பாளையங்கோட்டை என்.ஜி.ஒ. ஏ காலனி பகுதியில் புதிய உழவா் சந்தை கட்டும் பணிக்கான அடிக்கல் நாட்டு விழா திங்கள்கிழமை நடைபெற்றது.
திருநெல்வேலி மாவட்டம், வேளாண்மை விற்பனை மற்றும் வேளாண் வணிகத்துறை சாா்பில் பாளையங்கோட்டை என்.ஜி.ஒ. ஏ காலனி பகுதியில் புதிய உழவா் சந்தை கட்டும் பணிக்கான அடிக்கல் நாட்டு விழா திங்கள்கிழமை நடைபெற்றது. , திமுக மத்திய மாவட்டச் செயலா் மு.அப்துல்வஹாப் எம்எல்ஏ, மேயா் பி.எம்.சரவணன் ஆகியோா் முன்னிலை வகித்தனா்.
மாவட்ட ஆட்சியா் வே.விஷ்ணு அடிக்கல் நாட்டிய பின்பு செய்தியாளா்களிடம் கூறியது: திருநெல்வேலி மாவட்டத்தில் மகாராஜநகா், கண்டிகைப்பேரி, மேலப்பாளையம் மற்றும் அம்பாசமுத்திரம் ஆகிய 4 உழவா்சந்தைகள் சிறப்பாக செயல்பட்டு வருகின்றன.
புதிதாக 10 உழவா் சந்தைகள் அமைக்க அரசு உத்தரவிட்டுள்ளது. அதன்படி இம் மாவட்டத்தில் ஐந்தாவதாக என்.ஜி.ஒ. ஏ காலனியில் புதிய உழவா்சந்தை ஆரம்பிக்கப்பட உள்ளது. இத்திட்டத்தின்படி இடைத்தரகா்கள் இன்றி விவசாயிகளே தாங்கள் உற்பத்தி செய்த பொருட்களை நேரடியாக உழவா்சந்தையில் விற்பனை செய்யும் வாய்ப்பு கிடைத்தது. பொருள்களின் விலையை அரசு நியமித்த அதிகாரிகள் குழு தீா்மானிக்கும். மேலும் சரியான அளவில் பொருள்கள் விற்கப்படுகின்றனவா என்பதையும் அவா்கள் கண்காணிப்பாா்கள்.
16 கடைகளும், ஒரு குளிா்பதன கிட்டங்கியும் மற்றும் பொதுமக்கள் எளிதாக காய்கறிகள் மற்றும் பழங்களின் விலைகளை அறியும் வகையில் டிஜிட்டல் போா்டு மற்றும் சந்தையை கண்காணிக்க சிசிடிவி கேமராக்களும் பொருத்தப்படவுள்ளது. இத்திட்டம் ரூ. 60 லட்சத்தில் செயல்படுத்தப்படவுள்ளது.
பாளையங்கோட்டை வட்டாரத்தில் உள்ள ரெட்டியாா்பட்டி, இட்டேரி, பருத்திப்பாடு, தருவை, முத்தூா், கருங்குளம், முன்னீா்பள்ளம், டக்கரம்மாள்புரம் பகுதிகளைச் சோ்ந்த விவசாயிகள் அதிகமானோா் இதன்மூலன் பயன்பெறுவா்.
என்.ஜி.ஒ. ஏ காலனி, என்.ஜி.ஒ. பி காலனி, ரெட்டியாா்பட்டி, திருமால்நகா், பொதிகை நகா், பெருமாள்புரம் உள்ளிட்ட பகுதிகளில் வசிக்கும் மக்களுக்கு மிகவும் பயனுள்ள வகையில் அமையும் என்றாா் அவா்.
நிகழ்ச்சியில் மாநகராட்சி துணை மேயா் கே.ஆா்.ராஜூ, வேளாண்மை இணை இயக்குநா் இரா.கஜேந்திரபாண்டியன், மாவட்ட விற்பனை செயலா் எழில், துணை இயக்குநா் விற்பனை முருகானந்தம், மாமன்ற உறுப்பினா்கள் கருப்பசாமி கோட்டையப்பன், சகாய ஜீலியட் மேரி, அம்பிகா, சங்கீதா உள்பட பலா் கலந்துகொண்டனா்.