சுற்றுச்சூழலைப் பாதுகாக்க சிறப்பாக பங்காற்றியவா்களுக்கு பசுமை முதன்மையாளா் விருது ஞாயிற்றுக்கிழமை வழங்கப்பட்டது.
உலக சுற்றுச்சூழல் தினத்தைமுன்னிட்டு, பாளையங்கோட்டையில் உள்ள அரசு அருங்காட்சியகத்தில் விருது வழங்கும் விழா ஞாயிற்றுக்கிழமை நடைபெற்றது. இவ்விழாவுக்கு, மாவட்ட ஆட்சியா் வே.விஷ்ணு தலைமை வகித்தாா். தமிழக சட்டப்பேரவைத் தலைவா் மு.அப்பாவு சிறப்பு அழைப்பாளராகப் பங்கேற்று, சுற்றுச்சூழல் பாதுகாப்பிற்காக சிறப்பான பங்களிப்பு ஆற்றிய, எம். மதிவாணன், பொன்னையா, எ.திருமகள் ஆகிய 3 பேருக்கு தலா ரூ.1 லட்சத்திற்கான காசோலையையும் , பசுமை முதன்மையாளா் விருதையும் வழங்கினாா். அப்போது அவா் பேசியது:
தமிழகத்தில் சுற்றுச்சூழலை பேணிகாக்க பல்வேறு திட்டங்களை தமிழக அரசு அமல்படுத்தி வருகிறது. துணிப் பையைத் தான் பயன்படுத்த வேண்டும் என்ற நோக்கில் மஞ்சப்பை திட்டம் கொண்டு வரப்பட்டு செயல்படுத்தப்பட்டுள்ளது. அனைத்து தரப்பு மக்களும் சுகாதாரமாக வாழவேண்டும் என்பதே அரசின் நோக்கம்.
திருநெல்வேலி மாவட்டத்தை பெருமைபடுத்தும் விதமாக பொருநை அருங்காட்சியகம் அமைக்கப்படும் என அறிவிக்கப்பட்டு, அதற்கான இடம் தோ்வு செய்யப்பட்டு, பணிகள் விரைவில் துவங்கப்பட உள்ளன.
சுற்றுச்சூழல் பாதுகாப்பிற்காக சிறப்பான பங்களிப்பு ஆற்றியவா்களை கௌரவிக்கும் விதமாக பசுமை முதன்மையாளா் விருதினை மாநில அளவில் 100 பேருக்கு தமிழக முதல்வா் வழங்கி சிறப்பித்துள்ளாா். தாமிரவருணி தண்ணீரை குளிக்கும் தரத்திலிருந்து குடிக்கும் தரத்திற்கு மாற்றுவதற்கு நடவடிக்கைகள் மேற்கொள்ளப்பட்டு வருகிறது. மரங்கள் நடும் வழக்கத்தை நாம் ஒவ்வொருவரும் கடைப்பிடிக்கவேண்டும். நாம் சுவாசிக்கும் காற்றும், பருகும் குடிநீரும் சுத்தமாக கிடைப்பதற்கு மரம் முக்கிய பங்காற்றுகிறது. எனவே, மக்கள் அனைவரும் சுற்றுச்சூழல் பாதுகாக்க மாவட்ட நிா்வாகத்திற்கு முழு ஒத்துழைப்பு வழங்க வேண்டும் என்றாா்.
இந்நிகழ்ச்சியில் மாவட்ட வன அலுவலா் முருகன், மாவட்ட வருவாய் அலுவலா் பெருமாள், மாநகராட்சி ஆணையா் சிவகிருஷ்ணமூா்த்தி, சேரன்மகாதேவி சாா் ஆட்சியா் ரிஷப் உள்பட பலா் பங்கேற்றனா்.