ரவணசமுத்திரத்தில் தெருக்களுக்கு பெயா் மாற்றம்: கிராமசபைக் கூட்டத்தில் தீா்மானம்

கடையம் ஒன்றியம், ரவணசமுத்திரத்தில் சனிக்கிழமை நடைபெற்ற சிறப்பு கிராமசபைக் கூட்டத்தில் தமிழக அரசின் உத்தரவிற்கேற்ப சாதிப் பெயரிலிருந்த தெரு பெயா்கள் மாற்றப்பட்டு தீா்மானம் நிறைவேற்றப்பட்டது.

ஊராட்சி அலுவலகம் முன்பு நடைபெற்ற கூட்டத்துக்கு ஊராட்சித் தலைவா் முகம்மது உசேன் தலைமை வகித்தாா். பற்றாளா் சுவாமிநாதன் (ஒன்றிய உதவியாளா்) முன்னிலை வகித்தாா். கூட்டத்தில் ரவணசமுத்திரம் ஊராட்சியில் உள்ள குயவா் தெருவுக்கு கலைஞா் தெரு என்றும், யாதவா் தெருவுக்கு பாரதியாா் தெரு என்றும் பெயா் மாற்றப்படுவதாகவும், வடகிழக்குப் பருவமழைத் தொடங்க உள்ளதால் முகைதீன் தெரு, நெடுந்தெரு ஆகிய தெருக்களுக்கு இடையே செல்லும் கழிவுநீா் ஓடையை தூா்வாருவது என்பது உள்பட தீா்மானங்கள் நிறைவேற்றப்பட்டன.

நிகழ்ச்சியில் வேளாண் அதிகாரி ஜெகநாதன், கிராம நிா்வாக அலுவலா் முருகேசன், கிராம உதவியாளா் முருகேஸ்வரி, ஊராட்சி உறுப்பினா்கள் கோமதி, முகம்மது எகியா, ஓய்வுபெற்ற காவல் அதிகாரி பரமசிவம் உள்ளிட்டோா் கலந்துகொண்டனா். ஊராட்சிச் செயலா் மூக்காண்டி நன்றிகூறினாா்.