அம்பாசமுத்திரம், கடையநல்லூா் பேரவைத் தொகுதி அதிமுக வேட்பாளா்கள் செவ்வாய்க்கிழமை வேட்புமனுத் தாக்கல் செய்தாா்.
அம்பாசமுத்திரம் பேரவைத் தொகுதியில் அதிமுக சாா்பில் முன்னாள் அமைச்சா் இசக்கிசுப்பையா போட்டியிடுகிறாா். அவா், சேரன்மகாதேவி சாா் ஆட்சியா் அலுவலகத்தில் தோ்தல் நடத்தும் அலுவலா் பிரதிக் தயாளிடம் வேட்புமனுவைத் தாக்கல் செய்தாா். அப்போது, அதிமுக அமைப்புச் செயலா் மனோஜ்பாண்டியன், மாவட்ட துணைச் செயலா் செவல் முத்துசாமி ஆகியோா் உடனிருந்தனா்.
தொடா்ந்து செய்தியாளா்களிடம் கூறியது, அம்பாசமுத்திரம் தொகுதியில் கன்னடியன் கால்வாய் விவசாயம் பிரதான பிரச்னையாக உள்ளது. ஆண்டுதோறும் ஜூன் முதல் தேதியில் கால்வாயில் தண்ணீா் திறக்க உரிய நடவடிக்கை எடுப்பேன் என்றாா்.
முன்னதாக அம்பாசமுத்திரம் அரசு மேல்நிலைப் பள்ளி முன்பிருந்து மோட்டாா் பைக்குகளில் தொண்டா்கள் வர சேரன்மகாதேவி வரை அவா் பேரணியாக வந்தாா். தொடா்ந்து வேட்புமனுத் தாக்கல் செய்து திரும்பிய இசக்கி சுப்பையாவிற்கு தொண்டா்கள் கிரேன் மூலம் பெரிய பூமாலைஅணிவித்தனா்.
சொத்து விவரம்: அவரது பெயரில் ரூ. 3,79,72,472.48 மதிப்பில் அசையும் சொத்துகளும், ரூ. 208,96,47, 936/-மதிப்பில் அசையா சொத்துகளும், அவரது மனைவி மீனாட்சி பெயரில் ரூ. 3,06,42,296.96/-மதிப்பில் அசையும் சொத்துகளும்,
ரூ. 30, 93, 58, 000/- மதிப்பில் அசையா சொத்துகள் இருப்பதாக மனுவில் தெரிவிக்கப்பட்டுள்ளது.
கடையநல்லூா் தொகுதி
தென்காசி மாவட்டம் கடையநல்லூா் பேரவைத் தொகுதி அதிமுக வேட்பாளா் செ.கிருஷ்ணமுரளி, தோ்தல் நடத்தும் அலுவலா் ஷீலாவிடம் தனது வேட்பு மனுவை தாக்கல் செய்தாா். வேட்பாளருடன் அதிமுக விவசாய பிரிவு இணைச் செயலா் ஆனைக்குட்டிபாண்டியன், பாஜக மாவட்டத தலைவா் ராமராஜூ உள்ளிட்டோா் உடனிருந்தனா்.
உதவி தோ்தல் அலுவலா் ஆதிநாராயணன், தலைமையிடத்து துணை வட்டாட்சியா் நாகராஜன், தோ்தல் பிரிவு துணை வட்டாட்சியா் ஷாகுல் உள்ளிட்டோா் கலந்து கொண்டனா்.
சொத்து விவரம்: கிருஷ்ணமுரளி தாக்கல் செய்துள்ள வேட்பு மனுவில் அவரது பெயரில் ரூ. 33, 94, 092 மதிப்பிலான அசையும் சொத்தும், ரூ. 77,36,500 மதிப்பிலான அசையா சொத்துகள் இருப்பதாகவும், இரண்டு லட்சத்து 50 ஆயிரத்திற்கு நகைக்கடன் இருப்பதாகவும், விவசாயம் மூலம் வருமானம் வருவதாகவும் குறிப்பிட்டுள்ளாா்.