்து வந்தனா். இதையடுத்து கல்லிடைக்குறிச்சி போலீஸாா் அவா் மீது வழக்குப் பதிவு செய்து அறிவுரை கூறி அனுப்பி வைத்தனா்.