சுற்றுச்சூழல் தினத்தில் மரக்கன்றுகள் நடும் பணி

உலக சுற்றுச்சூழல் தினத்தையொட்டி திருநெல்வேலி பல்வேறு இடங்களில் விழிப்புணா்வு நிகழ்ச்சிகள் நடைபெற்றன.

திருநெல்வேலி மாவட்ட சட்டப்பணிகள் ஆணைக்குழுவால் உலக சுற்றுச்சூழல் தினம் ஞாயிற்றுக்கிழமை கடைப்பிடிக்கப்பட்டது. முதன்மை மாவட்ட நீதிபதி ந. குமரகுரு நீதிமன்ற வளாகத்தில் மரக்கன்று நட்டு தொடங்கி வைத்தாா். கூடுதல் மாவட்ட நீதிபதிகள் பத்மநாபன், தீபா, அன்புசெல்வி, மாவட்ட சட்டப் பணிகள் ஆணைக்குழு செயலா் (பொறுப்பு) செந்தில் முரளி, சாா்பு நீதிபதிகள் மனோஜ் குமாா், இசக்கியப்பன், மோகன்ராம் மற்றும் குற்றவியல் மற்றும் உரிமையியல் நீதிமன்ற நீதிபதிகள் சுப்பையா, திருவேணி, ஆறுமுகம், விஜயகுமாா், பாக்கியராஜ், கவி பிரியா, அலெக்ஸாண்டா் உள்பட பலா் கலந்துகொண்டனா்.

எஸ்டிபிஐ: பூமி வெப்பமாதலை தடுக்கவும், காற்று மாசுபடுவதைக் கட்டுப்படுத்தவும், வீட்டுக்கு ஒரு மரம் வளா்ப்போம்; நாட்டின் வளம் காப்போம் திட்டத்தின் கீழ் எஸ்டிபிஐ கட்சியின் சுற்றுச்சூழல் பாதுகாப்பு அணியின் சாா்பில் மேலப்பாளையத்தில் மரக்கன்றுகள் விநியோகிக்கும் நிகழ்ச்சி ஞாயிற்றுக்கிழமை நடைபெற்றது.

எஸ்டிபிஐ கட்சியின் சுற்றுச்சூழல் பாதுகாப்பு அணி மாவட்டத் தலைவா் பக்கீா் முகமது லெப்பை தொடங்கி வைத்தாா். மாநகா் மாவட்ட பொதுச் செயலா் பா்கிட் அலாவுதீன், மாவட்ட அமைப்புச் செயலா் கனி ஆகியோா் மரக்கன்றுகளை விநியோகித்தனா். நிா்வாகிகள் ஹைதா் அலி, சலீம் தீன், ஆரிப் பாஷா ,சுல்தான் பாதுஷா உள்பட பலா் கலந்துகொண்டனா். கடந்த 4 ஆண்டுகளாக இப்பணியை மேற்கொண்டு வருவதாக நிா்வாகிகள் தெரிவித்தனா்.

அஞ்சல் துறை: பாளையங்கோட்டையில் உள்ள தலைமை அஞ்சல் அலுவலக வளாகத்தில் திருநெல்வேலி அஞ்சல் கோட்ட உதவி கண்காணிப்பாளா் தீத்தாரப்பன் தலைமையில் மரக்கன்றுகள் நடப்பட்டன. மக்கள் தொடா்பு அலுவலா் கனகசபாபதி, அஞ்சல் ஊழியா்கள் கதிரேசன், செல்வம், மாரிமுத்து உள்பட பலா் கலந்துகொண்டனா்.