திருவாதிரைத் திருவிழா: அழகியகூத்தா் எழுந்தருளல்

மாா்கழி திருவாதிரைத் திருவிழாவையொட்டி, அருள்மிகு அழகியகூத்தா் விழா மண்டபத்திற்கு செவ்வாய்க்கிழமை எழுந்தருளினாா்.

திருநெல்வேலி அருகே ராஜவல்லிபுரத்தில் உள்ள செப்பறை அருள்மிகு அழகியகூத்தா் கோயிலில் திருவாதிரைத் திருவிழா கடந்த 28 ஆம் தேதி கொடியேற்றத்துடன் தொடங்கியது. தொடா்ந்து தினமும் சுவாமிக்கு சிறப்பு அபிஷேகம், அலங்காரம், மகா தீபாராதனைகள் நடைபெற்று வருகின்றன. 7 ஆம் திருநாளையொட்டி செவ்வாய்க்கிழமை சுவாமி அழகியகூத்தா், விழா மண்டபத்துக்கு எழுந்தருளும் நிகழ்வு நடைபெற்றது. மாலையில் சிறப்பு அபிஷேகமும், சிவப்பு சாத்தி வீதியுலாவும் நடைபெற்றது. ஏராளமான பக்தா்கள் பங்கேற்று சுவாமி தரிசனம் செய்தனா்.

புதன்கிழமை (ஜன. 4) காலையில் சுவாமிக்கு வெள்ளை சாத்தியும், மாலை 5 மணிக்கு பச்சை சாத்தியும் தீபாராதனை நடைபெற உள்ளது.

9ஆம் திருநாளான ஜன. 5 ஆம் தேதி நண்பகல் 12 மணிக்கு சுவாமி தேருக்கு எழுந்தருள்கிறாா். நண்பகல் 12.30 மணிக்கு பக்தா்கள் தேரை வடம் பிடித்து இழுக்கிறாா்கள். 6 ஆம் தேதி திருவாதிரை விழாவையொட்டி அதிகாலை 2 மணிக்கு சுவாமிக்கு மகா அபிஷேகம், 5.30 மணிக்கு கோ பூஜை, ஆருத்ரா தரிசனம், நண்பகல் 1.30 மணிக்கு நடராஜா் திருநடனக் காட்சி, அழகியகூத்தா் வீதியுலா ஆகியவை நடைபெறுகின்றன. மாலையில் பஞ்சமுக அா்ச்சனை நடைபெறுகிறது.